អ្នកនាំពាក្យរដ្ឋាភិបាល និងរបាយការណ៍ប្រព័ន្ធផ្សព្វផ្សាយ បានឱ្យដឹងថា ហេតុការណ៍អគ្គិភ័យឆាបឆេះពន្ធនាគារមួយនៅក្នុងខេត្ត Banten ប្រទេសឥណ្ឌូនេស៊ី នៅយប់ទៀបភ្លឺថ្ងៃពុធនេះ បានសម្លាប់មនុស្សយ៉ាងតិចណាស់៤០នាក់ ខណៈមនុស្សរាប់សិបនាក់ផ្សេងទៀតរងរបួស។
ទីភ្នាក់ងារសារព័ត៌មាន Reuters បានស្រង់សម្ដីអ្នកនាំពាក្យអគ្គនាយកដ្ឋានពន្ធនាគារ លោកស្រី Rika Aprianti មកចុះផ្សាយថា អគ្គិភ័យដែលបានឆាបឆេះនៅម៉ោង១ទៀបភ្លឺដល់ម៉ោង២ទៀបភ្លឺថ្ងៃពុធនេះ នៅក្នុងប្លុក C នៃពន្ធនាគារ Tangerang ត្រូវបានពន្លត់ហើយ ខណៈអាជ្ញាធរបច្ចុប្បន្នកំពុងបន្តកិច្ចការជម្លៀសមនុស្សនិងរបស់របរមួយចំនួនចេញពីកន្លែងនេះ។
លោកស្រីថា៖ «មូលហេតុនៃអគ្គិភ័យនេះកំពុងតែស្ថិតនៅក្រោមការស៊ើបអង្កេតនៅឡើយ»។
លោកស្រីបន្តថា ប្លុកនេះគឺជាទីតាំងសម្រាប់ដាក់អ្នកទោសដែលត្រូវបានឃុំខ្លួនពីបទពាក់ព័ន្ធនឹងគ្រឿងញៀន មានសមត្ថភាពផ្ទុកមនុស្សបានចំនួន១២២នាក់។
ទោះជាយ៉ាងណា លោកស្រីមិនបានបញ្ជាក់ថាតើមានមនុស្សប៉ុន្មាននាក់នៅក្នុងទីតាំងនេះ នៅពេលដែលអគ្គិភ័យឆាបឆេះនោះទេ ដោយលោកស្រីគ្រាន់តែលើកឡើងថា ទីតាំងនេះមានមនុស្សច្រើន។
យោងតាមទិន្នន័យរបស់រដ្ឋាភិបាល គិតត្រឹមខែកញ្ញា ពន្ធនាគារនៅក្នុងទីក្រុង Tangerang មួយនេះ បច្ចុប្បន្នមានអ្នកទោសសរុបជាង២ ០០០នាក់ ដែលលើសពីសមត្ថភាពផ្ទុករបស់ខ្លួនដែលកំណត់ត្រឹមចំនួន៦០០នាក់។
ទាក់ទិននឹងករណីគ្រោះអគ្គិភ័យនេះ អ្នកនាំពាក្យប៉ូលិសឥណ្ឌូណេស៊ី លោក Yusri Yunus បានថ្លែងប្រាប់ទូរទស្សន៍ក្នុងប្រទេសមួយថា៖ «ការសង្ស័យក្នុងជំហានដំបូងនៃអគ្គិភ័យនេះ គឺអាចបណ្តាលមកពីបញ្ហាឆ្លងចរន្តអគ្គិសនី»។
លោកបន្តថា មនុស្សចំនួន៧៣នាក់ក៏បានរងរបួសស្រាលនៅក្នុងហេតុការណ៍នេះផងដែរ៕
