ប្រជាពលរដ្ឋជាច្រើននៅទីក្រុងហុងកុង បានសម្រេចភៀសខ្លួនទៅកាន់បណ្ដាប្រទេសអឺរ៉ុបនិងប្រទេសជិតខាងផ្សេងទៀត បន្ទាប់ពីការផ្ទេរអធិបតេយ្យភាពទៅឱ្យចិន ស្របពេលដែលគោលនយោបាយជាប្រព័ន្ធរបស់អាជ្ញាធរដែលកំពុងតែកាន់អំណាចបានបំបិទសំឡេងរិះគន់ និងមានការរំលោភសិទ្ធិមនុស្ស ជាដើម។ ពលរដ្ឋហុងកុងត្រូវបង្ខំចិត្តភៀសខ្លួនចេញ ដោយសារតែភាពភ័យខ្លាចក្នុងការក្លាយទៅជាជនរងគ្រោះនៃការសងសឹកទាំងនេះដោយអាជ្ញាធរសន្តិសុខ។
ទាក់ទិននឹងករណីនេះ សកម្មជន អ្នកនយោបាយ និងសិល្បករល្បីៗមួយចំនួន បានរៀបរាប់អំពីទុក្ខលំបាករបស់ពួកគេបណ្ដាលមកពីកង្វះលទ្ធិប្រជាធិបតេយ្យនៅក្នុងប្រទេស ដែលនាំឱ្យពួកគេនិងអ្នកផ្សេងទៀតសម្រេចរត់គេចចេញពីការជិះជាន់នៅហុងកុង ដើម្បីស្វែងរកសេរីភាព នីតិរដ្ឋ និងតម្លៃប្រជាធិបតេយ្យក្នុងប្រទេសដទៃទៀត។
នៅក្នុងបទសម្ភាសជាមួយសារព័ត៌មាន A24 News ម្ចាស់ហាងលក់សៀវភៅមួយកន្លែង លោក Lam Wing Kee បានឱ្យដឹងថា៖ «ក្នុងឆ្នាំ២០១៩ រដ្ឋាភិបាលហុងកុងបានស្នើច្បាប់ធ្វើបត្យាប័ន [Extradition Law Amendment Bill] ដែលធ្វើឱ្យខ្ញុំចាប់ផ្តើមមានការព្រួយបារម្ភអំពីសុវត្ថិភាពរបស់ខ្ញុំ។ សេចក្តីស្នើច្បាប់នេះនឹងអនុញ្ញាតឱ្យហុងកុងធ្វើបត្យាប័នជនសង្ស័យឧក្រិដ្ឋជនដែលមានដូចជារូបខ្ញុំ ទៅកាន់ប្រទេសចិនដីគោក។ ដូច្នេះហើយ ខ្ញុំមិនអាចបន្តនៅទីនោះបានទេ ដោយសារតែវាមានការគំរាមកំហែងដល់សុវត្ថិភាពផ្ទាល់ខ្លួន។»
លោកបន្តថា៖ «ដំបូងឡើយ ខ្ញុំមិនបានគិតអំពីការផ្លាស់មកកាន់តៃវ៉ាន់នោះទេ។ មិត្តភក្តិរបស់ខ្ញុំមួយចំនួននៅប្រទេសអាល្លឺម៉ង់ និងបណ្តាប្រទេសផ្សេងទៀត ដូចជា សហរដ្ឋអាមេរិក និងកាណាដា បានហៅខ្ញុំឱ្យផ្លាស់ទៅទីនោះជាមួយពួកគេ។ មុននឹងធ្វើការសម្រេចចិត្តចុងក្រោយ មិត្តរបស់ខ្ញុំនៅតៃវ៉ាន់បានទាក់ទងតាមរយៈទូរសព្ទមកកាន់ខ្ញុំ ហើយហៅខ្ញុំឱ្យមកតៃវ៉ាន់។ ជាចុងក្រោយ ខ្ញុំសម្រេចផ្លាស់មកកាន់ទីនេះ ពីព្រោះខ្ញុំអាចបន្តធ្វើការនៅក្នុងឧស្សាហកម្មសៀវភៅរបស់ខ្ញុំបាន»។
លោក Lam Wing Kee បានបន្តទៀតថា៖ «ខ្ញុំបានមកកាន់ទីនេះក្នុងដំណើរអាជីវកម្មក្នុងអំឡុងទសវត្សរ៍ទី៩០។ ខ្ញុំបានលក់សៀវភៅដែលផលិតដោយអ្នកបោះពុម្ពផ្សាយក្នុងស្រុកនៅទីនេះទៅកាន់ហុងកុង។ ដើម្បីបន្តអាជីពរបស់ខ្ញុំនេះ ខ្ញុំបានសម្រេចចិត្តបើកហាងលក់សៀវភៅឡើងវិញ ដូច្នេះហើយខ្ញុំសម្រេចចិត្តផ្លាស់ទៅតៃវ៉ាន់»។
លោកបានបន្ថែមថា៖ «ជាការពិតណាស់ អ្វីដែលសំខាន់បំផុតសម្រាប់ខ្ញុំ គឺការរស់នៅក្នុងប្រទេសប្រជាធិបតេយ្យដូចជាតៃវ៉ាន់។ ដូច្នេះ អ្វីដែលខ្ញុំបានរៀបរាប់ទាំងអស់ខាងលើនេះ គឺជាហេតុផលដែលខ្ញុំសម្រេចជ្រើសរើសផ្លាស់ទៅកាន់តៃវ៉ាន់»។
សិល្បករមួយរូប លោក Kacey Wong បានថ្លែងឱ្យដឹងផងដែរថា៖ «ខ្ញុំចាំបានថា ក្នុងអំឡុងការតវ៉ាប្រឆាំងនឹងច្បាប់បត្យាប័ននេះនៅខែមេសា ឆ្នាំ២០១៩ ខ្ញុំបានស្លៀកពាក់ដូចទៅនឹងប៉ូលិសចិនជាមួយមិត្តភក្តិរបស់ខ្ញុំ ដោយកាន់ជាមួយនឹងដំបងប៉ូលិស ហើយព្យាយាមបំភ័យអ្នកតវ៉ាហុងកុង ដោយព្យាយាមធ្វើជាចង់ចាប់ខ្លួនពួកគេ ប៉ុន្តែពួកគេមិនខ្លាចនោះទេ»។
លោកបន្តថា៖ «ត្រលប់មកកាន់ខែមីនា ឆ្នាំ២០២១ បន្ទាប់ពីសមាជិកសភាហុងកុង៥៣នាក់ត្រូវបានចាប់ខ្លួន ខ្ញុំហាក់ដូចជាមានការភ្ញាក់រឭក។ សម្រាប់ខ្ញុំ នោះគឺជាការដាស់ស្មារតីដ៏ធំមួយដើម្បីបង្ហាញថា ហុងកុងនឹងលែងមានច្បាប់និងបទបញ្ជាដែលយើងធ្លាប់បានដឹងថានឹងមានការរីកចម្រើនទៀតហើយ។ នេះជាមូលហេតុដែលខ្ញុំសម្រេចចិត្តចាកចេញពីហុងកុង»៕
