ធនាគារពិភពលោក (World Bank) បានប្រកាសតែងតាំងអនុប្រធានថ្មីប្រចាំតំបន់អាស៊ីបូពា៌និងប៉ាស៊ីហ្វិក គឺជាស្ត្រីដែលមានបទពិសោធន៍ការងារជាង៣ទសវត្សរ៍នៅតំបន់អឺរ៉ុប អាមេរិកឡាទីន និងតំបន់ជាច្រើនផ្សេងទៀត។
លោកស្រី ម៉ានូអែឡា ហ្វេរ៉ូ (Manuela V. Ferro) ដែលជាសេដ្ឋវិទូ និងជាអ្នកដឹកនាំជាន់ខ្ពស់មួយរូបនៃធនាគារពិភពលោក ពេលនេះមានតំណែងថ្មីជាអនុប្រធាននៃធនាគារនេះ ទទួលបន្ទុកតំបន់អាស៊ីបូពា៌ និងប៉ាស៊ីហ្វិក។ លោកស្រី មានសញ្ញាបត្របណ្ឌិតផ្នែកអភិវឌ្ឍន៍សេដ្ឋកិច្ចពីសាកលវិទ្យាល័យ Stanford University និងសញ្ញាបត្រវិស្វកម្មមួយទៀតពីសាកលវិទ្យាល័យ Technical University of Lisbon ប្រទេសព័រទូហ្កាល់។
មុននឹងទទួលតំណែងនេះ លោកស្រី ហ្វេរ៉ូ មានបទពិសោធន៍ច្រើនតាមរយៈការងារជាង៣ទសវត្សរ៍នៅតំបន់អឺរ៉ុប, អាមេរិកឡាទីន និងការ៉ាអ៊ីប, អាហ្វ្រិក និងមជ្ឈិមបូពា៌ និងនៅអាស៊ីខាងត្បូង អមជាមួយតំណែងថ្នាក់ដឹកនាំជាន់ខ្ពស់មួយចំនួនទៀតនៅក្នុងស្ថាប័នធនាគារពិភពលោក។
តំណែងជាន់ខ្ពស់ដែលលោកស្រីធ្លាប់កាន់មុននេះ គឺមានឋានៈជាអនុប្រធានទទួលបន្ទុកគោលនយោបាយប្រតិបត្តិការ និងកម្មវិធីតាមប្រទេស ដែលក្នុងនោះ លោកស្រីជាអ្នកមើលការខុសត្រូវលើអន្តរាគមន៍ឆ្លើយតបទ្រង់ទ្រាយធំបំផុតរបស់ធនាគារពិភពលោក ទៅនឹងការរាតត្បាតជំងឺកូវីដ-១៩។ លោកស្រីក៏មានកេរ្តិ៍ឈ្មោះលេចធ្លោដោយសារស្នាដៃការងារសំខាន់មួយចំនួនទៀត ដូចជា ភាពជាអ្នកដឹកនាំបែបយុទ្ធសាស្ត្ររបស់លោកស្រី, ការសម្រេចបានសមិទ្ធផលល្អៗក្នុងកម្មវិធីនៅតាមប្រទេស, និងប្រវត្តិស្នាដៃក្នុងការបង្កើតភាពជាដៃគូប្រកបដោយផ្លែផ្កាជាមួយបណ្តាប្រទេសជាអតិថិជន និងដៃគូអភិវឌ្ឍន៍នានា។
លោកស្រី ម៉ានូអែឡា ហ្វេរ៉ូ (Manuela V. Ferro) បានមានប្រសាសន៍ថា៖ «ធនាគារពិភពលោកជាដៃគូយូរអង្វែងនៅក្នុងតំបន់អាស៊ីបូពា៌ និងប៉ាស៊ីហ្វិក ហើយធនាគារនៅតែរក្សាការប្តេជ្ញាចិត្តជួយតំបន់នេះឱ្យរើបឡើងវិញនៅក្នុងពេលដ៏សែនលំបាកនេះ។ ក្នុងនាមជាអនុប្រធាននៃធនាគារទទួលបន្ទុកតំបន់អាស៊ីបូពា៌ និងប៉ាស៊ីហ្វិក ខ្ញុំត្រៀមខ្លួនជាស្រេចដើម្បីពង្រឹងភាពជាដៃគូជាមួយបណ្តាប្រទេសនិងដៃគូអភិវឌ្ឍន៍នានានៅក្នុងបេសកកម្មថ្មីនេះ»។
នៅក្នុងតួនាទីថ្មីនេះ លោកស្រី ហ្វេរ៉ូ នឹងមើលលើការគ្រប់គ្រងទំនាក់ទំនងរបស់ធនាគារពិភពលោក ជាមួយប្រទេសចំនួន២៦, បុគ្គលិកជាង១ ០០០នាក់ និង Portfolio Programs (កម្រងកម្មវីធី) ដែលមានទឹកប្រាក់សរុបប្រមាណជា៤០ប៊ីលានដុល្លារអាមរិក សម្រាប់តំបន់អាស៊ីបូពា៌ និងប៉ាស៊ីហ្វិកទាំងមូល៕
