សកម្មជន​ដីធ្លី​ លោក​ ឆន​ ផល្លា​ ត្រូវ​សមត្ថ​កិច្ច​ស្រុក​លំផាត់​​​ចាប់​ខ្លួន​

លោក ឆន ផល្លា ក្នុងសន្និសីទសារព័ត៌មានថ្ងៃទី១៦ ខែកក្កដា ឆ្នាំ២០២០ នៅទីស្នាក់ការអង្គការខុមហ្វ្រែល ក្រុងភ្នំពេញ។ (ជន ចាន់រ៉ែន)

សមាគម​អាដហុក អះអាងថា សមត្ថកិច្ច​​​ស្រុកលំផាត់ ខេត្ត​រតនគិរី បាន​ចាប់ខ្លួនសកម្មជនដីធ្លីនិងបរិស្ថាន លោក ឆន ផល្លា នៅព្រឹកថ្ងៃចន្ទនេះ ទាំងមិនបង្ហាញដីកា។

អ្នក​សម្រប​សម្រួលស​មាគមការពារសិទ្ធិមនុស្សអាដហុកប្រចាំខេត្តរតនគិរី លោក ឌិន ខន្នី បាន​ឱ្យ​ដឹង​​​​ថា សមត្ថកិច្ច​បាន​ចាប់​ខ្លួនលោក ឆន ផល្លា នៅម៉ោងជាង១១​ព្រឹកថ្ងៃទី២០ ខែ​កញ្ញា​នេះ។

តែយ៉ាងណា លោកមិនទាន់ដឹងមូលហេតុពិត​នៃការចាប់ខ្លួនលោក ឆន ផល្លា ទេ ដោយគ្រាន់តែដឹងថា មុនការចាប់ខ្លួនសកម្មជនការពារដីធ្លីរូបនេះ មន្ត្រីប៉ុស្តិ៍នគរបាល​ឃុំសេដា បាន​​ជូនដំណឹងឱ្យ​លោក ឆន ផល្លា ទៅកាន់ប៉ុស្តិ៍​នគរបាល​ ដើម្បីកែស​ម្រួ​​លអត្តសញ្ញាណបណ្ណ ត្រៀមខ្លួនបោះឆ្នោតនៅពេល​ខាងមុខ។

លោកថា៖ «ទៅដល់ប៉ុស្តិ៍សេដាហ្នឹង បានគេធ្វើការចាប់ខ្លួន! ហើយការចាប់ខ្លួននេះ បើតាមសាច់ញាតិរបស់គាត់​ម្នាក់និងប្រពន្ធរបស់គាត់ផ្ទាល់ហ្នឹង បាននិយាយថា ការចាប់ខ្លួនហ្នឹងអត់មានបង្ហាញដីកាចាប់ខ្លួន​អី​ទេ! គឺនៅពេល​ដែលលោក ឆន ផល្លា ទៅដល់ប៉ុស្តិ៍​ភ្លាម​ គឺ​ចាប់​ខ្លួន​វាយ​ខ្នោះដាក់ឡានយកទៅតែម្តង»។ 

VOD មិនអាចទាក់ទងអធិការស្រុកលំផាត់ ដើម្បីបញ្ជាក់ករណីចាប់ខ្លួននេះបាននៅឡើយទេ។

បើតាមមន្ត្រីសមាគម​អាដហុក លោក​ ឆន ផល្លា បាន​ធ្វើ​សកម្មភាពនានាដើម្បី​​ការ​ពារ​ដីធ្លីនិងបរិស្ថាន​ចាប់ពីឆ្នាំ២០១៧មក ហើយកន្លងមក លោក​ក៏ធ្លាប់​​បានប្តឹងមន្ត្រីមួយចំនួនទៅតុលាការ ពាក់ព័ន្ធ​ការ​រំលោភ​ដីសាធារណៈ​របស់​រដ្ឋ និង​បទ​ល្មើស​ព្រៃឈើនៅ​តំបន់​នោះ។ ក្រោយ​មក​ នៅអំឡុង​​ឆ្នាំ​២០២០ លោក​ក៏ត្រូវបានគេ​ព្រួត​វាយនិង​បណ្តេញ​ចេញពីភូមិផងដែរ៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered