មន្រ្តីរបស់ប្រទេសកាតាមួយរូបបានឱ្យដឹងថា ជើងហោះហើរពិសេសទី៤ ដែលដឹកជនស៊ីវិលពីអាហ្វហ្គានីស្ថានទៅកាន់កាតា គិតចាប់តាំងពីកងកម្លាំងអាមេរិកបានដកកាលពីខែមុន បានចាកចេញពីទីក្រុងកាប៊ុលហើយកាលពីថ្ងៃអាទិត្យម្សិលមិញ ជាមួយនឹងអ្នកដំណើរជាង២៣០នាក់ ក្នុងនោះមានជនជាតិអាហ្វហ្គានីស្ថាន ជនជាតិអាមេរិក និងជនជាតិអឺរ៉ុបផ្សេងទៀត។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ជំនួយការរដ្ឋមន្ត្រីការបរទេសកាតា អ្នកស្រី Lolwah Rashid Al Khater ដែលបានបង្ហោះនៅលើបណ្តាញសង្គម Twitter ថាជើងហោះហើររបស់ក្រុមហ៊ុនអាកាសចរណ៍ កាតាអ៊ែរវ៉េ (Qatar Airways) ក៏មានដឹកពលរដ្ឋអាល្លឺម៉ង់ បែលហ្ស៊ិក អៀរឡង់ កាណាដា បារាំង អ៊ីតាលី អង់គ្លេស ហ្វាំងឡង់ និងហូឡង់ ផងដែរ។
មន្រ្តីរបស់ប្រទេសកាតាមួយរូបទៀតបន្ថែមថា ជើងហោះហើរពិសេសទី៤ ដែលមានអ្នកដំណើរសរុបចំនួន២៣៦នាក់នេះ គឺជាជើងហោះហើរជម្លៀសដ៏ធំបំផុត គិតចាប់តាំងពីសកម្មភាពដកទ័ពរបស់អាមេរិក និងកងកម្លាំងសម្ព័ន្ធមិត្តបានបញ្ចប់នៅថ្ងៃទី៣១ ខែសីហា។
មន្រ្តីដដែលបន្តថា៖ «កាតានឹងបន្តកិច្ចសហការជាមួយដៃគូអន្តរជាតិនានាលើកិច្ចខិតខំប្រឹងប្រែងដែលធានានូវសេរីភាពនៃការបម្លាស់ទីនៅអាហ្វហ្គានីស្ថាន ខណៈដែលខ្លួនក៏កំពុងតែធ្វើការជាមួយភាគីមួយចំនួនទៀតនៅលើមូលដ្ឋានឆ្ពោះទៅរកការរីកចម្រើនទូទៅសម្រាប់ប្រទេសមួយនេះផងដែរ»។
ទាក់ទិននឹងការជម្លៀសនេះ បណ្ដាប្រទេសជាង៦០ក៏ធ្លាប់បានចេញសេចក្តីថ្លែងការណ៍រួមគ្នាមួយកាលពីពេលកន្លងទៅ ដោយលើកឡើងថា ជនជាតិអាហ្វហ្គានីស្ថាន និងពលរដ្ឋអន្តរជាតិនានាដែលមានបំណងចង់ចាកចេញពីប្រទេសអាហ្វហ្គានីស្ថាន ត្រូវតែទទួលបានការអនុញ្ញាតឱ្យចាកចេញពីប្រទេសនេះ ខណៈដែលអាកាសយានដ្ឋាននិងច្រកព្រំដែនទាំងឡាយក៏ត្រូវតែបើកជានិច្ចផងដែរ៕