មន្ត្រីជាន់ខ្ពស់ក្រសួងពាណិជ្ជកម្មកម្ពុជា ថ្លែងថា សេចក្តីព្រាងច្បាប់ ស្តីពី «ការប្រកួតប្រជែង» ដែលទើបនឹងត្រូវបានព្រឹទ្ធសភាអនុម័តកាលពីពេលថ្មីៗនេះ អាចជួយធានាគុណភាពទំនិញ និងសុខុមាលភាពអ្នកប្រើប្រាស់ ដោយក្នុងនោះ ច្បាប់នេះនឹងបង្កើតឱ្យមានទីលានប្រកួតប្រជែងដោយស្មើភាពគ្នា ហើយធ្វើឱ្យទំនិញនិងសេវា មានតម្លៃទាប មានគុណភាពល្អប្រសើរ មានជម្រើសច្រើន សម្រាប់អ្នកប្រើប្រាស់។
ការលើកឡើងនេះ ក្រោយពេលក្រសួងពាណិជ្ជកម្មបានរៀបចំកិច្ចប្រជុំអន្តរក្រសួង ដើម្បីការពារសេចក្តីព្រាងច្បាប់សំខាន់ៗចំនួន៣ ក្នុងសម័យប្រជុំពេញអង្គព្រឹទ្ធសភា លើកទី៧ នីតិកាលទី៤ កាលពីថ្ងៃទី២០ ខែកញ្ញាកន្លងទៅ។
សេចក្តីព្រាងច្បាប់ទាំង៣នោះ មានដូចជា សេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់(អាសិប), សេចក្តីព្រាងច្បាប់ ស្តីពី ការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីរវាងរាជរដ្ឋាភិបាលកម្ពុជា-រដ្ឋាភិបាលចិន និងសេចក្តីព្រាងច្បាប់ស្តីពីការប្រកួតប្រជែង។
ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ក្រសួងពាណិជ្ជកម្ម លោក ផាន អូន ថ្លែងប្រាប់ VOD តាមប្រព័ន្ធទំនាក់ទំនងតេឡេក្រាមនៅថ្ងៃទី២២ ខែកញ្ញានេះថា គោលបំណងនៃការបង្កើតច្បាប់ ស្តីពី ការប្រកួតប្រជែងនេះឡើង គឺដើម្បីលើកកម្ពស់ដំណើរការ និងប្រតិបត្តិការនៃសេដ្ឋកិច្ចទីផ្សារប្រកួតប្រជែងឱ្យកាន់តែមានប្រសិទ្ធភាព តាមរយៈការបង្កើតឱ្យមានទីលានប្រកួតប្រជែងដោយស្មើភាពរវាងគូប្រកួតប្រជែង។
លោក ផាន អូន បន្តថា៖ «ក្នុងន័យនេះ គូប្រកួតប្រជែងនៅក្នុងទីផ្សារ នឹងព្យាយាមប្រកួតប្រជែងគ្នាដោយស្មើភាព តាមរយៈការធ្វើឱ្យទំនិញ និងសេវារបស់ខ្លួន មានតម្លៃទាប មានគុណភាពល្អប្រសើរ មានជម្រើសច្រើន សម្រាប់អ្នកប្រើប្រាស់ និងជំរុញឱ្យមានការច្នៃប្រឌិត ឬការបង្កើតធុរកិច្ចថ្មីៗ។ ជាលទ្ធផលចុងក្រោយ អ្នកប្រើប្រាស់ទទួលបាននូវផលប្រយោជន៍និងកិច្ចការពារនានា»។
យ៉ាងណា លោកថា ច្បាប់ស្តីពីការប្រកួតប្រជែងនេះ មិនមានវិសាលភាពអនុវត្តទោសទណ្ឌចំពោះម្ចាស់អាជីវកម្មណា ដែលលក់ផលិតផលក្លែងក្លាយ ឬខូចគុណភាពនោះទេ ប៉ុន្តែច្បាប់នេះ មានវិសាលភាពអនុវត្តចំពោះបុគ្គលធ្វើសកម្មភាពធុរកិច្ច ដែលបានចូលរួមក្នុងការព្រមព្រៀង ការបំពានលើជំហរឧត្តមភាពលើទីផ្សារ និងការរួមបញ្ចូលគ្នានៃធុរកិច្ច ដែលរារាំង រឹតត្បិត ឬបង្ខូចដល់ការប្រកួតប្រជែងនៅក្នុងទីផ្សារកម្ពុជា។
លោកបន្តថា៖ «សម្រាប់ការដាក់ទោសទណ្ឌទៅលើម្ចាស់អាជីវកម្មដែលលក់ផលិតផលក្លែងក្លាយ ឬខូចគុណភាព គឺត្រូវអនុវត្តតាមទោសទណ្ឌ ដែលមានចែងក្នុងច្បាប់ចំនួន៣ រួមមាន៖ ច្បាប់ស្តីពីកិច្ចការពារអ្នកប្រើប្រាស់, ច្បាប់ស្តីពីម៉ាក ពាណិជ្ជនាម និងការប្រកួតប្រជែងមិនស្មោះត្រង់ និងចុងក្រោយគឺច្បាប់ស្តីពីការគ្រប់គ្រងគុណភាព សុវត្ថិភាព លើផលិតផលទំនិញ និងសេវា»។
អ្នកនាំពាក្យព្រឹទ្ធសភា លោក ម៉ម ប៊ុននាង មានប្រសាសន៍ថា ព្រឹទ្ធសភាបានអនុម័តសេចក្តីព្រាងច្បាប់ស្តីពីការប្រកួតប្រជែងរួចអស់ហើយ កាលពីថ្ងៃទី២១ ខែកញ្ញា ម្សិលមិញ និងបានបញ្ជូនត្រឡប់ទៅរដ្ឋសភារួចហើយដែរ។ យ៉ាងណា លោកមិនដឹងថាតើរដ្ឋសភានឹងបញ្ជូនសេចក្តីព្រាងច្បាប់នេះ ថ្វាយព្រះមហាក្សត្រឡាយព្រះហស្ថលេខានៅពេលណានោះទេ។
លោកថា៖ «ហ្នឹងហើយ ព្រឹទ្ធសភាអនុម័តហើយអស់ហើយ ជាស្ថាពរហើយ ខាងព្រឹទ្ធសភាបានរៀបចំបញ្ជូនទៅរដ្ឋសភាតាំងពីម្សិល។ អឹចឹង គឺពេលដែលដល់ហើយ គឺរដ្ឋសភាគេរៀបចំដើម្បីបញ្ជូនទៅបន្តទៀត តែមិនដឹងថារដ្ឋសភាគេបញ្ជូនទៅពេលណា? ហើយព្រះមហាក្សត្រឡាយព្រះហស្ថនៅពេលណាទេ ពីព្រោះវាផុតពីដៃព្រឹទ្ធសភាហើយ!»។
លោក វន់ ពៅ ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធ លើកឡើងថា ក្នុងការរៀបចំតាក់តែងច្បាប់នេះ ប្រសិនបើខ្វះតំណាងអ្នកប្រើប្រាស់ចូលរួម នោះច្បាប់នេះនឹងមិនមានលក្ខណៈពេញលេញគ្រប់គ្រាន់ ក្នុងការកាពារប្រយោជន៍អ្នកប្រើប្រាស់បានទេ។ យ៉ាងណា លោកថា បើខ្លឹមសារនៃច្បាប់នេះ អាចការពារអ្នកផលិត និងអ្នកប្រើប្រាស់ ពោលគឺការពារគ្រប់ភាគីនោះ ជារឿងល្អ។
លោក វន់ ពៅ មានប្រសាសន៍ថា៖ «បើសិនជាបង្កើតច្បាប់នេះ ហើយអាចមានខ្លឹមសារគ្រប់គ្រាន់ក្នុងការការពារអ្នកប្រើប្រាស់ និងការពារអ្នកផលិត វាជារឿងល្អ។ តែដើម្បីឱ្យប្រសើរថែមទៀតនោះ [គឺ] ត្រូវតែរាល់ការអនុវត្តច្បាប់ទាំងអស់ [គឺត្រូវអនុវត្តឱ្យមាន] ប្រសិទ្ធភាព ព្រោះស្រុកយើងច្បាប់ច្រើនណាស់ដែលបានបង្កើតមក ពេលខ្លះបង្កើតទៅ វាគ្រាន់តែសរសេរតែល្អនៅលើក្រដាស [បាន] តែក្នុងអត្ថបទនៃច្បាប់ ប៉ុន្តែអាការអនុវត្តវាអត់មាន។ អាហ្នឹងគឺយើងចង់ឱ្យខាងណាបង្កើតច្បាប់ ត្រូវមានការអនុវត្តប្រកបដោយប្រសិទ្ធភាព ហើយការអនុវត្តហ្នឹងគឺត្រូវការពារដល់ប្រយោជន៍ពលរដ្ឋស្លូតត្រង់ ផលិតករស្លូតត្រង់ មានន័យថាគោលការណ៍ស្មារតីនៃច្បាប់កាលណាបង្កើតមក [សម្រាប់] ការពារគ្រប់ភាគីទាំងអស់»។
បើតាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ក.ប.ប លើកឡើងថា សុខុមាលភាពអ្នកប្រើប្រាស់ សំដៅដល់អត្ថប្រយោជន៍របស់ បុគ្គលដែលទទួលបានពីការប្រើប្រាស់ទំនិញ ឬសេវា។ លើសពីនេះ ដើម្បីធានាបាននូវសុខុមាលភាពរបស់ពលរដ្ឋឱ្យបានពេញលេញ ទាមទារឱ្យមានការអនុវត្តច្បាប់ស្តីពីកិច្ចការប្រកួតប្រជែង និងច្បាប់ស្តីពីកិច្ចការពារអ្នកប្រើប្រាស់ឱ្យបានប្រសិទ្ធភាពខ្ពស់ ព្រោះនៅក្នុងបរិបទតំបន់និងអន្តរជាតិ ច្បាប់ទាំងពីរគឺត្រូវអនុវត្តព្រមគ្នា និងបំពេញឱ្យគ្នាទៅវិញទៅមក ដើម្បីធានាគោលបំណងរួម គឺកិច្ចការពារអ្នកប្រើប្រាស់ និងប្រសិទ្ធភាពសេដ្ឋកិច្ច។
ក្នុងសម័យប្រជុំពេញអង្គព្រឹទ្ធសភា លើកទី៧ នីតិកាលទី៤ កាលពីថ្ងៃទី២០ ខែកញ្ញា រដ្ឋមន្ត្រីពាណិជ្ជកម្ម លោក ប៉ាន សូរស័ក្តិ បញ្ជាក់ថា ក្រសួងប្តេជ្ញាសហការជាមួយក្រសួង-ស្ថាប័នពាក់ព័ន្ធជាតិ អន្តរជាតិ និងវិស័យឯកជនឱ្យបានជិតស្និទ្ធ ដើម្បីជំរុញការអនុវត្ត និងទាញយកប្រយោជន៍ពីកិច្ចព្រមព្រៀង និងច្បាប់ទាំង៣នេះ ឱ្យបានជាអតិបរិមា និងមានប្រសិទ្ធភាពខ្ពស់ ក្នុងការបង្កើតការងារ និងលើកកម្ពស់ជីវភាពប្រជាពលរដ្ឋ៕
