រដ្ឋមន្ត្រីការបរទេសចិនលោក វ៉ាង យី នឹងមកទស្សនកិច្ចនៅកម្ពុជារយៈពេលពីរថ្ងៃចាប់ពីថ្ងៃទី១២ ដល់ ថ្ងៃទី១៣ ខែកញ្ញា ឆ្នាំ២០២១នេះ។
យោងតាមសេចក្តីប្រកាសព័ត៌មានរបស់ក្រសួងការបរទេសកម្ពុជាឱ្យដឹងថា នៅក្នុងដំណើរទស្សនកិច្ចជាផ្លូវការនេះ លោក វ៉ាង យី នឹងចូលជួបសម្តែងការគួរសមជាមួយលោកនាយករដ្ឋមន្ត្រី ហ៊ុន សែន និងពិសារអាហារការងារពេលព្រឹកជាមួយអតីតរដ្ឋមន្ត្រីការបរទេសកម្ពុជាលោក ហោ ណាំហុង ផងដែរ។
ក្រៅពីនេះ រដ្ឋមន្ត្រីការបរទេសចិន ក៏មានជំនួបជាមួយរដ្ឋមន្ត្រីការបរទេសកម្ពុជាលោក ប្រាក់ សុខុន ដើម្បីពិភាក្សាលើទិដ្ឋភាពផ្សេងៗនៃកិច្ចសហប្រតិបត្តិការទ្វេភាគី រួមមាន ការប្រយុទ្ធប្រឆាំងនឹងជំងឺកូវីដ-១៩ បញ្ហាពាណិជ្ជកម្មនិងការវិនិយោគ ការអប់រំ សន្តិសុខនិងការពារជាតិ ព្រមទាំងបញ្ហាតំបន់ និងអន្តរជាតិដែលជាប្រយោជន៍ និងកង្វល់រួមរវាងប្រទេសទាំងពីរ។
ប្រភពដដែលបានបន្តថា នៅក្នុងដំណើរទស្សនកិច្ចនេះលោកនាយករដ្ឋមន្ត្រី ហ៊ុន សែន និងលោក វ៉ាង យី ក៏នឹងធ្វើជាអធិបតីក្នុងពិធីប្រគល់និងទទួលជាផ្លូវការនូវពហុកីឡាដ្ឋានជាតិមរតកតេជោ ដែលនឹងក្លាយជាទីតាំងដ៏សំខាន់មួយ សម្រាប់រៀបចំការប្រកួតកីឡាអាស៊ីអាគ្នេយ៍នៅឆ្នាំ២០២៣ ដែលកម្ពុជានឹងត្រូវធ្វើជាម្ចាស់ផ្ទះ។ បន្ថែមលើនេះ លោកនាយករដ្ឋមន្ត្រី ហ៊ុន សែន និងលោក វ៉ាង យី ក៏នឹងធ្វើជាសាក្សីក្នុងពិធីចុះហត្ថលេខាលើឯកសារទ្វេរភាគីដ៏សំខាន់មួយចំនួន។ ប៉ុន្តែក្រសួងការបរទេសកម្ពុជា នៅមិនទាន់បញ្ជាក់ថា តើជាឯកសារសំខាន់ៗអ្វីខ្លះនៅឡើយទេ។
ក្រសួងការបរទេសកម្ពុជាបានចាត់ទុកដំណើរទស្សនកិច្ចផ្លូវការរបស់រដ្ឋមន្ត្រីការបរទេសចិនលោក វ៉ាង យី មកកាន់កម្ពុជាលើកនេះ នឹងបន្តពង្រឹងបន្ថែមទៀតនូវមិត្តភាពជាប្រពៃណី និងកិច្ចសហប្រតិបត្តិការនៃភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ក្នុងបរិបទនៃបញ្ហាប្រឈមជាសកលដែលកំពុងកើតមាន។ កាលពីដើមសប្តាហ៍នេះ ទូរទស្សន៍រដ្ឋចិន CGTN បានផ្សាយថា ទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី នឹងធ្វើទស្សនកិច្ចនៅប្រទេសកម្ពុជា សិង្ហបុរី វៀតណាម និងប្រទេសកូរ៉េខាងត្បូង ចាប់ពីថ្ងៃទី១០ ដល់ថ្ងៃទី១៥ ខែកញ្ញា ឆ្នាំ២០២១នេះ។ អ្នកនាំពាក្យក្រសួងការបរទេសចិន លោក Wang Wenbin បានលើកឡើងនៅក្នុងសន្និសីទសារព័ត៌មានមួយនាទីក្រុងប៉េកាំង ប្រទេសចិនថា ក្នុងអំឡុងពេលដំណើរទស្សនកិច្ចនៅក្នុងប្រទេសអាស៊ាននិងអាស៊ីនេះលោក វ៉ាង យី នឹងធ្វើការទំនាក់ទំនងជាយុទ្ធសាស្ត្រស៊ីជម្រៅជាមួយគ្រប់ភាគី ដើម្បីបង្កើនកិច្ចសហប្រតិបត្តិការ «ខ្សែក្រវាត់ និងផ្លូវ» និងជំរុញការកសាងសហគមន៍ដែលមានអនាគតរួមគ្នាសម្រាប់មនុស្សជាតិ៕
