ស្ថានទូតកម្ពុជាប្រចាំប្រទេសឡាវ អំពាវនាវដល់ប្រជាពលរដ្ឋ ពលករ និងនិសិ្សតខ្មែរ ដែលកំពុងរស់នៅនិងធ្វើការនៅប្រទេសឡាវ ប្រុងប្រយ័ត្នការឆ្លងជំងឺកូវីដ-១៩ និងចៀសវាងទៅកាន់តំបន់ដែលរដ្ឋបាលរដ្ឋធានីវៀងចន្ទន៍ហាមឃាត់ ខណៈប្រទេសនេះកំពុងមានការឆ្លងរាលដាលជំងឺផ្លូវដង្ហើមនេះខ្លាំង។
សេចក្តីជូនដំណឹងរបស់ស្ថានឯកអគ្គរាជទូតកម្ពុជាប្រចាំសាធារណរដ្ឋប្រជាធិបតេយ្យប្រជាមានិតឡាវ ចុះថ្ងៃទី២០ ខែកញ្ញា ឆ្នាំ២០២១ បានលើកឡើងថា ផ្អែកតាមស្ថានភាពជំងឺកូវីដ-១៩ រីករាលដាលចូលសហគមន៍ក្នុងរដ្ឋធានីវៀងចន្ទន៍កាន់តែមានកំណើនច្រើនឡើងនៅតាមភូមិ-ឃុំ និងរោងចក្រមួយចំនួន បង្កឱ្យមានហានិភ័យខ្ពស់ដែលពិបាកគ្រប់គ្រងនិងទប់ស្កាត់។
ករណីនេះ ស្ថានទូតខ្មែរប្រចាំប្រទេសឡាវបានអំពាវនាវថា៖ «សូមបងប្អូនប្រជាពលរដ្ឋ ពលករ និស្សិតខ្មែរទាំងអស់ មេត្តាជ្រាបជាព័ត៌មាន និងសូមប្រុងប្រយ័ត្នកុំទៅកាន់តំបន់ដែលរដ្ឋបាលរដ្ឋធានីវៀងចន្ទន៍ហាមឃាត់ និងបន្តអនុវត្តតាមវិធានការក្រសួងសុខាភិបាលនិងរបស់រាជរដ្ឋាភិបាលកម្ពុជា ៣កុំ ៣ការពារ ដើម្បីបង្ការនិងទប់ស្កាត់ការរីករាលដាលជំងឺកូវីដ-១៩ឱ្យមានប្រសិទ្ធភាព»។
បើតាមសេចក្តីជូនដំណឹងដដែលនេះ រដ្ឋបាលរដ្ឋធានីវៀងចន្ទន៍បានដាក់ចេញនូវបទបញ្ជាបិទខ្ទប់តឹងរ៉ឹងមួយចំនួន ដើម្បីគ្រប់គ្រង ការពារ និងទប់ស្កាត់ការឆ្លងរាលដាលជំងឺកូវីដ-១៩នេះ ក្នុងនោះរួមមាន បុគ្គលិករដ្ឋ ឯកជន និងអង្គការ ត្រូវធ្វើការនៅផ្ទះ ចាប់ពីថ្ងៃទី២០ ដល់ ថ្ងៃទី៣០ ខែកញ្ញា ឆ្នាំ២០២១ លើកលែងតែមន្ត្រីនគរបាល ទាហាន បុគ្គលិកពន្លត់អគ្គិភ័យ ពេទ្យ និងរដ្ឋាករទឹក និងបិទការធ្វើអាជីវកម្ម ការប្រជុំ ពិធីបុណ្យប្រពៃណី សហគ្រាស រោងចក្រកាត់ដេរ និងគម្រោងការផ្សេងៗ និងមិនអនុញ្ញាតឱ្យលក់ដូរតាមចិញ្ចើមផ្លូវដាច់ខាត។
រដ្ឋបាលរដ្ឋធានីវៀងចន្ទន៍ ក៏ហាមការធ្វើដំណើរចេញតាមដងវិថីនិងហាមចេញក្រៅផ្ទះបើមិនមានករណីចាំបាច់ និងហាមការធ្វើដំណើរចេញចូលសង្កាត់ហានិភ័យចំនួន៧ និងហាមការធ្វើដំណើរចូលក្រុងវៀងចន្ទន៍។ ក្រៅពីនោះ អាជ្ញាធររដ្ឋធានីវៀងចន្ទន៍ក៏បានបញ្ជាឱ្យបិទសាលារៀន ហាមលេងកីឡាគ្រប់ប្រភេទ និងបិទច្រកមួយចំនួន។
រដ្ឋបាលក្រុងវៀងចន្ទន៍ បញ្ជាក់ថា បទបញ្ជានេះនឹងចាប់អនុវត្តចាប់ពីថ្ងៃទី១៩ ដល់ថ្ងៃទី៣០ ខែកញ្ញា ឆ្នាំ២០២១ ហើយក្នុងករណីជនណាល្មើសនឹងបទបញ្ជានេះ នឹងត្រូវផាកពិន័យចាប់ពី៣លានគីប ទៅ១០លានគីប។
បើតាមទីភ្នាក់ងារសារព័ត៌មាន AFP គិតមកដល់ថ្ងៃចន្ទម្សិលមិញ ប្រទេសឡាវបានកត់ត្រានូវករណីឆ្លងជំងឺកូវីដ-១៩សរុបនៅទូទាំងប្រទេសចំនួន១៩ ៣៩៩ករណី ក្នុងនោះមានអ្នកស្លាប់១៦នាក់ និងជាសះស្បើយវិញជិត៦ ០០០នាក់៕
