លោកស្រី Michelle Bachelet ឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិ បានឱ្យដឹងនៅថ្ងៃអង្គារនេះថា លោកស្រីបានទទួលរបាយការណ៍គួរឱ្យទុកចិត្តមួយចំនួនអំពីការរំលោភបំពានធ្ងន់ធ្ងរដែលប្រព្រឹត្តដោយពួកតាលីបង់ នៅអាហ្វហ្គានីស្ថាន ដែលរួមមានទាំងការកាត់ទោសប្រហារជីវិតជនស៊ីវិល ការរឹតត្បិតលើស្ត្រី និងការតវ៉ានានាប្រឆាំងនឹងការគ្រប់គ្រងរបស់ពួកគេ។
ទាក់ទិននឹងករណីនេះ លោកស្រីបានជំរុញឱ្យក្រុមប្រឹក្សាសិទ្ធិមនុស្សរបស់អង្គការសហប្រជាជាតិ បើកកិច្ចប្រជុំបន្ទាន់មួយ តាមសំណើរបស់ប្រទេសប៉ាគីស្ថាន និងអង្គការសហប្រតិបត្តិការអ៊ីស្លាម (OIC) ដើម្បីបង្កើតយន្តការមួយក្នុងការឃ្លាំមើលសកម្មភាពក្រុមតាលីបង់ឱ្យបានដិតដល់។
ទីភ្នាក់ងារសារព័ត៌មាន Reuters បានស្រង់សម្ដីលោកស្រី Michelle Bachelet ដែលបានថ្លែងពីទីក្រុងហ្សឺណែវថា៖ «ការរឹតត្បិតជាមូលដ្ឋាននឹងក្លាយជាការអនុវត្តរបស់ក្រុមតាលីបង់ ចំពោះស្ត្រីនិងក្មេងស្រីទាំងឡាយ»៕
