ចៅក្រមសាលាដំបូងរាជធានីភ្នំពេញ សម្រេចផ្ដន្ទាទោសដោយកំបាំងមុខលើអតីតសកម្មជនបក្សប្រឆាំង៧រូបដាក់ពន្ធនាគារម្នាក់ៗចំនួន១៨ខែ និងពិន័យប្រាក់២លានរៀលដូចគ្នា ក្រោមបទចោទប្រកាន់ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។
ការប្រកាសសាលក្រមរបស់សាលាដំបូងរាជធានីភ្នំពេញ ធ្វើឡើងបន្ទាប់ពីចៅក្រមជំនុំជម្រះបានបើកសវនាការកំបាំងមុខកាលពីថ្ងៃទី២៦ ខែសីហា ឆ្នាំ២០២១ ដោយមិនមានវត្តមានអតីតសកម្មជនបក្សប្រឆាំង និងមេធាវីចូលរួមទេ។ ប៉ុន្តែចៅក្រមបានសួរដេញដោលប្រធានការិយាល័យស៊ើបអង្កេតនិងអនុវត្តនីតិវិធីនៃអគ្គស្នងការដ្ឋាននគរបាលជាតិម្នាក់ ក្នុងអំឡុងពេលសវនាការនោះ។
ចៅក្រមជំនុំជម្រះសាលាដំបូងរាជធានីភ្នំពេញ លោកស្រី អ៊ុក រ៉េតគន្ធា នៅថ្ងៃនេះ បានប្រកាសសាលក្រមផ្ដន្ទាទោសអតីតសកម្មជនបក្សប្រឆាំង៧រូបដាក់ពន្ធនាគារម្នាក់ៗ១៨ខែ ហើយពិន័យប្រាក់២លានរៀលដូចគ្នា និងបានចេញដីកាបង្គាប់ឱ្យសមត្ថកិច្ចចាប់ខ្លួនអ្នកទាំង៧រូបមកដាក់ពន្ធនាគារ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា បើសិនជាតុលាការបានចេញសាលក្រមនិងដីកាបង្គាប់ឱ្យសមត្ថកិច្ចចាប់ខ្លួននោះ សមត្ថកិច្ចនឹងអនុវត្ត បើទោះបីជាបុគ្គលនៅក្រៅប្រទេសក៏ដោយ។
លោកថា៖ «ចំពោះជនល្មើសដែលមានសាលក្រមផ្ដន្ទាទោស ហើយរត់គេចខ្លួនហ្នឹង រដ្ឋសាម៉ីត្រូវប្រើប្រាស់គ្រប់មធ្យោបាយការទូតឬកិច្ចសហការក្នុងវិស័យព្រហ្មទណ្ឌជាមួយបណ្ដាប្រទេសជាមិត្ត ដើម្បីធ្វើម៉េច[ចាប់]ជនល្មើសមកផ្ដន្ទាទោសតាមអំណាចសាលក្រមរដ្ឋសាម៉ីហ្នឹង។ នីតិវិធីនាំយកជនល្មើសមកផ្ដន្ទាទោសដែលរត់គេចខ្លួនទៅប្រទេសដទៃហ្នឹង តាមរយៈកិច្ចព្រមព្រៀងតាមវិស័យព្រហ្មទណ្ឌ តាមរយៈការទូតកិច្ចសហការប្រទេសជាមិត្ត ក៏ដូចជាក្នុងតំបន់»។
អតីតសកម្មជនបក្សប្រឆាំងទាំងនោះមានដូចជា ឈ្មោះ រិន រដ្ឋ, រុន ចន្ធី, ម៉ៅ វិបុល, ស៊ឹម សុភា និង នាង សុឃុន ដែលបច្ចុប្បន្នកំពុងភៀសខ្លួននៅប្រទេសថៃ ខណៈឈ្មោះ ពេជ្រ សំបូរ កំពុងរស់នៅប្រទេសបារាំង និងព្រះសង្ឃ នូ សុធា នៅប្រទេសកាណាដា។
លោកមេធាវី សំ សុគង់ មានប្រសាសន៍ថា លោកទទួលបានការពឹងពាក់ដោយផ្ទាល់មាត់ ប៉ុន្តែចំពោះលិខិតផ្លូវការនោះ លោកថានៅមិនទាន់ទទួលបានឡើយ ដែលករណីនេះបានធ្វើឱ្យលោកខកខានចូលរួមសវនាការនាពេលកន្លងមក។
លោកថា៖ «គ្រាន់តែគាត់ពឹងពាក់ដោយផ្ទាល់មាត់ លិខិតហ្នឹង គាត់បានផ្ញើមកហើយ ប៉ុន្តែមិនទាន់មកដល់ដៃខ្ញុំ។ បើតាមគាត់ផ្ញើមក គឺគាត់មកផ្ញើតាំងពីថ្ងៃទី២៣ ខែសីហា មុនសវនាការប្រហែល៣ថ្ងៃ ប៉ុន្តែមិនទាន់មកដល់ដៃខ្ញុំ។ ណាមួយព័ត៌មានហ្នឹង គាត់ទើបដឹងមុខសវនាការប្រហែលជា៣ទៅ៤ថ្ងៃប៉ុណ្ណោះ»។
អតីតសកម្មជនគណបក្សសង្គ្រោះជាតិដែលកំពុងភៀសខ្លួននៅប្រទេសថៃ លោក រិន រដ្ឋ ចាត់ទុកសាលក្រមផ្ដន្ទាទោសពួកគាត់នៅថ្ងៃនេះថាជារឿងនយោបាយ ហើយរូបលោកក៏មិនប្ដឹងជំទាស់ទៅនឹងសេចក្ដីសម្រេចរបស់សាលាដំបូងដែរ។
លោកថា៖ «ខ្ញុំយល់ថា រឿងនេះជារឿងនយោបាយ ទោះបីជាខ្ញុំប្ដឹងជំទាស់ទៅដល់ណាក៏មិនឈ្នះ មិនអាចផ្ដល់យុត្តិធម៌ឱ្យខ្ញុំដែរ។ បើសិនជាទទួលបានយុត្តិធម៌មកវិញ ទាល់តែមានការចរចានយោបាយណាមួយ អាហ្នឹងខ្ញុំជឿជាក់ថា រូបខ្ញុំនឹងមានយុត្តិធម៌ឡើងវិញ ព្រោះប្រព័ន្ធតុលាការរបបលោក ហ៊ុន សែន [រដ្ឋាភិបាល] សព្វថ្ងៃ គឺសូម្បីប្រជាពលរដ្ឋ ក៏ពួកគាត់លែងរំពឹងនឹងប្រព័ន្ធតុលាការនេះដែរ»។
អតីតសកម្មជនគណបក្សសង្គ្រោះជាតិដែលកំពុងភៀសខ្លួននៅប្រទេសថៃម្នាក់ទៀត លោក ម៉ៅ វិបុល លើកឡើងថា រូបលោកនឹងមិនប្ដឹងជំទាស់សាលក្រមនេះទៅសាលាឧទ្ធរណ៍ទេ ដោយយល់ថា សំណុំរឿងរបស់ពួកគាត់ជារឿងនយោបាយ។
អតីតគណបក្សសង្គ្រោះជាតិ ត្រូវបានតុលាការកំពូលចេញសាលដីការំលាយកាលពីខែវិច្ឆិកា ឆ្នាំ២០១៧ ក្នុងនោះ មន្ត្រីជាន់ខ្ពស់១១៨រូបក៏ត្រូវបានហាមឃាត់ មិនឱ្យធ្វើនយោបាយរយៈពេល៥ឆ្នាំ។
អតីតមេដឹកគណបក្សប្រឆាំង លោក កឹម សុខា ត្រូវបានសមត្ថកិច្ចចាប់ខ្លួនចោទប្រកាន់ពីបទ «ឃុបឃិតជាមួយបរទេសផ្ដួលរំលំរដ្ឋាភិបាល» ខណៈសវនាការលើសំណុំរឿងរបស់លោក និងសកម្មជនជាង១០០នាក់ផ្សេងទៀតដែលរងការចោទប្រកាន់ពី «រួមគំនិតនិងញុះញង់» ត្រូវពន្យារពេលចាប់តាំងពីមានការរីករាលដាលកូវីដ-១៩៕
