ពលរដ្ឋមួយចំនួននៅស្រុកបទុមសាគរ ខេត្តកោះកុង ចោទអាជ្ញាធរពាក់ព័ន្ធថាបានកាប់បំផ្លាញដំណាំរបស់ពួកគេអស់ជាច្រើនហិកតា ក្រោយពួកគាត់អះអាងថា បានចូលអាស្រ័យផលលើដីនោះជាង១០ឆ្នាំមកហើយ។
លោក ទ្រី ទូច រស់នៅភូមិចម្លងគោ ឃុំថ្មស ស្រុកបទុមសាគរ ប្រាប់ វីអូឌី នៅថ្ងៃអង្គារនេះថា គ្រួសាររបស់គាត់មានដីទំហំ១២ហិកតា ពេញទៅដោយដំណាំស្វាយចន្ទី ត្រូវបានអាជ្ញាធរកាប់បំផ្លាញអស់៦ហិកតាកាលពីសប្តាហ៍មុន។ លោកបន្តថា ក្រៅពីដំណាំរបស់គាត់ ដំណាំនិងផ្ទះរបស់ពលរដ្ឋមួយចំនួនទៀតក៏រងការបំផ្លាញផងដែរ ដោយអាជ្ញាធរចោទពួកគាត់ថាបានចូលទៅអាស្រ័យផលលើដី«ឧទ្យានជាតិបទុមសាគរ»ដោយខុសច្បាប់។
ពលរដ្ឋរូបនេះអះអាងថា រូបលោកបានចូលទៅអាស្រ័យផលលើដីនោះចាប់តាំងពីឆ្នាំ២០០៦មក ដោយពុំមានការហាមឃាត់ពីសំណាក់អាជ្ញាធរឡើយ ប៉ុន្តែនៅឆ្នាំ២០២១នេះ ស្រាប់តែថា ពួកគាត់ទៅដាំដំណាំលើដីតំបន់ការពារទៅវិញ។
លោកបន្ថែមថា៖ «មួយឃុំហ្នឹង ពលរដ្ឋដែលរងគ្រោះប្រហែល១០០គ្រួសារ [អាជ្ញាធរ]កាប់បំផ្លាញរបស់គ្នាអស់ ហើយចោទគ្នាថាអនាធិបតេយ្យទៀត។ សម្តេចធ្លាប់មានប្រសាសន៍ថា បើប្រជាជនរស់នៅអាស្រ័យផលជាក់ស្តែង៥ទៅ១០ឆ្នាំ ឱ្យអាជ្ញាធរកាត់ឆ្វៀលឱ្យប្រជាជន តែអាជ្ញាធរគេមិនកាត់ឱ្យ គេបែរជាកាប់បំផ្លាញដំណាំប្រជាជនទៅវិញ»។
ពលរដ្ឋនៅឃុំថ្មសម្នាក់ទៀត អ្នកស្រី វិត ជ្រាង និយាយថា គ្រួសាររបស់គាត់បានកាន់កាប់និងអាស្រ័យផលលើដីទំហំ៥ហិកតា អស់រយៈពេល១៥ឆ្នាំមកហើយ បច្ចុប្បន្នមានដាំដំណាំហូបផ្លែដូចជា ខ្នុរ ស្វាយ ដំឡូង ស្វាយចន្ទី និងដំណាំផ្សេងទៀត។ អ្នកស្រីកំពុងមានក្តីបារម្ភពីការបាត់បង់ផលដំណាំរបស់ខ្លួន ខណៈផ្ទះនិងដំណាំចម្ការរបស់អ្នកភូមិក្បែរនោះ ត្រូវបានអាជ្ញាធរកាប់បំផ្លាញរួចអស់ទៅហើយ។
អ្នកស្រីបន្ថែមថា៖ «ខ្ញុំភ័យខ្លាំងណាស់ ព្រោះអីខ្ញុំកូនច្រើន គ្មានដីអីណាផ្សេងទៀតទេ! ហើយម៉្យាងទៀត ដីយើងនេះកណ្តាលគេទៀត ហើយគេសងខាង គេកាប់អស់ហើយ។ អ៊ីចឹងរឿងអីយើងនៅកណ្តាលហ្នឹងនៅសល់? ចំពោះរឿងនេះ ខ្ញុំសូមអំពាវនាវដល់សម្តេចជួយដល់ប្រជាពលរដ្ឋនៅតំបន់នេះផង ពីព្រោះប្រជាពលរដ្ឋនៅតំបន់នេះក្រីក្រខ្លាំងណាស់»។
លោក ឡាំ ឆេន អាយុ៦៨ឆ្នាំ រស់នៅឃុំថ្មស អះអាងថា ដំណាំហូបផ្លែរបស់គាត់ដែលដាំលើដីទំហំ៧ហិកតា ត្រូវបានអាជ្ញាធរកាប់បំផ្លាញអស់៤ហិកតា ដែលធ្វើឱ្យគ្រួសារលោកបានខាតប្រាក់អស់រាប់ពាន់ដុល្លារ។
អភិបាលស្រុកបទុមសាគរ លោក ហាក់ ឡេង សុំមិនអធិប្បាយពាក់ព័ន្ធករណីនេះទេ ដោយបង្វែរឱ្យទៅសួរមន្ទីរបរិស្ថានខេត្តកោះកុងវិញ។
លោកនិយាយថា៖ «សូមសួរមន្ទីរបរិស្ថានវិញ ពីព្រោះគាត់ជាអ្នកដឹកនាំធ្វើកិច្ចការហ្នឹង ពីព្រោះដីហ្នឹងជាដីតំបន់ឧទ្យានជាតិដែលការពារដោយក្រសួងនិងមន្ទីរបរិស្ថាន អាជ្ញាធរគ្រាន់តែជាការចូលរួមទេ»។
ប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី ប្រាប់ វីអូឌី យ៉ាងខ្លីថា ករណីអាជ្ញាធរចុះកាប់ដំណាំពលរដ្ឋនោះ ដោយសារពួកគេអាស្រ័យផលក្នុងតំបន់ឧទ្យានជាតិបទុមសាគរ។
លោកថា៖ «ដោយពួកគាត់ចូលអាស្រ័យផលក្នុងតំបន់ឧទ្យានជាតិ។ ឥលូវខ្ញុំកំពុងប្រជុំជាមួយខេត្តជុំវិញរឿងនេះ ការកាត់ឆ្វៀលឬដោះស្រាយយ៉ាងណានោះ គឺរដ្ឋាភិបាលជាអ្នកសម្រេច ខ្ញុំគ្មានសិទ្ធិនោះទេ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន មានប្រសាសន៍ថា ការចុះអនុវត្តកាប់បំផ្លាញដំណាំពលរដ្ឋហាក់មានស្តង់ដារពីរ ដោយលោកថា ក្នុងតំបន់ឧទ្យានជាតិបទុមសាគរនេះក៏មានដីរបស់អ្នកមានលុយមានអំណាចនៅក្នុងនោះដែរ ប៉ុន្តែអាជ្ញាធរមិនបានទៅកាប់បំផ្លាញដូចដំណាំប្រជាពលរដ្ឋធម្មតាឡើយ។
មន្ត្រីសិទ្ធិមនុស្សរូបនេះបានស្នើដល់អាជ្ញាធរឱ្យពិចារណាឡើងវិញក្នុងការដោះស្រាយជូនពលរដ្ឋ ខណៈដែលពួកគាត់បានរស់នៅនិងអាស្រ័យផលយូរឆ្នាំទៅហើយ ដើម្បីចៀសវាងការរិះគន់ពីសំណាក់មហាជននិងផលប៉ះពាល់ប្រជាពលរដ្ឋ។
លោកបន្ថែមថា៖ «អាជ្ញាធរគួរតែធ្វើការស៊ើបអង្កេតឱ្យបានច្បាស់លាស់ តើប្រជាពលរដ្ឋហ្នឹងមកពីណាឬក៏ប្រជាពលរដ្ឋនៅក្នុងភូមិស្ថានដែលកំពុងខ្វះខាតដីទេ? ក្នុងលក្ខខណ្ឌផលដំណាំរបស់ពួកគាត់ហ្នឹងមានដើមធំៗទៅហើយ ហើយយើងទៅកាប់បំផ្លាញ ហើយភាគីម្ខាងទៀតដែលមានលុយមានអំណាច មិនត្រូវបានបំផ្លាញ ឃើញថា ការអនុវត្តច្បាប់ហ្នឹងវាមិនមានភាពស្មើគា្ន។ អ៊ីចឹងវាប្រាកដណាស់ឱ្យមានការរិះគន់ទៅលើអាជ្ញាធរ ហើយរូបភាពហ្នឹងវាអាក្រក់មើល ហើយវាក៏ប៉ះពាល់ដល់កិត្តិយសរបស់អាជ្ញាធរខេត្តផងដែរ»៕
