ពលរដ្ឋមានជម្លោះដីធ្លីជាមួយគម្រោងអភិវឌ្ឍន៍ព្រលានយន្តហោះភ្នំពេញថ្មី នៅស្រុកកណ្ដាលស្ទឹង ខេត្តកណ្ដាល ព្រមានជាថ្មីថានឹងបិទផ្លូវជាតិលេខ២ ប្រសិនបើអាជ្ញាធរមិនព្រមដោះស្រាយជូនពួកគេឱ្យបានត្រឹមត្រូវ ហើយចេះតែធ្វើសកម្មភាពបំពានលើដីមានជម្លោះដោយមិនទាន់មានសំណងសមរម្យ។
ការព្រមាននេះ ក្រោយពលរដ្ឋជាច្រើននាក់បានជួបជុំគ្នានិងបានធ្វើសន្និសីទកាសែតមួយកាលពីថ្ងៃទី៤ ខែកញ្ញា ដោយប្រឆាំងនឹងលិខិតរបស់អភិបាលខេត្តដែលបានប្រកាសថានឹងបិទទំនប់ទឹក ហើយកាយផ្ដាច់ផ្លូវពលរដ្ឋធ្លាប់ឆ្លងកាត់ទៅកាន់ស្រែរបស់ពួកគេកន្លងមក។
លោក សួង ពៅ ពលរដ្ឋមានជម្លោះដីធ្លីជាមួយនឹងគម្រោងសាងសង់ព្រលានយន្តហោះអន្តរជាតិភ្នំពេញថ្មី បានលើកឡើងថា នៅព្រឹកថ្ងៃទី៦ ខែកញ្ញានេះ ប្រជាពលរដ្ឋមានគម្រោងបិទផ្លូវជាតិលេខ២ ប៉ុន្តែអភិបាលស្រុកខេត្តកណ្ដាលបានស្នើពលរដ្ឋកុំឱ្យមានការប្រមូលម្ដុំ ដោយហេតុផលថា ថ្ងៃនេះមានការប្រជុំជាមួយនឹងខេត្ត ហើយសន្យាថានឹងលើកសំណើទាំងអស់ទៅដល់ខេត្តរកដំណោះស្រាយ។
លោកថា៖ «តាមប្រជាពលរដ្ឋនិយាយថា បើសិនជាអត់មានដំណោះស្រាយទេ ពួកគាត់នឹងធ្វើអ៊ីចឹង [បន្តតវ៉ា] អាចឈានទៅដល់ការប្រមូលម្ដុំដើម្បីតវ៉ាហ្នឹង។ អាហ្នឹងជាការលើកឡើងរបស់ប្រជាពលរដ្ឋ»។
ចំណែកពលរដ្ឋមានជម្លោះដីធ្លីម្នាក់ទៀត អ្នកស្រី ឃឹម ម៉ាលី នៅភូមិកំពុងតាឡុង ឃុំបឹងខ្យាង បានលើកឡើងថា ប្រជាពលរដ្ឋមិនអាចឈរមើលនូវអ្វីដែលអាជ្ញាធរបានធ្វើមកលើពួកគេទេ ដោយថា អាជ្ញាធរតែងតែនិយាយដោះសារមិនចង់រកដំណោះស្រាយសមរម្យជូនពួកគាត់ឡើយ។
អ្នកស្រីស្នើថា៖ «ខ្ញុំចង់ឱ្យខាងអាជ្ញាធរ ទាំងលោកអភិបាលស្រុក និងអភិបាលខេត្ត កុំឱ្យគាត់គិតតែពីព្រលានយន្តហោះ ក្រុមហ៊ុនគាត់ពេក ឱ្យបើកភ្នែកមើលប្រជារាស្រ្តផង។ គិតតែខ្លាចលិចព្រលាន ចុះស្រូវប្រជាពលរដ្ឋលិចចុងអស់នេះ តើប្រជារាស្រ្តសង្ឃឹមអីគេ? ពួកខ្ញុំសង្ឃឹមតែលើស្រែ ហើយពួកគាត់គិតសង្ឃឹមតែលើព្រលាន គាត់ចង់ឱ្យប្រជាពលរដ្ឋទាំងអស់នេះងាប់មែន? […] បើសិនជាគាត់ចង់ផ្ដាច់ផ្លូវ ពួកខ្ញុំអត់ឃាត់ទេ សុំឱ្យគាត់ [អាជ្ញាធរ] ដោះស្រាយជូនប្រជាពលរដ្ឋឱ្យចប់មក»។
អ្នកស្រីអះអាងថា ប្រជាពលរដ្ឋនៅតែបន្តការទាមទារ បើសិនជាអាជ្ញាធរមិនព្រមយកចិត្តទុកដាក់រកដំណោះស្រាយជូនពួកគេទេ។ អ្នកស្រីមើលឃើញថា ដំណោះស្រាយរបស់អាជ្ញាធរកន្លងមកដែលផ្តល់សំណងជូនប្រជាពលរដ្ឋក្នុងមួយម៉ែត្រការ៉េតម្លៃ៨ដុល្លារនោះ ជាការប្លន់ដីរបស់អ្នកភូមិក្នុងរូបភាពមួយដែលគេមើលឃើញថាជាទង្វើស្របច្បាប់តែប៉ុណ្ណោះ។
ចំណែកអភិបាលស្រុកកណ្ដាលស្ទឹង លោក អ៊ូច សៅរឿន បានលើកឡើងថា ចំពោះក្ដីបារម្ភរបស់ពលរដ្ឋពាក់ព័ន្ធការបិទទំនប់ទឹក ខាងអាជ្ញាធរកំពុងតែចុះដោះស្រាយបានត្រឹមត្រូវហើយ ដោយអាជ្ញាធរមិនទុកឱ្យប្រជាពលរដ្ឋស្លាប់នោះទេ។ ចំណែកការផ្ដាច់ផ្លូវ ឬការទាមទារសំណងតាមការចង់បានកន្លងមករបស់ពលរដ្ឋ គឺអនុវត្តតាមគោលការណ៍របស់រដ្ឋាភិបាល គ្មានការខុសច្បាប់អ្វីនោះទេ បើពលរដ្ឋចង់បន្តទាមទារ នោះជារឿងរបស់ពួកគាត់។
លោកថា៖ «រឿងលុប រឿងអ្វីនោះ ខាងស្រុកអនុវត្តតាមគោលការណ៍ខេត្ត។ តែចេញមក គេអនុវត្តហើយ មានចំណុចណាដែលបញ្ជាក់ថាការធ្វើបែបនេះខុស? ព្រោះអាហ្នឹងជាទ្រព្យរដ្ឋ រដ្ឋមានសិទ្ធិចាត់ចែងតើ!»
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត បានលើកឡើងថា ការបន្តពន្យារពេលមិនព្រមរកដំណោះស្រាយជូនដល់ប្រជាពលរដ្ឋ មិនមានជារឿងដែលត្រឹមត្រូវនោះទេ ហើយអាចជាការបង្កជម្លោះរវាងអាជ្ញាធរនិងប្រជាពលរដ្ឋ។ លោកបន្តថា បញ្ហាទាំងនេះអាចធ្វើឱ្យប្រជាពលរដ្ឋកាន់តែមិនសប្បាយចិត្តកាន់តែខ្លាំង។
លោកលើកឡើងថា៖ «រឿងទាំងអស់ហ្នឹងជាធម្មតាទេ នៅពេលដែលដំណោះស្រាយមិនទទួលយកបាន អ៊ីចឹងអាជ្ញាធរនិងក្រុមហ៊ុនគួរតែព្យាយាមដោះស្រាយបន្ថែមទៀត ដើម្បីបញ្ចាប់ទៅលើបញ្ហាដីធ្លី ដើម្បីអាចទទួលយកទាំងអស់គ្នា។ យើងដឹងហើយកិច្ចអភិវឌ្ឍន៍គឺក្រុមហ៊ុនដើម្បីផលប្រយោជន៍ ហើយរដ្ឋត្រូវតែធានាផលប្រយោជន៍ កុំឱ្យប៉ះពាល់ដល់ជីវភាពរបស់ប្រជាពលរដ្ឋ ផ្ទះសម្បែង ដីធ្លី អាហ្នឹងរដ្ឋត្រូវតែមានការដោះស្រាយជូនពលរដ្ឋ»។
ប្រជាពលរដ្ឋជិត១០០នាក់ កាលពីថ្ងៃទី០៤ ខែកញ្ញា បានប្រមូលម្ដុំគ្នាធ្វើសន្និសីទកាសែតទាមទារឱ្យអាជ្ញាធរ ក៏ដូចជារដ្ឋាភិបាលត្រូវរកដំណោះស្រាយជូនពួកគេ។ លើសពីនេះ ពលរដ្ឋស្នើឱ្យលុបផ្លូវដែលអាជ្ញាធរបានសហការជាមួយនឹងក្រុមហ៊ុនព្រលានយន្តហោះថ្មី (OCIC) លួចកាយផ្ដាច់ទាំងយប់កាលពីពេលថ្មីៗនេះ ដោយមិនបានប្រាប់ពលរដ្ឋជាមុន។ ជាមួយគ្នានេះ ពលរដ្ឋនៅតែប្រកាន់ជំហរថានឹងបន្តទាមទារទ្រង់ទ្រាយធំ បើសិនជាមិនព្រមដោះស្រាយជូនពួកគេ៕
