ទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី នឹងធ្វើទស្សនកិច្ចនៅប្រទេសកម្ពុជា សិង្ហបុរី វៀតណាម និងកូរ៉េខាងត្បូង ចាប់ពីថ្ងៃទី១០ ដល់ថ្ងៃទី១៥ ខែកញ្ញា ឆ្នាំ២០២១នេះ។ នេះបើតាមការផ្សព្វផ្សាយរបស់ទូរទស្សន៍រដ្ឋចិន CGTN។
អ្នកនាំពាក្យក្រសួងការបរទេសចិន លោក Wang Wenbin បានលើកឡើងនៅក្នុងសន្និសីទសារព័ត៌មាននាទីក្រុងប៉េកាំងថា ក្នុងអំឡុងពេលដំណើរទស្សនកិច្ច លោក វ៉ាង យី នឹងធ្វើការទំនាក់ទំនងជាយុទ្ធសាស្ត្រស៊ីជម្រៅជាមួយគ្រប់ភាគី ដើម្បីបង្កើនកិច្ចសហប្រតិបត្តិការ «ខ្សែក្រវាត់ និងផ្លូវ» និងជំរុញការកសាងសហគមន៍ដែលមានអនាគតរួមគ្នាសម្រាប់មនុស្សជាតិ។
លោកបានបន្ថែមថា ប្រទេសទាំង៤ ដែលរដ្ឋមន្ត្រីការបរទេសរូបនេះគ្រោងបំពេញទស្សនកិច្ចនេះ សុទ្ធសឹងជាប្រទេសមានភាពជិតស្និទ្ធនឹងភូមិសាស្ត្ររបស់ប្រទេសចិន ហើយដំណើររបស់លោក វ៉ាង នឹងជជែកអំពីភាពស្មោះត្រង់របស់ចិន និងសារៈសំខាន់ដែលខ្លួនបានភ្ជាប់ក្នុងការពង្រឹងទំនាក់ទំនងមិត្តភាពនិងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកកាន់តែស៊ីជម្រៅ។
លោកមានប្រសាសន៍ថា៖ «ប្រទេសចិនបានត្រៀមខ្លួនរួចជាស្រេច ដើម្បីធ្វើការជាមួយប្រទេសទាំង៤នេះ ដើម្បីសម្រេចបាននូវសមិទ្ធផលថ្មីៗនៅក្នុងទំនាក់ទំនងទ្វេភាគី និងរួមគ្នាការពារពហុភាគីនិយម និងយុត្តិធម៌អន្តរជាតិ និងយុត្តិធម៌ ដើម្បីបញ្ចូលថាមពលវិជ្ជមានបន្ថែមទៀត ដើម្បីលើកកម្ពស់សន្តិភាព ស្ថិរភាព វិបុលភាព និងការអភិវឌ្ឍនៅក្នុងតំបន់និងពិភពលោកទាំងមូល»។
អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា លោក កុយ គួង មានប្រសាសន៍នៅថ្ងៃពុធនេះថា ជុំវិញដំណើរទស្សនកិច្ចរបស់រដ្ឋមន្ត្រីការបរទេសចិន លោក វ៉ាង យី មកកម្ពុជា គឺកំពុងស្ថិតក្នុងការរង់ចាំពីសេចក្ដីប្រកាសជាផ្លូវការ ដែលលោកនៅពុំទាន់អាចបញ្ជាក់ព័ត៌មានលម្អិតជូនបាននៅឡើយទេ៕
