ប្រធានសមាគមគ្រូបង្រៀនកម្ពុជាឯករាជ្យ បានបញ្ជាក់ថា ភ្នែកខាងស្តាំរបស់លោក រ៉ុង ឈុន បានឆ្លងកាត់ការវះកាត់រួចរាល់ហើយ ហើយបច្ចុប្បន្នកំពុងសម្រាកព្យាបាលនៅក្នុងពន្ធនាគារ។
អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យ ឱ្យដឹងនៅថ្ងៃទី២០ ខែកញ្ញានេះថា ពន្ធនាគារព្រៃសបានបញ្ជូនលោក រ៉ុង ឈុន ទៅវះកាត់ភ្នែកខាងស្តាំដែលមានភាពស្រវាំងនិងឈឺរកាំជាយូរឆ្នាំនោះ រួចរាល់ហើយ។ អ្នកស្រីបន្តថា អំឡុងពេលនៃការវះកាត់ភ្នែកលោក រ៉ុង ឈុន នោះ ស្ទើរគ្រប់ផ្នែកនៅក្នុងមន្ទីរពេទ្យនិងពន្ធនាគារបានយកចិត្តទុកដាក់និងមើលថែគាត់ ហើយការចំណាយផ្សេងៗ រួមទាំងថ្លៃវះកាត់ភ្នែកផងនោះជាបន្ទុករបស់ពន្ធនាគារ។
អ្នកស្រីបន្តថា៖ «ទាំងអស់ដែលនៅផ្នែកវះកាត់ គេបានយកចិត្តទុកដាក់ដល់គាត់ ដូច្នេះហើយបានគាត់និយាយថា បានឃើញពួកក្រសួងយកចិត្តទុកដាក់រត់ខ្វែងដៃខ្វែងជើងក្នុងការវះកាត់ភ្នែករបស់គាត់ហ្នឹង។ អ៊ីចឹងក្នុងនាមខ្ញុំជាអ្នកឈរនៅលើចំណុចកណ្តាល ដូច្នេះខ្ញុំត្រូវតែថ្លែងអំណរគុណដល់ពន្ធនាគារនិងពេទ្យភ្នែក ក៏ដូចជាក្រសួងពាក់ព័ន្ធផងដែរ»។
បើទោះជាបែបនេះក្តី អ្នកស្រី អ៊ុក ឆាយ៉ាវី បង្ហាញការសោកស្តាយដែលខាងពន្ធនាគារមិនអនុញ្ញាតឱ្យលោក រ៉ុង ឈុន បានសម្រាកនៅក្នុងមន្ទីរពេទ្យមួយរយៈពេល ក្រោយវះកាត់រួច។
អតីតប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន ត្រូវបានពន្ធនាគារព្រៃស បញ្ជូនមកវះកាត់ភ្នែកខាងស្តាំនៅមន្ទីរពេទ្យមិត្តភាពខ្មែរ-សូវៀត ឬហៅថា មន្ទីរពេទ្យរុស្ស៊ី កាលពីថ្ងៃទី១៥ ខែកញ្ញា។ មួយថ្ងៃបន្ទាប់ក្រោយវះកាត់ លោក រ៉ុង ឈុន ត្រូវបានមន្ត្រីពន្ធនាគារបញ្ជូនមកលាងភ្នែកនិងពិនិត្យសារជាថ្មីម្តងទៀត។
បើតាមអ្នកស្រី អ៊ុក ឆាយ៉ាវី បច្ចុប្បន្ន លោក រ៉ុង ឈុន ដែលជាសមាជិកក្រុមប្រឹក្សាឃ្លាំមើលកម្ពុជាផងនោះ កំពុងសម្រាកព្យាបាលភ្នែកដែលវះកាត់រួចនៅក្នុងពន្ធនាគារ ហើយស្ថានភាពសុខភាពភ្នែករបស់គាត់ហាក់បានល្អប្រសើរជាងមុនបន្តិចហើយ។
វីអូឌី មិនអាចស្នើសុំការបញ្ជាក់បន្ថែមបានភ្លាមៗទេពីលោក នុត សវនា មន្រ្តីនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ នៅថ្ងៃចន្ទនេះ។
នាយករងអង្គការការពារសិទ្ធិមនុស្សលីកាដូ លោក អំ សំអាត យល់ឃើញថា ជារឿងដែលគួរឱ្យចម្លែកសម្រាប់សំណុំរឿងលោក រ៉ុង ឈុន នេះ បើធៀបទៅនឹងរឿងក្តីរបស់ឧកញ៉ាមួយចំនួន ដែលគ្រាន់តែមានជំងឺធម្មតាបែរជាទទួលបានការព្យាបាលនៅក្នុងមន្ទីរពេទ្យយ៉ាងស្រួល។ លោកបន្តថា ថ្វីត្បិតបញ្ហានេះជាការសម្រេចរបស់ក្រុមគ្រូពេទ្យចំពោះស្ថានភាពសុខភាពរបស់អ្នកជំងឺ ប៉ុន្តែលោកយល់ថា លោក រ៉ុង ឈុន គួរទទួលបានការមើលថែដោយម៉ត់ចត់នៅក្នុងមន្ទីរពេទ្យក្រោយវះកាត់ដែរ។
លោកបន្តថា៖ «ចុះឧកញ៉ាហើយនិងអ្នកមានលុយមួយចំនួន ម៉េចក៏គាត់ព្យាបាលនៅនឹងមន្ទីរពេទ្យ ហើយក្រុមគ្រូពេទ្យផ្តល់យោបល់ត្រូវតែសម្រាកនៅមន្ទីរពេទ្យ រហូតដល់តុលាការដោះលែង។ ចុះត្រឹមតែពេលវេលាសមរម្យមួយក្នុងការព្យាបាលសម្រាប់លោកគ្រូ រ៉ុង ឈុន ហេតុអីមិនផ្តល់ឱកាសឱ្យគាត់? ប៉ុន្តែបញ្ហានេះ វាជារឿងមួយដែលយើងគិតថាវិជ្ជាជីវៈរបស់ពេទ្យ តែយ៉ាងណា ជាទង្វើទូទៅដែលប្រជាពលរដ្ឋមើលឃើញ គឺគេរិះគន់តាមរបៀបហ្នឹងហើយ»។
លោក រ៉ុង ឈុន ត្រូវបានតុលាការក្រុងភ្នំពេញ សម្រេចផ្តន្ទាទោសដាក់ពន្ធនាគាររយៈពេល២ឆ្នាំ ក្រោមបទចោទ «ញុះញង់បង្កឱ្យមានភាពវឹកវរដល់សន្តិសុខសង្គម» កាលពីថ្ងៃទី១៨ ខែកញ្ញា ឆ្នាំ២០២១ ក្រោយពីលោកបានរិះគន់លើបញ្ហាការបោះបង្គោលព្រំដែននៅខេត្តត្បូងឃ្មុំ ដែលពលរដ្ឋអះអាងថា អាជ្ញាធរវៀតណាមបានរំលោភយកដីពួកគាត់។
ចំណែកមេធាវីការពារក្តីឱ្យលោក រ៉ុង ឈុន គឺលោក សំ សុគង់ បញ្ជាក់ថា នៅពេលនេះ លោកបានដាក់បណ្តឹងឧទ្ធរណ៍រួចហើយ ដោយស្នើសុំឱ្យតុលាការថ្នាក់កណ្តាលនេះសើរើឡើងវិញ និងទម្លាក់ចោលរាល់ការចោទប្រកាន់ចំពោះសេចក្តីសម្រេចនានារបស់សាលាដំបូងរាជធានីភ្នំពេញ៕
