អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា បានបន្តបើកសវនាការនៅថ្ងៃទី១៩ ខែសីហា ឆ្នាំ២០២១ សម្រាប់ថ្ងៃទី៤ និងជាថ្ងៃចុងក្រោយនៃសវនាការលើបណ្តឹងសាទុក្ខក្នុងសំណុំរឿង ០០២/០២ ប្រឆាំងនឹងជនជាប់ចោទ លោក ខៀវ សំផន។
សវនាការនៅថ្ងៃព្រហស្បតិ៍នេះ នឹងផ្តោតជាសំខាន់លើសារណារបស់សហព្រះរាជអាជ្ញា សារណារបស់សហមេធាវីដើមបណ្តឹងរដ្ឋប្បវេណី ឬជនរងគ្រោះ សារណារបស់មេធាវីការពារក្តីលោក ខៀវ សំផន ការតាំងសំណួររបស់ចៅក្រមអង្គជំនុំជម្រះ ការលើកសារណាបដិសេធរបស់មេធាវីការពារក្តីលោក ខៀវ សំផន និងចុងក្រោយគឺការផ្តល់ឱកាសឱ្យលោក ខៀវ សំផន ថ្លែងទៅកាន់អង្គជំនុំជម្រះដោយផ្ទាល់។
សាលាក្តីខ្មែរក្រហមគ្រោងបើកសវនាការលើបណ្តឹងសាទុក្ខរបស់លោក ខៀវ សំផន នេះ រយៈពេល៤ថ្ងៃ ចាប់ពីថ្ងៃចន្ទ ទី១៦ ខែសីហា ដល់ថ្ងៃព្រហស្បតិ៍ ទី១៩ ខែសីហា និងត្រៀមបម្រុងមួយថ្ងៃទៀត គឺនៅថ្ងៃសុក្រ។
សវនាការនេះ គឺធ្វើឡើងតាមបណ្តឹងសាទុក្ខរបស់លោក ខៀវ សំផន អតីតប្រធានគណៈប្រធានរដ្ឋនៃរបបខ្មែរក្រហម ដើម្បីប្រឆាំងនឹងសាលក្រមរបស់អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា ដែលបានកាត់ទោសលោក និងលោក នួន ជា បងធំទី២ ឱ្យជាប់ពន្ធនាគារអស់មួយជីវិត កាលពីថ្ងៃទី១៦ ខែវិច្ឆិកា ឆ្នាំ២០១៨។ ប៉ុន្តែសំណុំរឿងរបស់លោក នួន ជា បានផុតរលត់ ក្រោយពីលោក នួន ជា បានទទួលមរណភាពនៅថ្ងៃទី៤ ខែសីហា ឆ្នាំ២០១៩។
លោក ខៀវ សំផន ដែលបច្ចុប្បន្នមានអាយុ៩១ឆ្នាំ គឺជាអតីតមេដឹកនាំខ្មែរក្រហមតែម្នាក់គត់ដែលនៅរស់រានមានជីវិតក្នុងចំណោមអតីតមេដឹកនាំជាន់ខ្ពស់៤រូប រួមមាន លោកអៀង សារី លោកស្រី អៀង ធីរិទ្ធ និងលោក នួន ជា ដែលសុទ្ធតែបានទទួលមរណភាពជាបន្តបន្ទាប់ នៅក្នុងអំឡុងពេលដំណើរការកាត់ទោសពីឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម នៅចន្លោះពីឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕
