លោកនាយករដ្ឋមន្ត្រី ហ៊ុន សែន បានអំពាវនាវដល់តុលាការពិចារណាទម្លាក់ចោលការចោទប្រកាន់ទៅលើអ្នកស្រាវជ្រាវសង្គម លោកបណ្ឌិត សេង សារី ដោយថា ការអត្ថាធិប្បាយបែបវិភាគរបស់បណ្ឌិតរូបនេះជាការវិភាគបែបសេណារីយ៉ូ មិនមែនគាំទ្រគំនិតបង្កើតរដ្ឋាភិបាលបង្រួបបង្រួមជាតិដែលផ្តួចផ្តើមដោយអតីតមេដឹកនាំបក្សប្រឆាំងនោះទេ។
ក្នុងពិធីបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ដល់កុមារ នាថ្ងៃទី១៧ ខែកញ្ញា ឆ្នាំ២០២១ លោក ហ៊ុន សែន បានថ្លែងថា តុលាការបានចេញដីការួចហើយ ដើម្បីតាមចាប់ខ្លួនបណ្ឌិតមួយរូបដែលនិយាយគោលការណ៍៦ចំណុច គាំទ្រអតីតបក្សប្រឆាំងនៅក្រៅប្រទេស ពីលទ្ធភាពបង្កើតរដ្ឋាភិបាលបង្រួបបង្រួមជាតិយកតាមលំនាំប្រទេសភូមា ដើម្បីប្រឆាំងនឹងរដ្ឋាភិបាលរបស់លោក។
លោកនាយករដ្ឋមន្ត្រីថ្លែងថា៖ «ខ្ញុំបានជាបង្ហើបទៅហើយ អាហ្នឹងមានដីកាចាប់ខ្លួន មើលយកវាមកសួរមើល៍! អា៦ចំណុចជាលក្ខខណ្ឌសម្រាប់បង្កើតរដ្ឋាភិបាលនៅក្រៅប្រទេស ហ្អែងលើកទឹកចិត្តបង្កើត? ហ្អែងបង្កើត ហ្អែងគុក! មិនមែនត្រឹមតែគុកទេ ដែលហៅថាចលនាឧទ្ទាម គេបាញ់ផង! គេឃើញ គេបាញ់! មិនមែនជាសិទ្ធិបញ្ចេញមតិទេ សូមបញ្ជាក់ឱ្យហើយអារឿងក្របខណ្ឌនយោបាយផ្សេង អាចលនាប្រដាប់អាវុធផ្សឹង ព្រោះគេធ្វើតាមបែបភូមា»។
តែយ៉ាងណា ៣ថ្ងៃបន្ទាប់ ពោលគឺនៅថ្ងៃទី២០ ខែកញ្ញានេះ លោកនាយករដ្ឋមន្ត្រី ហ៊ុន សែន បានបង្ហោះសារនៅលើហ្វេសប៊ុករបស់លោកថា ក្រោយពីបានស្តាប់ដោយយកចិត្តទុកដាក់នូវការសម្ភាសន៍របស់លោកបណ្ឌិត សេង សារី ជាមួយកាសែត The Cambodia Daily នៅថ្ងៃទី១៨ ខែកញ្ញា ឆ្នាំ២០២១ លោកកត់សម្គាល់ថា ការបកស្រាយពន្យល់អំពីគោលបំណងនៃការវិភាគអំពីសេណារីយ៉ូ ៦ចំណុច កាលពីថ្ងៃទី២១ ខែកក្កដា ឆ្នាំ២០២១ ថា «ជាការវិភាគបែបសេណេរីយ៉ូ» ហើយការបកស្រាយនេះមានលក្ខណៈសមហេតុផល និងអាចទទួលយកបាន។
ករណីនេះ លោកបានគូសបញ្ជាក់ថា៖ «ក្នុងនាមប្រមុខនៃរាជរដ្ឋាភិបាលកម្ពុជា ខ្ញុំសូមអំពាវនាវឱ្យស្ថាប័នតុលាការពិនិត្យពិចារណាក្នុងការបញ្ឈប់ដីកាចាប់ខ្លួនលោកបណ្ឌិត សេង សារី»។
អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ មិនអាចសុំការអត្ថាធិប្បាយបានទេជុំវិញសារអំពាវនាវរបស់លោកនាយករដ្ឋមន្ត្រីនេះ។
អ្នកវិភាគសង្គម លោកបណ្ឌិត សេង សារី ក៏ពុំអាចសុំការអត្ថាធិប្បាយបានដែរនៅថ្ងៃនេះ។
នាយករងអង្គការឃ្លាំមើលការរំលោភសិទ្ធិមនុស្សលីកាដូ លោក អំ សំអាត សាទរចំពោះសារអំពាវនាវរបស់លោកនាយករដ្ឋមន្ត្រី ដែលឱ្យបញ្ឈប់ការតាមចាប់ខ្លួនអ្នកវិភាគបញ្ហាសង្គមរូបនេះ។ លោកបន្តថា ក្រោយពីអ្នកវិភាគ លោកបណ្ឌិត កែម ឡី ត្រូវបានគេបាញ់សម្លាប់មក មានអ្នកវិភាគតិចតួចណាស់ដែលនៅបន្តចូលរួមវិភាគទានគំនិតសម្រាប់ជាមូលដ្ឋានពិចារណា ដើម្បីដោះស្រាយបញ្ហាសង្គម។
លោកថា៖ «ចំណុចនេះហើយដែលពីមុនមកយើងតែងតែអំពាវនាវ បានន័យថា ទទូចដល់តុលាការសូមឱ្យពិនិត្យពិចារណាថាអ្វីជាសេរីភាពក្នុងការផ្តល់គំនិតនិងការបញ្ចេញមតិ! អ្វីជាបទល្មើស! មុនឈានដល់ការចោទប្រកាន់នោះ»។
អ្នកឃ្លាំមើលសិទ្ធិមនុស្សរូបនេះយល់ថា មតិរិះគន់ រួមទាំងការវិភាគបែបវិទ្យាសាស្ត្រ ជាធាតុចូលដ៏សំខាន់សម្រាប់ជំរុញដល់តម្លាភាពនិងយុត្តិធម៌សង្គម។
បន្ថែមពីនេះ លោកក៏បានលើកទឹកចិត្តឱ្យលោក សេង សារី បន្តកិច្ចការស្រាវជ្រាវនិងវិភាគបញ្ហាសង្គមបន្តទៀត ដើម្បីជាប្រយោជន៍ដល់ការសិក្សាស្រាវជ្រាវផ្នែកវិទ្យាសាស្ត្រសង្គម។
លោកនាយករដ្ឋមន្ត្រី ហ៊ុន សែន ក៏បានអំពាវនាវដល់ភរិយា កូន និងឪពុកម្តាយរបស់លោកបណ្ឌិត សេង សារី កុំឱ្យមានការព្រួយបារម្ភពីរឿងនេះផងដែរ៕
