ចៅក្រមស៊ើបសួរសាលាដំបូងរាជធានីភ្នំពេញ នៅរសៀលថ្ងៃនេះ នឹងបន្តចោទសួរសមាជិកអតីតគណបក្សប្រឆាំងពីរនាក់ គឺលោក គង់ ម៉ាស់ និងលោក ខាត់ ប៊ុនផេង ក្រោមការចោទប្រកាន់ពីបទ «រួមគំនិតក្បត់» តាមមាត្រា៤៥៣ នៃក្រមព្រហ្មទណ្ឌកម្ពុជា។
លោក ស៊ិន សុវណ្ណរ័ត្ន ចៅក្រមស៊ើបសួរនៃសាលាដំបូងរាជធានីភ្នំពេញ បានអញ្ជើញមេធាវីការពារក្តី លោក សំ សុគង់ ដើម្បីចូលស្តាប់ការសាកសួរបន្ថែមរបស់កូនក្តីនៅវេលាម៉ោង២រសៀលថ្ងៃនេះ។
កាលពីថ្ងៃទី១៥ ខែកក្កដា ចៅក្រមស៊ើបសួរនៃសាលាដំបូងរាជធានីភ្នំពេញ លោក ស៊ិន សុវណ្ណរ័ត្ន បានកោះហៅអតីតសមាជិកបក្សប្រឆាំងទាំង២រូបដែលកំពុងជាប់ឃុំក្នុងពន្ធនាគារនោះមកសាកសួរម្តងរួចហើយ ជុំវិញសំណុំរឿង «រួមគំនិតក្បត់»។
អាជ្ញាធរបានចាប់ខ្លួនលោក គង់ ម៉ាស់ នៅរាជធានីភ្នំពេញ និងចាប់ខ្លួនលោក ខាត់ ប៊ុនផេង នៅខេត្តបាត់ដំបង ក្នុងថ្ងៃតែមួយ កាលពីថ្ងៃទី៣១ ខែធ្នូ ឆ្នាំ២០២០ ហើយបានបញ្ជូនពួកគេទៅឃុំខ្លួននៅពន្ធនាគារព្រៃស។ ការចាប់ខ្លួននេះ បន្ទាប់ពីអាជ្ញាធរបានចោទប្រកាន់ពួកគេថា មានគម្រោងប្រមូលផ្តុំគ្នាតវ៉ានៅមុខសាលាដំបូងរាជធានីភ្នំពេញ និងពាក់ព័ន្ធផែនការវិលចូលស្រុករបស់លោកស្រី មូរ សុខហួរ អនុប្រធានអតីតគណបក្សសង្គ្រោះជាតិ កាលពីដើមខែមករា ឆ្នាំ២០២១៕
