អង្គការសហប្រជាជាតិ នឹងរៀបចំសន្និសីទមួយនៅទីក្រុងហ្សឺណែវ នៅថ្ងៃចន្ទនេះ ក្នុងកិច្ចខិតខំប្រឹងប្រែង ដើម្បីស្វែងរកថវិកាជាង៦០០លានដុល្លារ សម្រាប់ជួយដល់អាហ្វហ្គានីស្ថាន ខណៈដែលពួកគេព្រមានពីវិបត្តិមនុស្សធម៌ដែលអាចកើតមានឡើងនៅក្នុងប្រទេសមួយនេះ បន្ទាប់ពីក្រុមតាលីបង់ចូលកាន់កាប់អំណាច។
មុនពេលក្រុមតាលីបង់ដណ្តើមបានទីក្រុងកាប៊ុលយកមកគ្រប់គ្រងកាលពីខែមុន ចំនួនប្រជាជនអាហ្វហ្គានីស្ថានពាក់កណ្តាល ឬប្រមាណ១៨លាននាក់រួចទៅហើយដែលបានពឹងផ្អែកលើជំនួយ ខណៈដែលតួលេខនេះរំពឹងថានឹងកើនឡើងបន្ថែមទៀត ដោយសារតែគ្រោះរាំងស្ងួត កង្វះខាតសាច់ប្រាក់ និងស្បៀងអាហារ។ នេះបើតាមការលើកឡើងរបស់មន្ត្រី និងក្រុមជំនួយនានារបស់អង្គការសហប្រជាជាតិ។
ការបញ្ចប់ភ្លាមៗនូវជំនួយបរទេសក្នុងទំហំទឹកប្រាក់រាប់ពាន់លានដុល្លារ បន្ទាប់ពីការដួលរលំនៃរដ្ឋាភិបាលដែលគាំទ្រដោយប្រទេសលោកខាងលិចនៅអាហ្វហ្គានីស្ថាន និងជ័យជម្នះជាបន្តបន្ទាប់របស់តាលីបង់ បានដាក់ជាសម្ពាធកាន់តែខ្លាំងលើកម្មវិធីរបស់អង្គការសហប្រជាជាតិ។
ទាក់ទិននឹងករណីនេះ អគ្គលេខាធិការអង្គការសហប្រជាជាតិ លោក Antonio Guterres បានឱ្យដឹងថា អង្គការរបស់លោកបច្ចុប្បន្នកំពុងតែជួបការលំបាកផ្នែកហិរញ្ញវត្ថុ។
ទីភ្នាក់ងារសារព័ត៌មាន Reuters បានស្រង់សម្ដីអគ្គលេខាធិការអង្គការសហប្រជាជាតិរូបនេះ ដែលបានថ្លែងប្រាប់អ្នកយកព័ត៌មានកាលពីថ្ងៃសុក្រកន្លងទៅថា៖ «នៅពេលបច្ចុប្បន្ននេះ អង្គការសហប្រជាជាតិមិនមានលទ្ធភាពសូម្បីតែការបើកប្រាក់ខែដល់បុគ្គលិករបស់ខ្លួន»។
គួរបញ្ជាក់ថា សន្និសីទធ្វើឡើងនៅទីក្រុងហ្សឺណែវដែលនឹងចាប់ផ្តើមនៅរសៀលថ្ងៃចន្ទនេះ នឹងមានការចូលរួមពីមន្រ្តីជាន់ខ្ពស់របស់អង្គការសហប្រជាជាតិមួយចំនួន រួមមាន លោក Antonio Guterres នាយកគណៈកម្មាធិការអន្តរជាតិនៃកាកបាទក្រហម ហៅកាត់ថា ICRC លោក Peter Maurer ព្រមទាំងតំណាងរដ្ឋាភិបាលរាប់សិបនាក់ផ្សេងទៀត រួមទាំងរដ្ឋមន្ត្រីការបរទេសអាល្លឺម៉ង់ លោក Heiko Maas ផងដែរ។
ថវិកាមួយភាគបីនៃទំហំទឹកប្រាក់ចំនួន៦០៦លានដុល្លារដែលស្វែងរកតាមរយៈសន្និសីទនេះ នឹងត្រូវប្រើប្រាស់ដោយកម្មវិធីស្បៀងអាហារពិភពលោករបស់អង្គការសហប្រជាជាតិ ខណៈពួកគេបានរកឃើញថា ៩៣% នៃជនជាតិអាហ្វហ្គានីស្ថានចំនួន១ ៦០០នាក់ ដែលបានស្ទង់មតិនៅខែសីហានិងកញ្ញា មិនទទួលបានអាហារគ្រប់គ្រាន់នោះទេ។
ជាមួយគ្នានេះដែរ អង្គការសុខភាពពិភពលោក ដែលជាទីភ្នាក់ងារមួយទៀតរបស់អង្គការសហប្រជាជាតិ ក៏កំពុងតែស្វែងរកការគាំទ្រដល់មណ្ឌលសុខភាពរាប់រយកន្លែងដែលប្រឈមនឹងការបិទទ្វារនៅអាហ្វហ្គានីស្ថានផងដែរ បន្ទាប់ពីម្ចាស់ជំនួយនានាបានដកខ្លួនចេញ៕
