បន្ទាប់ពីក្រុមការងារមួយរបស់អង្គការសុខភាពពិភពលោក (WHO) បានបរាជ័យក្នុងអំឡុងពេលបំពេញការងាររបស់ខ្លួននៅទីក្រុងវូហាន ប្រទេសចិន ដើម្បីឈានទៅដល់ការសន្និដ្ឋានក្នុងការស្វែងរកប្រភពដើមនៃវីរុសកូរ៉ូណា។
ក្រុមអ្នកស្រាវជ្រាវម៉ុងហ្គោលី ជឿជាក់ថា ប្រទេសចិនមានចេតនាធ្វើឱ្យមានការរីករាលដាលនៃវីរុសចេញពីមន្ទីរពិសោធន៍ ដើម្បីចៀសវាងការតវ៉ានៅក្នុងតំបន់ បន្ទាប់ពីខ្លួនបានបដិសេធសំណើរបស់អង្គការសុខភាពពិភពលោកក្នុងខែកក្កដា ឆ្នាំ២០២១ ទាក់ទងនឹងការចាប់ផ្តើមដំណាក់កាលទី២ នៃការស៊ើបអង្កេតពីប្រភពដើមនៃវីរុស។
តាមរយៈហេតុផលនេះ វីរុសមិនអាចធ្លាយចេញពីមន្ទីរពិសោធន៍បាននោះទេ ហើយការលើកឡើងបែបនេះគួរតែត្រូវបញ្ចប់ ខណៈដែលក្រុមអ្នកស្រាវជ្រាវក៏បានអំពាវនាវឱ្យប្រទេសចិនមានតម្លាភាពនិងទទួលយកការសិក្សាសុខភាពរបស់ពិភពលោក អំពីដើមកំណើតនៃវីរុសនេះផងដែរ។
នៅក្នុងបទសម្ភាសន៍ជាមួយសារព័ត៌មាន A24 News អ្នកស្រាវជ្រាវមួយរូប លោកស្រី B.Uranchimeg បានឱ្យដឹងថា៖ «ក្រុមអ្នកវិទ្យាសាស្ត្រមួយរបស់អង្គការសុខភាពពិភពលោក បានធ្វើការនៅទីក្រុងវូហាន សាធារណរដ្ឋប្រជាមានិតចិន ដើម្បីតាមដានប្រភពដើមនៃជំងឺកូវីដ-១៩ ប៉ុន្តែពួកគេមិនអាចសម្រេចបាននូវសេចក្តីសន្និដ្ឋានច្បាស់លាស់នោះទេ។ ជាទូទៅ ពួកគេថ្លែងថា ការឆ្លងពីសត្វមកកាន់មនុស្ស គឺមានលទ្ធភាពខ្ពស់ ប៉ុន្តែលទ្ធភាពដែលមេរោគធ្លាយចេញពីមន្ទីរពិសោធន៍ គឺទំនងជាមិនអាចកើតមានឡើងបាននោះទេ។ ក្នុងខែកក្កដា ឆ្នាំ២០២១ អង្គការសុខភាពពិភពលោក បានស្នើទៅប្រទេសចិន ដើម្បីចាប់ផ្តើមការស្រាវជ្រាវដំណាក់កាលទី២ ប៉ុន្តែចិនបានបដិសេធយ៉ាងដាច់អហង្ការលើករណីនេះ។ ទោះជាយ៉ាងណា អ្នកស្រាវជ្រាវមួយចំនួនលើកឡើងថា ប្រសិនបើចិនជឿជាក់ថា វីរុសកូវីដ-១៩ធ្លាយចេញពីមន្ទីរពិសោធន៍ ពួកគេគួរតែមានការបញ្ជាក់ពីការសិក្សានិងមានតម្លាភាព»។
អ្នកសង្គមវិទ្យាមួយរូប លោក D.Chuluunbat បានឱ្យដឹងផងដែរថា៖ «វាបង្កឱ្យមានការសង្ស័យជាច្រើនអំពីដើមកំណើតនៃវីរុសកូវីដ-១៩។ ជាឧទាហរណ៍ វិទ្យាស្ថានសិក្សាមេរោគវូហាន [Wuhan Institute of Virology] មានចម្ងាយធ្វើដំណើរប្រមាណជា៤០នាទី ពីផ្សារហ៊ូណាន។ មុនមានការផ្ទុះឡើងនៃវីរុសកូរ៉ូណា អ្នកស្រាវជ្រាវ៣នាក់នៃមន្ទីរពិសោធន៍ ត្រូវបានបញ្ជូនទៅកាន់មន្ទីរពេទ្យនៅខែវិច្ឆិកា ឆ្នាំ២០១៩ ដោយសារជំងឺធ្ងន់ធ្ងរ។ ចិនមិនយល់ស្របជាមួយនឹងការសិក្សាលម្អិត ហើយបដិសេធមិនធ្វើកិច្ចការងារនេះ ខណៈដែលខ្លួនលើកឡើងថា វីរុសនេះមានដើមកំណើតចេញពីសត្វ»។
លោកបន្តថា៖ «ទីក្រុងវូហាន គឺជាទីតាំងមួយក្នុងចំណោមទីតាំងជាច្រើនផ្សេងទៀតដែលមានកុបកម្មនិងបាតុកម្មកើតឡើង។ បន្ទាប់ពីកុបកម្មនៅហុងកុង ការតវ៉ាក៏កើតមានឡើងនៅទីក្រុងវូហានផងដែរ។ មនុស្សមួយចំនួនលើកឡើង ហើយគិតថា ចិនប្រហែលជាទប់ស្កាត់ការរីករាលដាលនៃការតវ៉ានៅហុងកុងទៅកាន់តំបន់ផ្សេងទៀត តាមរយៈចេតនាធ្វើឱ្យមេរោគធ្លាយចេញពីមន្ទីរពិសោធន៍ ដាក់ចេញឱ្យមានការធ្វើចត្តាឡីស័ក និងរបបនយោបាយនានា ដើម្បីបង្ក្រាបករណីនេះ»៕
