សិស្សអនុវិទ្យាល័យនិងវិទ្យាល័យមួយចំនួនសាទរចំពោះការអនុញ្ញាតឱ្យចូលរៀនដោយផ្ទាល់នៅសាលារៀនវិញ ប៉ុន្តែពួកគេនិងឪពុកម្តាយនៅបារម្ភពីការឆ្លងជំងឺកូវីដ-១៩នៅក្នុងសាលារៀន។
គ្រឹះស្ថានសិក្សាសាធារណៈនិងឯកជនកម្រិតចាប់ពីអនុវិទ្យាល័យឡើងទៅ នៅក្នុងភូមិសាស្ត្ររាជធានីភ្នំពេញ បានចាប់ផ្តើមបើកដំណើរការរៀនផ្ទាល់ឡើងវិញហើយ នៅថ្ងៃទី១៥ ខែកញ្ញា ឆ្នាំ២០២១នេះ។
អភិបាលរាជធានីភ្នំពេញ លោក ឃួង ស្រេង បានចុះពិនិត្យការចូលរៀនឡើងវិញនៅតាមអនុវិទ្យាល័យ វិទ្យាល័យ និងសាលាឯកជនមួយចំនួន ក្នុងនោះមានវិទ្យាល័យព្រះស៊ីសុវត្ថិផងដែរ។
ការបើកសាលារៀននៅរាជធានីភ្នំពេញឡើងវិញនេះ បានធ្វើឡើងតាមសេចក្តីសម្រេចរបស់រដ្ឋបាលរាជធានីភ្នំពេញ កាលពីថ្ងៃទី០៩ ខែកញ្ញា ឆ្នាំ២០២១ បន្ទាប់ពីគ្រឹះស្ថានសិក្សានីមួយៗបានត្រៀមលក្ខណៈគ្រប់គ្រាន់ស្របតាមគោលការណ៍ប្រតិបត្តិស្តង់ដារ (SOP) របស់ក្រសួងអប់រំ យុវជន និងកីឡា និងការណែនាំរបស់រដ្ឋបាលរាជធានីភ្នំពេញ។
យុវតី តាយ ច័ន្ទម៉ូនីកា សិស្សថ្នាក់ទី៩ B1 នៃវិទ្យាល័យព្រះស៊ីសុវត្ថិ ប្រាប់ វីអូឌី ផ្ទាល់នៅព្រឹកថ្ងៃពុធនេះថា កញ្ញាមានក្តីបារម្ភពីការឆ្លងជំងឺកូវីដ-១៩នៅក្នុងសាលារៀនដែរ ប៉ុន្តែនៅតែចង់មករៀនផ្ទាល់។ យ៉ាងណា យុវតីរូបនេះថា ឪពុករបស់នាងនៅមិនទាន់ចង់ឱ្យនាងមករៀននៅសាលាដោយផ្ទាល់នៅឡើយ។
យុវតីវ័យ១៥ឆ្នាំរូបនេះថា៖ « ខ្លាច [កូវីដ-១៩] ដែរ! ប៉ាផ្ដាំមិញថាឱ្យរក្សាគម្លាត អត់ឱ្យនៅជិតគេទេ ព្រោះប៉ាខ្ញុំគាត់អត់ចង់ឱ្យខ្ញុំចូលរៀនដែរ តែរបៀបថាខ្ញុំចង់ចូលរៀន ព្រោះអីនៅផ្ទះវាអផ្សុក ហើយរៀនអត់សូវចេះ»។
យុវតីរូបនេះបន្ថែមថា៖ «ប្រាប់គាត់ [ប៉ា] អ៊ីចឹង [ពីមូលហេតុដែលចង់ទៅរៀន] ដែរ! គាត់ថា គ្រូហ្នឹងអត់យល់ទេអី? ថាកូវីដ-១៩អី! ព្រោះសាលាជម្ពូវ័នអី ដូចជាឃើញផុសតិកតុកថ្ងៃមុនថាធ្វើតេស្តទៅឃើញ៥នាក់»។
យុវជន យន មេសាផានិត សិស្សថ្នាក់ទី១២ A នៃវិទ្យាល័យព្រះស៊ីសុវត្ថិ លើកឡើងស្រដៀងគ្នាថា ឪពុកម្តាយរបស់គាត់ក៏បារម្ភពីសុវត្ថិភាពសុខភាពរបស់គាត់ដូចគ្នា។ យ៉ាងណា យុវជនរូបនេះថាគាត់សប្បាយចិត្តដែលបានចូលរៀនវិញ។
យុវជនវ័យ១៨ឆ្នាំរូបនេះ បញ្ជាក់ថា៖ «គាត់ [ប៉ាម៉ាក់] ថា បើសិនជា [រៀន] នៅផ្ទះល្អជាង ដោយសារអី? កូវីដ-១៩ ស្ថានការណ៍យើងកំពុងឡើង ដែលតា [Delta] មួយទៀត អីអ៊ីចឹង»។
យុវជនរូបនេះបន្តថា ខ្លួនមានការបារម្ភដែរ ដោយសារឆ្នាំនេះជាឆ្នាំប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ខណៈការរៀនអនឡាញកន្លងមក ទទួលបានចំណេះដឹងនៅមានកម្រិតនៅឡើយ។
យុវជន យន មេសាផានិត និយាយថា៖ «ខ្ញុំ [រៀន] ទី១២ រៀងភ័យដែរ [ឆ្នាំប្រឡង]។ នៅរៀងខ្វះខាតបន្តិច [សមត្ថភាពសម្រាប់ត្រៀមប្រឡង] ដោយសាររៀនអនឡាញ ពេលខ្លះយើងមើលអត់សូវយល់។ ដូច្នេះយើងត្រូវរៀនបំប៉នរៀងខ្លាំងដែរ»។
យុវតី ជា លីតា សិស្សថ្នាក់ទី៩ D១ នៃវិទ្យាល័យព្រះស៊ីសុវត្ថិ បានលើកឡើងដែរថា កញ្ញាសប្បាយចិត្តដែលបានមករៀននៅសាលាជាថ្មី ព្រមទាំងបានជួបមិត្តភក្តិផងដែរ។ យ៉ាងណា យុវតីរូបនេះថា ឪពុកម្តាយរបស់គាត់មិនចង់ឱ្យគាត់មករៀននៅសាលាផ្ទាល់ទេ ដោយសារតែខ្លាចឆ្លងជំងឺកូវីដ-១៩។
កញ្ញាថា៖ «គាត់អត់ចង់ឱ្យមក [សាលារៀនផ្ទាល់] ដោយសារតែខ្លាចឆ្លង [ជំងឺកូវីដ-១៩]។ ខ្ញុំថា ខ្ញុំឆ្នាំប្រឡង ត្រូវការមករៀន ហេតុនេះបានគាត់ឱ្យមក។ [រៀនពីផ្ទះ] ខ្ញុំរៀនអត់ចេះផងហ្នឹង! ដោយសារតែខ្ញុំឆ្នាំប្រឡងអ៊ីចឹង ខ្ញុំត្រូវរៀននៅសាលាដែរ»។
កញ្ញា គឹម សុត្ថារី ជាគ្រូបង្រៀនមុខវិទ្យាជីវវិទ្យា ថ្នាក់ទី៩ និងទី១២ នៃវិទ្យាល័យព្រះស៊ីសុវត្ថិ លើកឡើងថា គាត់សប្បាយចិត្តដែលបានវិលមកបង្រៀនសិស្សនៅសាលាដោយផ្ទាល់ជាថ្មី បន្ទាប់ពីត្រូវបង្រៀនតាមអនឡាញជាច្រើនខែ។ យ៉ាងណា កញ្ញាក៏មានក្តីបារម្ភពីការឆ្លងជំងឺកូវីដ-១៩ផងដែរ ទោះបានចាក់វ៉ាក់សាំងរួចរាល់គ្រប់ចំនួនដូសក៏ដោយ។
កញ្ញា គឹម សុត្ថារី ថ្លែងថា៖ «អារម្មណ៍ខ្លាចចេះតែខ្លាចហើយ ប៉ុន្តែធ្វើម៉េច បើកូនសិស្សឈប់យូរហើយ។ ហើយម្យ៉ាងដោយសារតែគោលការណ៍របស់ក្រសួងផង ហើយភាគច្រើនបុគ្គលិកអប់រំបានចាក់វ៉ាក់សាំងដូសជំរុញរួចហើយ អស់ហើយ ដូច្នេះហានិភ័យរៀងទាប»។
អ្នកស្រី ម៉ី ចន្ថា អាជីវករលក់ខោអាវនៅផ្សារកណ្តាល រាជធានីភ្នំពេញ ដែលត្រូវជាម្តាយរបស់យុវតី តាយ ច័ន្ទម៉ូនីកា បានលើកឡើងថា អ្នកស្រីចង់ឱ្យកូនរៀនផ្ទាល់ជាមួយគ្រូនៅឯសាលា ព្រោះល្អជាងរៀនតាមអនឡាញ។ ទោះជាយ៉ាងណា គាត់ក៏បារម្ភពីសុវត្ថិភាពកូនស្រីផងដែរ ព្រោះឮថាមានករណីគ្រូបង្រៀនសាលាផ្សេងឆ្លងជំងឺកូវីដ-១៩ និងថាខ្លាចក្រែងមានករណីឆ្លងបន្តគ្នាពីសំណាក់គ្រូបង្រៀន និងអាចចម្លងពីគ្រូមកសិស្ស ជាដើម។
អ្នកស្រី ម៉ី ចន្ថា ថា៖ «បើនិយាយពីចិត្តបង ទី១ ចង់ឱ្យរៀនផ្ទាល់ជាមួយលោកគ្រូ-អ្នកគ្រូ តែក៏បារម្ភខ្លាំង ព្រោះឮព័ត៌មានថាមានគ្រូកើតកូវីដ-១៩ អីអ៊ីចឹង។ ចិត្តមួយចង់ឱ្យរៀន ចិត្តមួយក៏មិនចង់ឱ្យរៀនដែរ ព្រោះខ្លាចដែរ។ បើតាមចិត្តបង ចង់ឱ្យរៀនផ្ទាល់ជាមួយលោកគ្រូ-អ្នកគ្រូផ្ទាល់ ព្រោះចេះជាងរៀនតាមអនឡាញ។ ប៉ុន្តែក៏បារម្ភពីសុវត្ថិភាពកូន ខ្លាចឆ្លងជំងឺកូវីដ-១៩ដែរ បើទោះបីបានចាក់វ៉ាក់សាំងហើយក្តី»។
នាយករងវិទ្យាល័យព្រះស៊ីសុវត្ថិ លោក សៅ សុខា មានប្រសាសន៍ថា មន្ត្រីពាក់ព័ន្ធបានមកបាញ់សម្លាប់មេរោគនៅតាមថ្នាក់នីមួយៗរួចអស់ហើយ ប៉ុន្តែនៅពេលដែលសិស្សានុសិស្សចូលមកសាលា ពួកគាត់ក៏ត្រូវអនុវត្តតាមលក្ខខណ្ឌមួយចំនួនដែរ។
លោកថា៖ «ទី១ [សិស្ស] ត្រូវមានកាតចាក់វ៉ាក់សាំង ហើយប្រសិនបើគាត់អត់មានកាតចាក់វ៉ាក់សាំង យើងឱ្យគាត់កត់ឈ្មោះ ហើយធ្វើការណែនាំគាត់ឱ្យយកកាតចាក់វ៉ាក់សាំងមកជាមួយនៅពេលថ្ងៃស្អែកឡើង។ ទី២ ត្រូវវាស់កម្តៅ បើកម្តៅលើសពី៣៧អង្សាសេ យើងឱ្យគាត់នៅរង់ចាំតាមដានសិន»។
នាយករងវិទ្យាល័យព្រះស៊ីសុវត្ថិរូបនេះ បន្ថែមថា៖ «ហើយនៅក្នុងថ្នាក់នីមួយៗ គឺយើងរក្សាតែ១៥នាក់ទេ គឺធ្វើតាមការណែនាំរបស់សាលារាជធានីភ្នំពេញ និងក្រសួងអប់រំ យុវជន និងកីឡា ដោយរក្សាគម្លាតហើយយើងរៀនតាមបណ្តុំ ដោយឱ្យ១៥នាក់រៀននៅក្នុងថ្នាក់។ ក្រៅពីនេះ នៅសល់ គឺយើងឱ្យរៀនអនឡាញ ដោយឱ្យលោកគ្រូ-អ្នកគ្រូឡាយពីថ្នាក់ទៅ ដើម្បីឱ្យសិស្សានុសិស្សយើងយកចិត្តទុកដាក់នឹងការរៀនសូត្រ។ ហើយមួយសប្តាហ៍ យើងផ្លាស់ប្តូរវេនគ្នាម្តង»។
លោក សៅ សុខា បន្តថា នៅថ្ងៃដំបូងនៃការបើកសាលារៀនឡើងវិញនេះ បរិមាណសិស្សដែលបានគ្រោងទុកបានមកចូលរៀន ១០០% និងលើសការគ្រោងទុកទៀតផង ទើបតម្រូវឱ្យសិស្សដែលមកសាលារៀនខុសវេន ត្រូវរៀនតាមអនឡាញវិញ។
សេចក្តីប្រកាសព័ត៌មានរបស់រដ្ឋបាលរាជធានីភ្នំពេញ កាលពីរសៀលថ្ងៃទី១៤ ខែកញ្ញា បានឱ្យដឹងថា គ្រឹះស្ថានសិក្សាកម្រិតអនុវិទ្យាល័យនិងវិទ្យាល័យនៅរាជធានីភ្នំពេញ ដែលត្រូវបើកដំណើរការឡើងវិញមានចំនួនសរុប២២៧ទីតាំង (គ្រឹះស្ថានសាធារណៈ ៦៨ទីតាំង និងគ្រឹះស្ថានឯកជនចំនួន១៥៩ទីតាំង) និងមានលោកគ្រូ-អ្នកគ្រូ និងបុគ្គលិកអប់រំបម្រើការងារចំនួន១០ ៤៤៣នាក់ និងមានសិស្សានុសិស្សត្រូវចូលរៀនវិញ ចំនួន១៣៩ ៥៧៨នាក់៕