ក្រសួងសុខាភិបាល គ្រោងអនុញ្ញាតឱ្យបើកផ្សារទំនើប និងផ្សារសាធារណៈទាំងអស់នៅក្នុងក្របខណ្ឌទូទាំងប្រទេស ប៉ុន្តែត្រូវអនុវត្តតាមនីតិវិធីប្រតិបត្តិស្តង់ដារសុវត្ថិភាព ដែលក្រសួងទេសចរណ៍កំពុងរៀបចំ។
យោងតាមលិខិតរបស់រដ្ឋមន្ត្រីក្រសួងសុខាភិបាល ចុះថ្ងៃទី២២ ខែកញ្ញានេះ លោករដ្ឋមន្ត្រី ម៉ម ប៊ុនហេង បានបង្គាប់ឱ្យរដ្ឋមន្ត្រីក្រសួងទេសចរណ៍ រៀបចំនីតិវិធីប្រតិបត្តិស្តង់ដារនេះសម្រាប់ដាក់ឱ្យអនុវត្តនៅផ្សារទំនើប និងផ្សារសាធារណៈទាំងអស់នៅទូទាំងប្រទេស។
ក្រសួងសុខាភិបាល បានពិនិត្យឃើញថា ដោយសារស្ថានភាពនៃការរាតត្បាតជំងឺកូវីដ-១៩ មានសភាពធូរស្រាល និងដើម្បីជំរុញដំណើរការសេដ្ឋកិច្ច និងសង្គមទាំងមូលទៅតាមគន្លងប្រក្រតីភាពថ្មី។ ប៉ុន្តែក្រសួងថា ការបើកដំណើរការឡើងវិញនេះ តម្រូវឱ្យផ្សារទំនើប និងផ្សារសាធារណៈទាំងអស់ ត្រូវអនុវត្តតាមនីតិវិធីប្រតិបត្តិស្តង់ដារ ដែលផ្តោតទាំងទៅលើវិធានសុខាភិបាល វិធានការរដ្ឋបាល និងវិធានការច្បាប់ ដើម្បីធានាបានទាំងផ្នែកសុខភាពសាធារណៈ និងទាំងការងើបឡើងវិញនៃសេដ្ឋកិច្ចជាតិ។
គួរជម្រាបជូនថា នៅរយៈពេលជាច្រើនសប្តាហ៍មកនេះ ចំនួនអ្នកឆ្លងជំងឺកូវីដ-១៩ នៅកម្ពុជា ជាមធ្យមជាង ៦០០នាក់ នៅក្នុងមួយថ្ងៃ។ គិតត្រឹមថ្ងៃទី២១ ខែកញ្ញា ចំនួនអ្នកឆ្លងជំងឺកូវីដ-១៩ នៅកម្ពុជាសរុប ១០៥ ៣៤៤ នាក់ ស្លាប់ ២ ១៤០នាក់ និងកំពុងសម្រាកព្យាបាលចំនួន ៧ ១៥៨ នាក់ប៉ុណ្ណោះ៕
