រដ្ឋាភិបាលកម្ពុជាបានសម្រេចបង្កើតឃុំ«យាយម៉ៅពេជ្រនិល» ដែលបែកចេញពីឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ និងឃុំមួយចំនួនទៀត មុនការបោះឆ្នោតក្រុមប្រឹក្សាឃុំ-សង្កាត់មកដល់ ខណៈអ្នកតាមដានសង្គមមិនស្វាគមន៍ឡើយ ប្រសិនបើការបង្កើតនោះក្នុងគោលបំណងដើម្បីតែចែកអំណាចគ្នា។
យោងតាមអនុក្រឹត្យរដ្ឋាភិបាល ចុះថ្ងៃទី២០ ខែសីហា ប៉ុន្តែទើបបានផ្សព្វផ្សាយនៅដើមសប្តាហ៍នេះ បានសម្រេចបង្កើតឃុំយាយម៉ៅពេជ្រនិល នៃស្រុកភ្នំស្រួច ខេត្តកំពង់ស្ពឺ ដោយកាត់យកភូមិចំនួន៩ ពីឃុំត្រែងត្រយឹង គឺភូមិទី៣ ភូមិទី៦ ភូមិចំការចេក ភូមិទឹកចេញ ភូមិកងមាស ភូមិវាលធំ ភូមិសម្បទានសែនជ័យ និងភូមិស្រល់។ ទីតាំងសាលាឃុំថ្មីនេះ គឺស្ថិតនៅក្នុងភូមិចំការចេក។
អនុក្រឹត្យដដែលបានចែងថា ការបង្កើតឃុំយាយម៉ៅពេជ្រនិល ត្រូវចូលជាធរមានសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់នាអាណត្តិទី៥ ស្របតាមខ្លឹមសារមាត្រា១៨ នៃច្បាប់ស្តីពីការគ្រប់គ្រងរដ្ឋបាលឃុំ-សង្កាត់។ ទោះជាយ៉ាងនេះក្តី ក្រុមប្រឹក្សាឃុំត្រែងត្រយឹង ត្រូវបន្តគ្រប់គ្រងភូមិចំនួន៩នោះជាបណ្តោះអាសន្នសិន រហូតដល់មានក្រុមប្រឹក្សាឃុំថ្មីមកជំនួស។
អភិបាលខេត្តកំពង់ស្ពឺ លោក វ៉ី សំណាង បានប្រាប់ វីអូឌី នៅថ្ងៃព្រហស្បតិ៍នេះថា ការបង្កើតឃុំយាយម៉ៅពេជ្រនិលនេះ ដើម្បីបង្ខិតសេវាថ្នាក់ឃុំឱ្យកាន់តែជិតនឹងប្រជាពលរដ្ឋ ដែលកន្លងមក ប្រជាពលរដ្ឋនៅតំបន់លោកយាយម៉ៅពេជ្រនិលនេះ នៅឆ្ងាយពីឃុំត្រែងត្រយឹងពេក។
លោកថា៖ «ដោយសារផ្ទៃដីឃុំហ្នឹងវាធំពេក ដល់អ៊ីចឹងការផ្តល់សេវាសាធារណៈដល់បងប្អូនពុកម៉ែមាមីងហ្នឹង វាពិបាក! ដល់យើងមកប្រមូលផ្តុំតែនៅត្រែងត្រយឹង ហើយដីនៅដល់លោកយាយណោះ! អ៊ីចឹងយើងត្រូវបង្កើតឃុំហ្នឹងមួយទៀត ដើម្បីផ្តល់សេវាឱ្យកាន់តែកៀកកិតជាមួយពុកម៉ែមាមីងបងប្អូនប្រជាពលរដ្ឋយើង»។
នាយកមជ្ឈមណ្ឌលប្រជាពលរដ្ឋ ដើម្បីសន្តិភាព និងអភិវឌ្ឍន៍ លោក យង់ គិមអេង បានស្វាគមន៍ ប្រសិនបើការបង្កើតឃុំសង្កាត់ថ្មីនេះធ្វើឡើងក្នុងគោលបំណងដើម្បីបង្ខិតសេវាជូនដល់ប្រជាពលរដ្ឋកាន់តែកៀកនោះ។ ប៉ុន្តែលោកនឹងមិនស្វាគមន៍ឡើយ ប្រសិនបើការបង្កើតឃុំ-សង្កាត់ថ្មីៗនេះ ដើម្បីតែការបែងចែកអំណាចគ្នានោះ។
លោកថា៖ «ការបង្កើតឃុំដើម្បីធ្វើឱ្យសេវាឃុំសង្កាត់ហ្នឹងវាកៀកទៅនឹងប្រជាពលរដ្ឋ អាហ្នឹងយើងស្វាគមន៍បាទ! ប៉ុន្តែបើការបង្កើតហ្នឹង វាគ្រាន់តែចែកអំណាច ដើម្បីការគ្រប់គ្រងគេ អាហ្នឹងយើងមិនស្វាគមន៍ទេ! អ៊ីចឹងបានខ្ញុំមើលទៅលើ ថាតើចំនួនប្រជាសាស្ត្រ និងចំនួនប្រជាពលរដ្ឋ និងចំនួនឃុំ ហេតុអីចំនួនប្រជាជននៅដដែលហើយឃុំមានការរីក? អាហ្នឹងជាចម្ងល់»។
ចំណែកលោក ប៉ិច ពិសី នាយកប្រតិបត្តិអង្គការតម្លាភាពកម្ពុជា ថ្លែងថា ការង្កើតឃុំបន្ថែមអាចជាការឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋនៅតាមតំបន់នីមួយៗ។
លោកបន្តថា ការបង្កើតរដ្ឋបាលថ្នាក់ក្រោមជាតិមិនជាបញ្ហានោះទេ ប៉ុន្តែអ្វីដែលសំខាន់ គឺប្រសិទ្ធភាពនិងលទ្ធផលនៃការងាររបស់អាជ្ញាធរថ្នាក់ក្រោមជាតិ ជាពិសេសថ្នាក់ភូមិឃុំ ធ្វើយ៉ាងណាដើម្បីបម្រើផលប្រយោជន៍និងតម្រូវការជាក់ស្តែងរបស់ប្រជាពលរដ្ឋ កុំឱ្យមានអំពើពុករលួយក្នុងតំបន់ ព្រោះប្រជាពលរដ្ឋកំពុងជួបការលំបាកច្រើនផ្នែកហិរញ្ញវត្ថុ។
លោក ប៉ិច ពិសី មានប្រសាសន៍ថា៖ «ខ្ញុំគិតថា មិនបញ្ហានោះទេក្នុងការបង្កើតអាជ្ញាធរថ្នាក់ក្រោមជាតិ ដើម្បីឱ្យពួកគាត់ធ្វើការជាមួយពលរដ្ឋផ្ទាល់។ តែអ្វីដែលយើងចង់លើកទឹកចិត្តបន្ថែមទៀតនោះ គឺការជំរុញចរន្តសាធារណៈនៅថ្នាក់ក្រោមជាតិឱ្យល្អប្រសើរ ដើម្បីបម្រើប្រយោជន៍ដល់ប្រជាពលរដ្ឋនៅក្នុងតំបន់»។
យ៉ាងហោចណាស់ មានឃុំចំនួន៦ ត្រូវបានរដ្ឋាភិបាលសម្រេចបង្កើតឡើងជាបន្តបន្ទាប់ មុនការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ខាងមុខនេះ ដែលធ្វើឱ្យចំនួនឃុំ-សង្កាត់ បានកើនឡើងពី១ ៦៤៦ឃុំ-សង្កាត់នៅឆ្នាំ២០២០ ដល់១ ៦៥២ឃុំ-សង្កាត់ នៅឆ្នាំ២០២១នេះ។ ឃុំសង្កាត់ទាំង៦នោះ រួមមាន ឃុំយាយម៉ៅពេជ្រនិល ក្នុងខេត្តកំពង់ស្ពឺ, សង្កាត់ចំនួន២ នៅខេត្តបន្ទាយមានជ័យ, ឃុំមួយនៅស្រុកបវេល ខេត្តបាត់ដំបង រួមទាំងឃុំមួយទៀតស្ថិតនៅក្នុងខេត្តក្រចេះ។
លោក សក់ សេដ្ឋា រដ្ឋមន្ត្រីស្តីទីក្រសួងមហាផ្ទៃ បានថ្លែងថា គោលបំណងនៃការបង្កើតឃុំ-សង្កាត់ថ្មីៗនេះ ដោយផ្អែកលើប្រជាសាស្ត្រនៅក្នុងខេត្តនីមួយៗមានការកើនឡើង។ លោកបានច្រានចោលចំពោះការរិះគន់ថា ការបង្កើតឃុំ-សង្កាត់ថ្មីនេះ គឺដើម្បីគ្រាន់តែចែកអំណាចគ្នានិងខ្ជះខ្ជាយថវិកាជាតិ។
លោក សក់ សេដ្ឋា បានបដិសេធយ៉ាងដូច្នេះថា៖ «អត់ទេ! វាមិនអ៊ីចឹងទេ! វាធាតុពិតទៅ នៅស្រុកយើង អ្នកដែលមានយោបល់អ៊ីចឹង ទាល់តែគាត់សិក្សាពីស្រុកគេទៀតដែរ។ ការបង្កើតឃុំ បង្កើតស្រុកនៅស្រុកយើង បង្កើតតិចមែនទែន ប្រាំ[ទៅ]ប្រាំមួយឆ្នាំ ដោយសារកំណើនប្រជាជន ការតាំងទីលំនៅថ្មីមានការប្រែប្រួល ហើយការបង្កើតបួន[ឬ]ប្រាំឃុំ មានទៅចុះសោហ៊ុយអី! សំខាន់ប្រសិទ្ធភាពនៃការអភិវឌ្ឍ ការគ្រប់គ្រងសន្តិសុខ និងការផ្តល់សេវាផ្សេងៗទៅដល់ប្រជាជនដែលយើងបានគិតគូរហ្មត់ចត់ណាស់»។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៦ ខែសីហា ក៏បានចេញអនុក្រឹត្យមួយដោយបានកំណត់ចំនួនសមាជិកក្រុមប្រឹក្សាឃុំ-សង្កាត់ សម្រាប់អាណត្តិទី៥ ដោយក្នុងមួយឃុំ/សង្កាត់ មានសមាជិកចន្លោះពី៥ ទៅ១១នាក់។ ការកំណត់ចំនួនសមាជិកក្រុមប្រឹក្សាឃុំ-សង្កាត់អាណត្តិទី៥នេះ បានធ្វើឡើងខណៈការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ នឹងធ្វើឡើងនៅថ្ងៃអាទិត្យ ទី៥ ខែមិថុនា ឆ្នាំ២០២២ខាងមុខនេះ៕