អតីតមេដឹកនាំបក្សប្រឆាំង លោក សម រង្ស៊ី បានអំពាវទៅអ្នកគាំទ្រឱ្យបញ្ឈប់ការវាយប្រហារគ្នាជាលក្ខណៈបុគ្គល ហើយងាកមកគិតពីប្រយោជន៍ជាតិនូវអ្វីដែលលោកថាជាការពង្រឹងផ្ទៃក្នុងបក្ស ដើម្បីជំរុញដំណើរការប្រជាធិបតេយ្យនៅកម្ពុជា។
ការថ្លែងរបស់លោក សម រង្ស៊ី ធ្វើឡើងក្នុងពិធីជួបសំណេះសំណាលជាមួយសមាជិកសមាជិកាអតីតគណបក្សសង្រ្គោះជាតិប្រចាំនៅរដ្ឋ California សហរដ្ឋអាមេរិក នាថ្ងៃទី២៣ ខែសីហា ឆ្នាំ២០២១នេះ។
បើតាមវីដេអូឃ្លីបនៃពិធីជួបសំណេះសំណាលដែលបង្ហោះលើបណ្តាញសង្គមនោះ លោក សម រស្ស៊ី បានថ្លែងបែបប្រៀបប្រដូចមេដឹកនាំរដ្ឋប្រហារយោធានៅភូមា ទៅនឹងការដឹកនាំរបស់បក្សកាន់អំណាចនៅកម្ពុជា ដែលលោកថា បានរំលោភប្រព័ន្ធប្រជាធិបតេយ្យដូចគ្នា។
លោកអះអាងថា បញ្ហានេះ បណ្តាប្រទេសលោកសេរី រួមទាំងអាមេរិកផង កំពុងមានវិធានការ ដើម្បីស្តារប្រជាធិបតេយ្យក្នុងតំបន់អាស៊ានឡើងវិញ។
បន្ថែមពីនេះ លោក សម រង្ស៊ី ក៏បានអំពាវនាវដល់អ្នកគាំទ្រឱ្យឈប់គុំកួនគ្នានិងឈប់វាយប្រហារដែលនាំឱ្យមានការបែកបាក់អ្នកដែលមានជំហរដូចគ្នា ដោយសារតែការស្រឡាញ់បែបជ្រុលនិយម។
លោកថា៖ «ខ្ញុំនឹងខិតខំសម្របសម្រួល ប៉ុន្តែបងប្អូនសាម៉ីខ្លួនម្នាក់ៗត្រូវយល់ពីតួនាទីរបស់ខ្លួនចំពោះប្រទេសជាតិ ចំពោះប្រវត្តិសាស្ត្រ បើយើងយករឿងបុគ្គលរឿងកំប៉ិកកំប៉ុកមកបាំងមុខយើង អត់មានការទទួលខុសត្រូវទេ»។
លោក សម រង្ស៊ី គូសបញ្ជាក់ទៀតថា ការស្រឡាញ់ថ្នាក់ដឹកនាំបក្សដោយជ្រុលនិយម និងការបែកបាក់ផ្ទៃក្នុងរបស់ថ្នាក់ដឹកនាំបក្សនេះនៅក្រៅប្រទេស នឹងធ្វើឱ្យកម្លាំងប្រជាធិបតេយ្យចុះខ្សោយផង និងជំរុញឱ្យមានការសើចចំអកពីសំណាក់បក្សកាន់អំណាចផងដែរ។
លោកថា៖ «កាលៈទេសៈនេះ កុំបង្ហាញឱ្យមានការបែកបាក់! ហ៊ុន សែន សប្បាយ! ហ៊ុន សែន ទះដៃ! ហើយនៅក្នុងពោះគេសើចថា ហ្អ៎! គណបក្សសង្គ្រោះជាតិនៅតំបន់នេះឬតំបន់នោះបែកជាពីរក្រុម។ សួរថាបែករឿងអី បែករឿងស្អប់គ្នា […] សុំឱ្យចិត្តត្រជាក់ចិត្តទូលាយ អត់មានស្អប់បុគ្គលណាទេ ហើយធ្វើការជាមួយអ្នកដែលមានជំហរដូចគ្នា»។
អតីតតំណាងរាស្ត្រគណបក្សសង្គ្រោះជាតិដែលបានចេញមកបង្កើតបក្សថ្មី លោក អ៊ូ ច័ន្ទរ័ត្ន ចាត់ទុកសារអំពាវនាវរបស់លោក សម រង្ស៊ី ហាក់ចង់យឺតពេលបន្តិច។
លោកថា៖ «ខ្ញុំមានការរីករាយពេលឮថាគាត់ប្រកាសអ៊ីចឹង ហើយអបអរសាទរដែលលោកបានប្រកាសអ៊ីចឹង។ តាមពិត គួរតែធ្វើបែបហ្នឹងយូរណាស់ហើយ។ តែមិនអីទេ! ទោះបីយឺតបន្តិចក៏ដោយ តែវាល្អ វាចំណេញដល់សម្រាប់អ្នកប្រជាធិបតេយ្យ»។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន បានចាត់ទុកសាររបស់មេដឹកនាំអតីតបក្សប្រឆាំងនេះថា ជាការបំភ្លៃការពិតនៅកម្ពុជា។
លោកថា៖ «គណបក្សប្រជាជនឈ្នះឆ្នោតហើយកាន់អំណាចខ្លួនឯងតាមឆន្ទៈប្រជាពលរដ្ឋ ហើយមូលហេតុអីទៅប្រៀបធៀបគណបក្សប្រជាជន ទៅនឹងគណបក្សយោធាដែលភូមាប្លន់អំណាចរបស់គេពីអ្នកឈ្នះឆ្នោត?»
មួយវិញទៀត អ្នកនាំពាក្យរូបនេះយល់ថា ការអំពាវនាវឱ្យមានការរួបរួមអ្នកប្រជាធិបតេយ្យពីសំណាក់លោក សម រង្ស៊ី ទំនងជាស្ថិតក្នុងក្តីសុបិន្តដូចពេលមុនៗដែរ។
នាយកប្រតិបត្តិអង្គការផ្នត់គំនិត លោកបណ្ឌិត សេក សុជាតិ យល់ថា សារដែលលោក សម រង្ស៊ី លើកឡើងជាមួយអ្នកគាំទ្រនៅសហរដ្ឋអាមេរិកពេលនេះ អាចនឹងធ្វើឱ្យមានការរួបរួមអ្នកប្រជាធិបតេយ្យនៅកម្ពុជាបានច្រើនជាងមុខ និងប្រសើរជាងមិនព្រមធ្វើអ្វីសោះ ហើយបណ្តែតបណ្តោយឱ្យថ្នាក់ដឹកនាំបក្សនេះមួយចំនួនធ្វើការវាយប្រហារទៅលើបុគ្គលឬក៏ចោទប្រកាន់ក្រុមផ្សេងដែលមិនមាននិន្នាការដូចខ្លួននោះ។
អតីតគណបក្សសង្គ្រោះជាតិ ត្រូវបានតុលាការកំពូលរំលាយផាត់ចេញពីឆាកនយោបាយកាលពីចុងឆ្នាំ២០១៧ ខណៈអតីតមន្ត្រីចំនួន១១៨នាក់ត្រូវបានហាមធ្វើនយោបាយរយៈពេល៥ឆ្នាំចាប់ពីពេលនោះមក។
បន្ថែមពីនេះ អាសនៈទាំងអស់នៅក្នុងសភានិងនៅឃុំ-សង្កាត់ប្រហាក់ប្រហែលនឹងបក្សកាន់អំណាចដែរនោះ ត្រូវបានរឹបអូសយកទៅចែកឱ្យបក្សផ្សេងៗផងដែរ។
វិធានការនេះជំរុញឱ្យសហគមន៍អន្តរជាតិដែលនាំមុខគេដោយសហរដ្ឋអាមេរិកនិងសហភាពអឺរ៉ុប ទាមទារឱ្យកម្ពុជាស្តារប្រជាធិបតេយ្យឡើងវិញ៕
