មន្ត្រីសាលាដំបូងខេត្តរតនគិរី បានឱ្យដឹងថា សមត្ថកិច្ចចាប់ខ្លួនលោក ឆន ផល្លា ដែលជាសកម្មជនបរិស្ថាននិងដីធ្លី បញ្ជូនទៅពន្ធនាគារ ដោយសារតែសកម្មជនរូបនោះមិនបានចូលរួមតាមនីតិវិធីកោះហៅរបស់តុលាការ ពាក់ព័ន្ធនឹងសំណុំរឿងកាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ។
ព្រះរាជអាជ្ញារងអមសាលាដំបូងខេត្តរតនគិរី លោក កែវ ភក្ដី ប្រាប់ វីអូឌី នៅថ្ងៃទី២១ ខែកញ្ញានេះថា ដើមចមដែលនាំឱ្យសមត្ថកិច្ចចាប់ខ្លួនលោក ឆន ផល្លា កាលពីថ្ងៃចន្ទម្សិលមិញ ដោយសារសកម្មជនរូបនោះមិនព្រមចូលទៅបំភ្លឺតាមដីកាកោះរបស់ចៅក្រមស៊ើបសួរ ឈ្មោះ នៅ យ៉ារ័ត្ន ចុះថ្ងៃទី៩ ខែកុម្ភៈ ឆ្នាំ២០២១ ពាក់ព័ន្ធនឹងសំណុំរឿង «កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ»។
លោកថា សកម្មភាពឈូសឆាយដីព្រៃនោះត្រូវបានប្រព្រឹត្តឡើងកាលពីឆ្នាំ២០១៩ និង២០២០ ស្ថិតនៅភូមិសាមុតក្រោម ឃុំសេដា ស្រុកលំផាត់ ខេត្តរតនគិរី ហើយសកម្មជនរូបនេះបានគេចខ្លួនមិនទទួលខុសត្រូវចំពោះមុខច្បាប់ បន្ទាប់ពីបានប្រព្រឹត្តល្មើសរួចហើយ។
លោកមានប្រសាសន៍ថា៖ «ពាក់ព័ន្ធជាមួយរឿងហ្នឹង ខ្ញុំក៏អត់ដឹងថាយ៉ាងម៉េចដែរ ព្រោះដោយសារតែការចាប់ខ្លួនគាត់នេះ មែនទែនទៅ តាមចៅក្រមប្រឹក្សាគាត់បានលើកឡើងកាលពីម្សិលមិញ គាត់បានលើកឡើងថា ការចាប់ខ្លួនដោយសារតែតាមការកោះហៅរបស់ចៅក្រមស៊ើបសួរ គាត់[លោក ឆន ផល្លា]អត់មានចូលរួមតាមនីតិវិធី។ ដូច្នេះហើយបានចៅក្រមស៊ើបសួរ គាត់បានចេញដីកាបង្គាប់ឱ្យចាប់ខ្លួន»។
ព្រះរាជអាជ្ញារងរូបនេះបញ្ជាក់ថា បច្ចុប្បន្ន លោក ឆន ផល្លា ត្រូវបានបញ្ជូនទៅឃុំខ្លួននៅពន្ធនាគារខេត្តរតនគិរីជាបណ្តោះអាសន្ន ដើម្បីរង់ចាំជម្រះក្តីនៅព្រឹកថ្ងៃទី២៩ ខែកញ្ញា ឆ្នាំ២០២១ ខាងមុខនេះ។
លោក សំ ទិត្យសីហា មេធាវីការពារក្តីឱ្យលោក ឆន ផល្លា មានប្រសាសន៍ថា សមត្ថកិច្ចបានហៅកូនក្តីលោកទៅប៉ុស្តិ៍នគរបាលឃុំសេដា ដើម្បីធ្វើបច្ចុប្បន្នភាពកែទីលំនៅក្នុងអត្តសញ្ញាណបណ្ណ ប៉ុន្តែនៅពេលទៅដល់ប៉ុស្តិ៍នគរបាលនោះ ស្រាប់តែសមត្ថកិច្ចបានចាប់ខ្លួនគាត់តែម្តង។
មេធាវីចាត់ទុកការចាប់ខ្លួនកូនក្តីនេះថា ធ្វើឡើងដោយខុសនីតិវិធីដែលមានចែងក្នុងក្រមនីតិវិធីព្រហ្មទណ្ឌត្រង់មាត្រា១២ ដោយសារសំណុំរឿងនេះត្រូវបានសាលាឧទ្ធរណ៍សម្រេចបដិសេធចោលម្តងរួចមកហើយ។
លោកថា៖ «ករណីលោក ឆន ផល្លា ត្រូវបានតុលាការសាលាឧទ្ធរណ៍ត្បូងឃ្មុំសម្រេចម្តងហើយ ថាគាត់អត់មានទោស! ហើយយករឿងហ្នឹងមកចោទប្រកាន់ជាលើកទី២។ អ៊ីចឹងវាផ្ទុយនឹងគោលការណ៍មាត្រា១២ នៃក្រមនីតិវិធីព្រហ្មទណ្ឌ គឺអត់អាចចោទប្រកាន់គាត់ជាថ្មីលើបទល្មើសដដែលហ្នឹងបានទៀតទេ»។
បន្ថែមពីនេះ មេធាវីការពារក្តីឱ្យលោក ឆន ផល្លា អះអាងថា នឹងតស៊ូមតិតាមផ្លូវច្បាប់ ដើម្បីទាមទារឱ្យចៅក្រមសាលាដំបូងខេត្តរតនគិរី ទម្លាក់ចោលការចោទប្រកាន់ និងដោះលែងកូនក្តីឱ្យមានសេរីភាពវិញ។
កាលពីថ្ងៃទី២៨ ខែឧសភា ឆ្នាំ២០២០ ព្រះរាជអាជ្ញារងនៃអយ្យការអមសាលាដំបូងខេត្តរតនគិរី លោក រ៉ា បូរ៉ាន់ឌី បានប្តឹងលោក ឆន ផល្លា ទៅសាលាឧទ្ធរណ៍ខេត្តត្បូងឃ្មុំ ដោយចោទសកម្មជនបរិស្ថាននិងដីធ្លីរូបនោះថា កាប់គាស់ រុករាន ឆ្ការដុត និងឈូសឆាយដីព្រៃយកធ្វើជាកម្មសិទ្ធិ។
ក្រោយមក នៅថ្ងៃទី២១ ខែតុលា ឆ្នាំ២០២០ ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ខេត្តត្បូងឃ្មុំ លោក វ៉េង ប៊ុនធឿន បានសម្រេចចេញសាលដីកាបដិសេធចោល ជុំវិញពាក្យបណ្តឹងឧទ្ធរណ៍របស់ព្រះរាជអាជ្ញារងនៃអយ្យការអមសាលាដំបូងខេត្តរតនគិរី កាលពីថ្ងៃទី២៨ ខែឧសភា ឆ្នាំ២០២០ ដោយចាត់ទុកបណ្តឹងនោះផ្ទុយនឹងគតិច្បាប់។
ព្រះរាជអាជ្ញារងនៃអយ្យការអមសាលាដំបូងខេត្តរតនគិរី លោក រ៉ា បូរ៉ាន់ឌី អះអាងប្រាប់ វីអូឌី នៅថ្ងៃនេះថា រូបលោកមិនបានដឹងរឿងចាប់ខ្លួនលោក ឆន ផល្លា នោះទេ ដោយថា លោកបានប្តូរទៅកាន់នៅខេត្តក្រចេះវិញហើយ។ ករណីនេះ លោកសុំមិនធ្វើការបកស្រាយអ្វីបន្ថែមទៀតនោះទេ។
ប្រធានសមាគមការពារសិទ្ធិមនុស្សអាដហុក លោក នី សុខា ដែលតាមដានករណីនេះ មានប្រសាសន៍ថា សាលាដំបូងខេត្តរតនគិរី ត្រូវដោះលែងលោក ឆន ផល្លា ឱ្យមានសេរីភាពវិញ ព្រោះសកម្មជនរូបនោះមិនបានធ្វើខុសដូចការចោទប្រកាន់នោះទេ ហើយសំណុំរឿងនេះក៏ត្រូវបានសាលាឧទ្ធរណ៍ត្បូងឃ្មុំធ្លាប់បដិសេធរាល់ការចោទប្រកាន់ទៅលើគាត់រួចទៅហើយដែរ។
លោក នី សុខា បញ្ជាក់ថា បើសិនជាចៅក្រមសាលាដំបូងខេត្តរតនគិរី មិនដោះលែងលោក ឆន ផល្លា ឱ្យមានសេរីភាពវិញទេ នឹងធ្វើឱ្យពលរដ្ឋអស់ជំនឿលើប្រព័ន្ធយុត្តិធម៌នៅកម្ពុជា។
លោកមានប្រសាសន៍ថា៖ «ប្រសិនបើលោក ផល្លា ត្រូវទទួលរងនូវការចោទប្រកាន់ពីបទកាប់រុនរានដីព្រៃខុសច្បាប់ ខ្ញុំគិតថា ជាសញ្ញាមួយដែលមិនល្អទេ ហើយដែលវាជាសញ្ញាមួយ សារមួយបង្ហាញទៅដល់ប្រជាពលរដ្ឋផ្សេងទៀតដែលគេខិតខំធ្វើការការពារ ជាអ្នកចេញមុខការពារធនធានជាសម្បត្តិធម្មជាតិព្រៃឈើ បែរជាទទួលរងនូវការចោទប្រកាន់ទៅវិញ។ អ៊ីចឹងហើយវាជាសញ្ញាមួយបង្ហាញទៅដល់សាធារណជន ក៏ដូចជាធ្វើឱ្យសាធារណជនមានការងឿងឆ្ងល់ ក៏ដូចមានការរិះគន់ទៅលើប្រព័ន្ធយុត្តិធម៌យើងដែរ»។
លោក ឆន ផល្លា ដែលមានវ័យ៤២ឆ្នាំ ធ្លាប់បានប្រាប់ វីអូឌី នាពេលកន្លងមកថា រូបលោកបានចូលរួមការពារព្រៃឈើតាំងពីឆ្នាំ២០១៦ ប៉ុន្តែចាប់តាំងពីឆ្នាំ២០១៧មក លោកធ្លាប់បានដាក់ពាក្យប្តឹងចំនួន៨ករណីទៅតុលាការប្រឆាំងនឹងមន្ត្រីមូលដ្ឋាននិងពលរដ្ឋមួយចំនួនទៀត ពាក់ព័ន្ធនឹងបទល្មើសព្រៃឈើនិងការទន្រ្ទានដីសហគមន៍ ប៉ុន្តែលោកថា ប្រមាណ៤ឆ្នាំមកនេះគ្មានបណ្ដឹងណាមួយរបស់លោកត្រូវបានចាត់ការនោះឡើយ។
មិនតែប៉ុណ្ណោះ លោកថា កាលពីខែកក្កដា ឆ្នាំ២០២០ លោកធ្លាប់ត្រូវបានមនុស្សមួយក្រុមព្រួតគ្នាវាយដំយ៉ាងធ្ងន់ធ្ងរនៅចំពោះមុខអាជ្ញាធរមូលដ្ឋានក្នុងវេទិកាសាធារណៈមួយ នៅពេលដែលលោកបានចោទសួរទៅកាន់អាជ្ញាធរពាក់ព័ន្ធការបណ្តែតបណ្តោយឱ្យមានបទល្មើសព្រៃឈើកើតឡើងនៅក្នុងតំបន់គ្រប់គ្រងរបស់ខ្លួន៕
