ពលរដ្ឋមួយចំនួនដែលមានវិវាទដីធ្លីនៅសង្កាត់បឹងទំពុន១ ខណ្ឌមានជ័យ រាជធានីភ្នំពេញ បានចាប់ផ្តើមជួសជុលផ្ទះឡើងវិញដើម្បីបន្តរស់នៅ ក្រោយអាជ្ញាធរវាយកម្ទេចកាលពីខែមុន ខណៈពួកគេនៅតែប្រកាន់ជំហរមិនព្រមរុះរើទៅកន្លែងថ្មី។
ពលរដ្ឋម្នាក់ដែលត្រូវបានកម្លាំងអាជ្ញាធរចុះរុះរើផ្ទះរបស់ខ្លួនកាលពីថ្ងៃទី១៣ ខែសីហា លោក ផល ចំរើន បានលើកឡើងនៅថ្ងៃព្រហស្បតិ៍នេះថា លោកបានសម្រេចជួសជុលផ្ទះឡើងវិញនូវផ្នែកខ្លះ សម្រាប់ការស្នាក់នៅជាបណ្ដោះអាសន្នបន្តទៀត ខណៈលោកពុំមានលំនៅឋាននៅកន្លែងផ្សេង និងរំពឹងថា នឹងមានការដោះស្រាយពីសំណាក់អាជ្ញាធរនៅពេលខាងមុខ។
លោកបន្តថា៖ «សូមឱ្យរដ្ឋាភិបាល សុំដោះស្រាយជាគោលនយោបាយជូនប្រជាពលរដ្ឋ ដោយសារពួកខ្ញុំអត់បានទៅផ្អាកការអភិវឌ្ឍនោះទេ។ ហើយការអភិវឌ្ឍមួយ វាតែងតែមានផលប៉ះពាល់ហើយ កន្លែងណាក៏ដូចកន្លែងណាដែរ ជាទូទៅ។ តែយ៉ាងណា រដ្ឋាភិបាលគួរតែគិតគូរពិចារណាដល់ផលប៉ះពាល់របស់ប្រជាពលរដ្ឋដែរ ក្នុងកន្លែងណាមួយសមរម្យ ដើម្បីឱ្យគាត់មានលទ្ធភាពរស់នៅកន្លែងផ្សេង»។
លោកក៏បានស្នើដល់អាជ្ញាធរ ក៏ដូចជារដ្ឋាភិបាល ជួយពន្លឿនការដោះស្រាយបញ្ហាដីធ្លីនេះជូនពួកគាត់ឱ្យបានឆាប់ៗ ដើម្បីឱ្យប្រជាពលរដ្ឋមានឱកាសអាចប្រកបមុខរបរដូចដើមឡើងវិញ ដោយថា ដីនោះ ពួកគាត់រស់នៅតាំងពីឆ្នាំ១៩៩៥ ហើយកន្លងមក អាជ្ញាធរបានទទួលស្គាល់ រួមទាំងមានឯកសារស្នាក់នៅត្រឹមត្រូវទៀតផង។
ចំណែកពលរដ្ឋម្នាក់ទៀត លោក បាន ស៊ីចាន់ បានលើកឡើងថា ផ្ទះរបស់លោកបានរុះរើពាក់កណ្ដាលកាត់ជូនឱ្យទៅអាជ្ញាធរ ទោះបីជាមិនទាន់មានការព្រមព្រៀងពីសំណាក់អាជ្ញាធរក៏ដោយ ចំណែកពាក់កណ្ដាលទៀត លោកកំពុងតែជួសជុលឡើងវិញដើម្បីរស់នៅ។ លោកបន្តថា ចំពោះលោក ក៏ដូចជាប្រជាពលរដ្ឋដទៃ មិនទាន់មានគម្រោងទៅនៅកន្លែងផ្សេងនោះទេ ដោយរង់ចាំមើលការដោះស្រាយសំណងជាមុនសិន។
លោកលើកឡើងថា៖ «ខ្ញុំនៅចាំមើលគេដែរ! គេផ្សេងៗធ្វើម៉េច យើងធ្វើតាមតែគេអ៊ីចឹងទៅ ព្រោះអីខ្ញុំអត់មានសមត្ថភាពអ្វីស្នើសុំបានដូចបំណង។ អ៊ីចឹងយើងនៅចាំមើល បើគេធ្វើម៉េច ចាំធ្វើតាមគេអ៊ីចឹងទៅ»។
វីអូឌី មិនអាចសុំការឆ្លើយតបពីអភិបាលខណ្ឌមានជ័យ លោក ពេជ្រ កែវមុនី បានទេ នៅថ្ងៃទី២ ខែកញ្ញានេះ។ ប៉ុន្តែលោកធ្លាប់លើកឡើងថា អាជ្ញាធរមិនមានគោលការណ៍ណាមួយក្នុងការផ្ដល់ជាសំណងជូនប្រជាពលរដ្ឋទាំង១០គ្រួសារនោះទេ ព្រោះប្រជាពលរដ្ឋទាំងនោះរស់នៅលើដីរដ្ឋដោយខុសច្បាប់។
លោក ពេជ្រ កែវមុនី បញ្ជាក់ថា៖ «អត់មានសំណងទេ ដោយសារតែពួកគាត់នៅលើដីរដ្ឋ។ ដីរដ្ឋ អត់មានសំណងទេ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានលើកឡើងថា ការបន្តពន្យារពេលមិនព្រមដោះស្រាយជូនប្រជាពលរដ្ឋ មិនមែនជារឿងត្រឹមត្រូវនោះទេ ដែលករណីនេះនឹងអាចបង្កជាជម្លោះរវាងអាជ្ញាធរនិងប្រជាពលរដ្ឋ។
លោកលើកឡើងថា៖ «រឿងទាំងអស់ហ្នឹងជាធម្មតាទេ នៅពេលដែលដំណោះស្រាយមិនអាចទទួលយកបាន។ អ៊ីចឹងអាជ្ញាធរនិងក្រុមហ៊ុនគួរតែព្យាយាមដោះស្រាយបន្ថែមទៀត ដើម្បីបញ្ចប់ទៅលើបញ្ហាដីធ្លី ដើម្បីអាចទទួលយកទាំងអស់គ្នា។ យើងដឹងហើយ កិច្ចអភិវឌ្ឍន៍ គឺក្រុមហ៊ុនដើម្បីផលប្រយោជន៍ ហើយរដ្ឋត្រូវតែធានាផលប្រយោជន៍ កុំឱ្យប៉ះពាល់ដល់ជីវភាពរបស់ប្រជាពលរដ្ឋ ផ្ទះសម្បែង ដីធ្លី។ អាហ្នឹងរដ្ឋត្រូវតែមានការដោះស្រាយជូនពលរដ្ឋ នេះជាកាតព្វកិច្ចរបស់រដ្ឋ»។
កាលពីថ្ងៃទី១៣ ខែសីហា ឆ្នាំ២០២១ កម្លាំងអាជ្ញាធរខណ្ឌមានជ័យ ប្រមាណ១០០នាក់ បាននាំគ្នាចុះរុះរើផ្ទះរបស់ពលរដ្ឋប្រមាណ១០គ្រួសារ នៅសង្កាត់បឹងទំពុន១ ដោយថា ដីនោះជាដីរបស់រដ្ឋ ដែលត្រូវការយកមកអភិវឌ្ឍជាអាងស្តុកទឹក ប៉ុន្តែក្រោយមានការតវ៉ា ទើបអាជ្ញាធររុះរើបានតែផ្ទះចំនួន២ខ្នងប៉ុណ្ណោះ៕
