អាជ្ញាធរខេត្តឱ្យដឹងថា ម្ចាស់អាជីវកម្មភោជនីយដ្ឋាន-អាហារដ្ឋាននៅខេត្តព្រះសីហនុ អាចស្នើសុំពីមន្ទីរទេសចរណ៍បើកឱ្យភ្ញៀវចូលទទួលទានអាហារនៅខាងក្នុងហាងបាន ក្រោយស្ថានភាពជំងឺកូវីដ-១៩បានធូរស្រាលនិងល្អប្រសើរវិញ។
សេចក្ដីជូនដំណឹងរបស់រដ្ឋបាលខេត្តព្រះសីហនុ ជូនចំពោះម្ចាស់អាជីវកម្មភោជនីយដ្ឋាន-អាហារដ្ឋាន ចុះថ្ងៃទី២៤ ខែសីហា ឆ្នាំ២០២១ បានលើកឡើងថា ម្ចាស់អាជីវកម្មដែលមានបំណងស្នើសុំអនុញ្ញាតឱ្យភ្ញៀវចូលទទួលទានអាហារនៅក្នុងភោជនីយដ្ឋាន-អាហារដ្ឋានបាន ដោយសារស្ថានភាពនៃការរីករាលដាលជំងឺកូវីដ-១៩នៅខេត្តព្រះសីហនុមានលក្ខណៈធូរស្រាល និងដើម្បីសម្រួលដល់សកម្មភាពអាជីវកម្មទាំងនោះឡើងវិញ។
លោក គង់ វិតាណៈ អភិបាលរងខេត្តព្រះសីហនុ មានប្រសាសន៍ប្រាប់ វីអូឌី បន្ថែម នៅថ្ងៃទី២៥ ខែសីហា ឆ្នាំ២០២១នេះ ថា បន្ទាប់ពីទទួលព័ត៌មាននេះ ម្ចាស់អាជីវកម្មអាចអនុវត្តតាមគោលការណ៍ក្នុងសេចក្តីជូនដំណឹងនេះ ដោយមានការគាំទ្រនិងណែនាំពីមន្ទីរទេសចរណ៍បន្ថែមទៀត។
លោក គង់ វិតាណៈ បន្តថា បន្ទាប់ពីម្ចាស់អាជីវកម្មដាក់ពាក្យស្នើរួចរាល់ អនុគណៈកម្មការនឹងចុះទៅត្រួតពិនិត្យមើលទៅតាមលក្ខខណ្ឌដែលបានកំណត់ មុននឹងបើកទទួលភ្ញៀវចូលទទួលទានវិញ។
លោកបន្តដូច្នេះថា៖ «ទាក់ទងទៅនឹងការការពារសុវត្ថិភាពប៉ុន្មានភាគរយនិងត្រឹមកម្រិតណាដែរ ខ្ញុំគិតថា ពីពេលនេះតទៅ ប្រហែលជាយើងនឹងរៀនរស់នៅក្នុងបរិបទថ្មីមួយជាមួយកូវីដនេះហើយ»។
លោកអភិបាលរងខេត្តព្រះសីហនុរូបនេះក៏បានបញ្ជាក់ថា វិធានសុខាភិបាលការពារជំងឺកូវីដ-១៩នឹងត្រូវបានដាក់នៅតាមភោជនីយដ្ឋាន ដោយលោកលើកឡើងថា នេះគឺជាគោលបំណងរបស់រដ្ឋបាលខេត្តព្រះសីហនុ។
សេចក្ដីជូនដំណឹងដដែលបានបន្ថែមថា ម្ចាស់អាជីវកម្មអាចដាក់ពាក្យស្នើសុំមកមន្ទីរទេសចរណ៍ដែលជាអនុប្រធានគណៈកម្មការទី៦ ដោយត្រូវបំពេញតាមគោលការណ៍មួយចំនួន រួមមាន ម្ចាស់អាជីវកម្ម អ្នកគ្រប់គ្រង និងបុគ្គលិកក្នុងហាង ត្រូវមានកាតបញ្ជាក់ការចាក់វ៉ាក់សាំងការពារជំងឺកូវីដ-១៩ ចំនួន០២លើករួច។ លើសពីនេះ ត្រូវយកសំណាកចំនួន២លើកក្នុងមួយខែ ដែលជាបន្ទុករបស់ម្ចាស់អាជីវកម្ម ហើយត្រូវគោរពឱ្យបានត្រឹមត្រូវតាមវិធានការ «៣កុំ ៣ការពារ» របស់លោកនាយករដ្ឋមន្ត្រី ហ៊ុន សែន និងវិធានការសុវត្ថិភាពទេសចរណ៍របស់ក្រសួងទេសចរណ៍ ព្រមទាំងវិធានការរបស់ក្រសួងសុខាភិបាលអំពីការទប់ស្កាត់ការរីករាលដាលនៃជំងឺកូវីដ-១៩ និងវិធានការមួយចំនួនទៀត។
ក្នុងសេចក្ដីជូនដំណឹងដដែលបញ្ជាក់ថា ក្នុងករណីម្ចាស់ភោជនីយដ្ឋាន-អាហារដ្ឋានណាមិនអនុវត្តតាមការណែនាំទេ រដ្ឋបាលខេត្តព្រះសីហនុនឹងមិនអនុញ្ញាតឱ្យអាជីវកម្មនោះបើកទទួលភ្ញៀវចូលទទួលទានអាហារនៅក្នុងហាងរបស់ខ្លួនឡើយ៕