អាជ្ញាធររាជធានីភ្នំពេញ បានបញ្ជូនខ្លួនមន្ត្រីនគរបាលផ្នែកកងអន្តរាគមន៍ខណ្ឌ៧មករាម្នាក់ទៅតុលាការនៅព្រឹកថ្ងៃសុក្រនេះ ក្រោយបង្កឱ្យស្ត្រីម្នាក់រងរបួសត្រង់ក្បាលធ្ងន់ធ្ងរក្នុងពេលចុះពិនិត្យបទល្មើសចរាចរណ៍។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា មានប្រសាសន៍ថា មន្ត្រីនគរបាលដែលវាយកញ្ញា ងន ស្រីនិច្ច កាលពីយប់ថ្ងៃទី០៨ ខែកញ្ញា ត្រូវបានបញ្ជូនទៅតុលាការហើយនៅព្រឹកថ្ងៃសុក្រនេះ។
លោកបន្តថា ការបញ្ជូនទៅតុលាការនេះ ក្រោយរកឃើញថា លោក ម៉ាត់ ពិសី មន្ត្រីផ្នែកកងអន្តរាគមន៍នៃអធិការដ្ឋាននគរបាលខណ្ឌ៧មករា បានយកអាយឌី (ID) ឬ អាយកូម វាយក្បាលស្ត្រីម្នាក់ឱ្យរងរបួសធ្ងន់ធ្ងរ។
យ៉ាងណា លោក សាន សុខសីហា ថាមន្ត្រីនគរបាលរូបនេះបានច្រានចោលចំពោះការចោទប្រកាន់ និងបានអះអាងថា ខ្លួនគ្រាន់តែបានរត់ទៅស្ទាក់ម៉ូតូរបស់ជនរងគ្រោះតែប៉ុណ្ណោះ។
លោកបន្ថែមថា៖ «ព្រឹកមិញហ្នឹង សមត្ថកិច្ចជំនាញគេបានបញ្ចូនមន្ត្រីបង្កទៅតុលាការហើយ។ នីតិវិធីបន្តយើងមិនមានអីសម្រេចកើតទេ ព្រោះនីតិវិធីបន្តគឺជាការងាររបស់ខាងតុលាការ។ ព្រោះសមត្ថកិច្ចយើងបានត្រឹមតែបញ្ជូនទាក់ទងការងារហ្នឹង ដោយសារតែភាគីសងខាងមិនមានការសម្រុះសម្រួល មិនមានការឯកភាពគ្នា»។
គួរបញ្ជាក់ជូនថា ការបញ្ជូនខ្លួនមន្ត្រីនគរបាលផ្នែកអន្តរាគមន៍នៃអធិការដ្ឋាននគរបាលខណ្ឌ៧មករាឈ្មោះ ម៉ាត់ ពិសី ទៅតុលាការនេះ ធ្វើឡើងក្រោយពីមានបទបញ្ជាពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ ឱ្យស៊ើបអង្កេតនិងមានចំណាត់ការលើរឿងនេះ។ ចំណាត់ការនេះក៏បានធ្វើឡើងបន្ទាប់ពីមានការរិះគន់ជាច្រើនពីសាធារណជន ជុំវិញសកម្មភាពមិនល្អរបស់មន្ត្រីនគរបាលរូបនេះដែលយកអាយកូមវាយក្បាលស្ត្រីម្នាក់ជិះម៉ូតូគេចពីគោលដៅត្រួតពិនិត្យច្បាប់ចរាចរណ៍។
ទាក់ទងសំណុំរឿងនេះ ស្ត្រីរងគ្រោះបានស្នើសុំឱ្យមន្ត្រីពាក់ព័ន្ធរកយុត្តិធម៌ដល់ខ្លួន និងទាមទារសំណងជំងឺចិត្តឱ្យបានសមរម្យទៅនឹងកិត្តិយសក្នុងនាមជាស្ត្រី និងម៉្យាងដើម្បីយកប្រាក់ទៅព្យាបាលក្បាលដែលរងរបួសផងដែរ៕
