តុលាការខេត្តស្ទឹងត្រែង នៅថ្ងៃទី៩ ខែកញ្ញានេះ កំពុងសាកសួរអ្នកកាសែតចំនួន៩នាក់ ក្រោមការចោទប្រកាន់ពីបទ«កំហែងយក»។
អ្នកនាំពាក្យសាលាដំបូងខេត្តស្ទឹងត្រែង លោក ឈុំ សាងហាក់ បានប្រាប់ វីអូឌី នៅមុននេះបន្តិចថា កងរាជអាវុធហត្ថខេត្តស្ទឹងត្រែង បានបញ្ជូនអ្នកកាសែតចំនួន៩នាក់ទៅកាន់តុលាការខេត្តនៅព្រឹកមិញនេះ ដើម្បីសួរនាំពាក់ព័ន្ធនឹងការចោទប្រកាន់ពីបទកំហែងយក។ យ៉ាងណាក្តី អ្នកនាំពាក្យរូបនេះនៅមិនទាន់អាចបញ្ជាក់បាននៅឡើយទេ ថាតើតុលាការសម្រេចយ៉ាងណានោះ គិតត្រឹមរសៀលថ្ងៃនេះ។
លោកមានប្រសាសន៍ថា៖ «ខ្ញុំអត់ច្បាស់បញ្ចប់ការសាកសួរនៅពេលណាដែរ ព្រោះអីគ្នាច្រើនដែរ! រឿងហ្នឹងទើបទទួលបានព្រឹកមិញម៉ោង១០ ដល់អ៊ីចឹង[ព្រះរាជអាជ្ញា]កំពុងសួរដែរ»។
គួរជម្រាបជូនថា យ៉ាងហោចណាស់ អ្នកកាសែតអនឡាញចំនួន៩នាក់ត្រូវបានកងរាជអាវុធហត្ថខេត្តស្ទឹងត្រែងចាប់ឃាត់ខ្លួនកាលពីថ្ងៃអង្គារ ក្រោយពីម្ចាស់រថយន្តដឹកឈើបានប្តឹងបកពីបទ «កំហែងយក ឬជំរិតទារប្រាក់»។
ប្រធានមន្ទីរព័ត៌មានខេត្តស្ទឹងត្រែង លោក អ៊ុក ធាវី បានប្រាប់ VOD កាលពីថ្ងៃពុធថា ការចាប់ឃាត់ខ្លួននេះ ក្រោយពីអ្នកសារព័ត៌មានទាំងនោះបានឃាត់រថយន្តដឹកឈើចំនួន២គ្រឿង ហើយបានទារប្រាក់ចំនួន៤ ០០០ដុល្លារ។
តែយ៉ាងណា លោកថា ក្រោយពីទារប្រាក់មិនបានសម្រេច អ្នកសារព័ត៌មានទាំងនោះបានទូរសព្ទប្រាប់កងរាជអាវុធហត្ថប្រចាំខេត្តនេះឱ្យមានវិធានការផ្លូវច្បាប់ ប៉ុន្តែពេលកងកម្លាំងអាវុធហត្ថទៅពិនិត្យរកឃើញថា នៅលើរថយន្តនោះជាប្រភេទឈើដែលរុះពីផ្ទះចាស់ៗដែលពលរដ្ឋលក់ឱ្យ និងមានលិខិតអនុញ្ញាតពីរដ្ឋបាលព្រៃឈើ។
ករណីនេះ ម្ចាស់រថយន្តដឹកឈើបានប្តឹងចោទប្រកាន់ទៅលើអ្នកសារព័ត៌មានទាំងនោះវិញពីបទឃាត់រថយន្តទុក ដើម្បីជំរិតទារប្រាក់ពី៤ ០០០ដុល្លារ ទៅ៥ ០០០ដុល្លារ និងត្រូវបានកងរាជអាវុធហត្ថខេត្តស្ទឹងត្រែងចាប់ខ្លួនបានជាបន្តបន្ទាប់។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា ហៅកាត់ថា «ខេមបូចា» លោក ណុប វី មានប្រសាសន៍ថា អាជ្ញាធរនិងមន្ត្រីតុលាការត្រូវធ្វើការស្រាវជ្រាវលើអង្គហេតុឱ្យបានគ្រប់ជ្រុងជ្រោយ មុននឹងចោទប្រកាន់លើក្រុមអ្នកសារព័ត៌មានទាំងនោះ ដើម្បីកុំឱ្យប៉ះពាល់ដល់សេរីភាពអ្នកសារព័ត៌មាននៅកម្ពុជា។
លោកមានប្រសាសន៍ថា៖ «គួរតែពិនិត្យមើលថា មូលហេតុអ្វីបានជាអ្នកសារព័ត៌មានគាត់តាមឡានដឹកឈើ! ហើយចំណុចមួយទៀត ខ្ញុំទទូចដល់អាជ្ញាធរមូលដ្ឋានឱ្យពិនិត្យអំពីឈើដែលដឹកនោះ តើវាជាផ្នែកមួយពាក់ព័ន្ធជាមួយនឹងបទល្មើសទេ ឬមួយក៏វាជាឈើដូចជាម្ចាស់ឈើគាត់បានអះអាងមែន? វាជាជាងគ្រាន់តែធ្វើកិច្ចការងារចោទប្រកាន់ជាមួយអ្នកសារព័ត៌មាន ព្រោះខ្ញុំមើលទៅអ្នកសារព័ត៌មានក្លាយទៅជាគោលដៅមួយរបស់អាជ្ញាធរមូលដ្ឋាន ឬបុគ្គលមួយចំនួនដែលរកស៊ីខុសច្បាប់នោះ»។
លោកមានប្រសាសន៍បន្ថែមថា៖ «វាជាផ្នែកមួយពាក់ព័ន្ធជាមួយនឹងការគំរាមកំហែងដល់អ្នកសារព័ត៌មានដែរ។ យើងដឹងហើយ អ្នកសារព័ត៌មានដែលហ៊ានប្រមាញ់ទាក់ទងនឹងជាមួយនឹងបទល្មើសព្រៃឈើ ឬមួយក៏អ្នកសារព័ត៌មានដែលហ៊ានទៅធ្វើសេចក្តីរាយការណ៍នៅទីកន្លែងកើតមានបទល្មើស ហើយក្នុងករណីដែលអាជ្ញាធរចេះតែធ្វើសកម្មភាពប្រឆាំងអ្នកសារព័ត៌មាន វានឹងធ្វើឱ្យអ្នកសារព័ត៌មានផ្សេងទៀតលែងហ៊ានចុះទៅយកព័ត៌មាននៅទីកន្លែងដែលមានករណីបទល្មើសព្រៃឈើ ឬក៏បទល្មើសផ្សេងៗទៀត»។
ក្នុងឆ្នាំ២០២១នេះ គិតពីខែមករា ដល់ខែកញ្ញានេះ សម្ព័ន្ធអ្នកសារព័ត៌មានកម្ពុជា ហៅកាត់ថា «ខេមបូចា» បានកត់ត្រាករណីបៀតបៀននិងគំរាមកំហែងទៅលើអ្នកសារព័ត៌មានចំនួន៣៨ករណី លើអ្នកសារព័ត៌មានចំនួន៥៨នាក់ ក្នុងនោះមានស្ត្រី៤នាក់ ដែលភាគច្រើនជាករណីចាប់ឃុំខ្លួននិងការប្រើអំពើហិង្សា។
អង្គការអ្នកកាសែតគ្មានព្រំដែន កាលពីពេលថ្មីៗនេះ បានបន្តផ្តល់ចំណាត់ថ្នាក់សេរីភាពសារព័ត៌មាននៅកម្ពុជា ឆ្នាំ២០២១ ស្ថិតនៅក្នុងរូបភាពអាក្រក់ដដែល ដោយឈរនៅលេខរៀងទី១៤៤ ក្នុងចំណោម១៨០ប្រទេសនិងដែនដីនៅលើពិភពលោក។
សេរីភាពសារព័ត៌មានដែលអង្គការនេះវាយតម្លៃ បង្ហាញថា កម្ពុជាបានធ្លាក់ចុះ៣ឆ្នាំជាប់ៗគ្នាចាប់តាំងពីឆ្នាំ២០១៧មក ពោលគឺចំណាត់ថ្នាក់លេខ១៤២ នៅឆ្នាំ២០១៨ ចំណាត់ថ្នាក់លេខ១៤៣ នៅឆ្នាំ២០១៩ និងចំណាត់ថ្នាក់លេខ១៤៤ នៅឆ្នាំ២០២០ និងឆ្នាំ២០២១នេះ៕
