សកម្មជនជាស្ត្រីប្រមាណជាង២០នាក់បានតវ៉ានៅខាងក្រៅក្រសួងកិច្ចការនារីអាហ្វហ្គានីស្ថានកាលពីថ្ងៃអាទិត្យម្សិលមិញ បន្ទាប់ពីទីតាំងនេះត្រូវបានបិទដោយក្រុមសកម្មប្រយុទ្ធតាលីបង់ សម្រាប់ដាក់ជាក្រសួងលើកតម្កើងគុណធម៌ និងការពារឧក្រិដ្ឋកម្មជំនួសវិញ។
បុគ្គលិកជាស្រ្តីមួយចំនួនបានឱ្យដឹងថា ពួកគេបានព្យាយាមត្រលប់ទៅធ្វើការនៅក្រសួងអស់រយៈពេលជាច្រើនសប្តាហ៍ ចាប់តាំងពីក្រុមតាលីបង់បានចូលមកកាន់កាប់កាលពីខែមុន ប៉ុន្តែពួកគេត្រូវបានប្រាប់ឱ្យត្រលប់ទៅកាន់ផ្ទះវិញ ខណៈដែលស្លាកសញ្ញានៅខាងក្រៅក្រសួងកិច្ចការនារី ត្រូវបានជំនួសមកវិញដោយក្រសួងលើកតម្កើងគុណធម៌ និងការពារឧក្រិដ្ឋកម្ម។
ទីភ្នាក់ងារសារព័ត៌មាន Reuters បានស្រង់សម្ដីអ្នកតវ៉ាម្នាក់ អ្នកស្រី Baseera Tawana ដែលបានថ្លែងថា៖ «ក្រសួងកិច្ចការនារី ត្រូវតែបើកដំណើរការឡើងវិញ។ ការដកស្ត្រីចេញ គឺមានន័យថា ជាការដកធនធានមនុស្សចេញ»។
បាតុករមួយរូបទៀត អ្នកស្រី Taranum Sayeedi បានឱ្យដឹងផងដែរថា៖ «អ្នកមិនអាចបំបិទសំឡេងរបស់ស្ត្រីអាហ្វហ្គានីស្ថានតាមរយៈការទុកឱ្យពួកគេនៅផ្ទះ ដាក់កម្រិតលើពួកគេ ក៏ដូចជាការមិនអនុញ្ញាតឱ្យពួកគេទៅសាលារៀនបាននោះទេ»។
អ្នកស្រីបន្ថែមថា៖ «ស្ត្រីអាហ្វហ្គានីស្ថានសព្វថ្ងៃនេះ មិនមែនជាស្ត្រីកាលពី២៦ឆ្នាំមុននោះទេ»។
គួរបញ្ជាក់ថា ក្រុមតាលីបង់ កាលពីពេលកន្លងទៅ ធ្លាប់បានលើកឡើងថា ពួកគេចង់បានសន្តិភាព មិនសងសឹកប្រឆាំងនឹងសត្រូវចាស់ៗ ហើយនឹងគោរពសិទ្ធិស្ត្រីក្នុងក្របខណ្ឌច្បាប់អ៊ីស្លាម។
ទោះជាយ៉ាងណា បណ្ដាប្រទេសនានាហាក់មិនមានការជឿជាក់លើការអះអាងនេះទេ ខណៈសហរដ្ឋអាមេរិក កាលពីពេលកន្លងទៅ ក៏ធ្លាប់ទទួលបានរបាយការណ៍ថា បុគ្គលិកជាស្រ្ដីរបស់អង្គការសហប្រជាជាតិ និងដៃគូជំនួយអាមេរិកមួយចំនួនត្រូវបានហាមឃាត់មិនឱ្យចូលមកក្នុងការិយាល័យផងដែរ៕
