លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងស្ថាប័នពាក់ព័ន្ធទាំងអស់ឱ្យពិចារណាឡើងវិញ ចំពោះការប្រារព្ធពិធីបុណ្យកាន់បិណ្ឌនិងភ្ជុំបិណ្ឌនៅឆ្នាំនេះ បន្ទាប់ពីរកឃើញមានផ្ទុះជំងឺកូវីដ-១៩ នៅតាមវត្តអារាមមួយចំនួនក្នុងអំឡុងពេលដំណើរការពិធីកាន់បិណ្ឌពីរថ្ងៃដំបូង។
ការលើកឡើងរបស់លោកនាយករដ្ឋមន្រី្ត ហ៊ុន សែន នេះ ធ្វើឡើងតាមរយៈសារសំឡេងពិសេសមួយនៅថ្ងៃទី២៣ ខែកញ្ញា ឆ្នាំ២០២០១នេះ។
បើតាមលោកនាយករដ្ឋមន្ត្រី ហ៊ុន សែន ក្នុងឱកាសបុណ្យកាន់បិណ្ឌរយៈពេល២ថ្ងៃកន្លងមកនេះ នៅតាមទីវត្តអារាមមួយចំនួន រួមទាំងវត្តជំពុះក្អែក របស់សម្តេចព្រះពោធិ៍វង្ស អំ លឹមហេង ក៏បានរកឃើញមានអ្នកឆ្លងជំងឺកូវីដ-១៩ ផងដែរ។
លោកបន្តថា ការរកឃើញមានអ្នកឆ្លងជំងឺកូវីដ-១៩ នៅតាមវត្តអារាមជាបន្តបន្ទាប់នេះ ជាសញ្ញាមិនល្អសម្រាប់ការគ្រប់គ្រងជំងឺកូវីដ-១៩នៅកម្ពុជា ដែលអាចឈានដល់ការផ្ទុះឡើងជាថ្មីនៃជំងឺនេះ ខណៈជំងឺកូវីដ-១៩បំប្លែងថ្មីប្រភេទ ដែលតា កំពុងឆ្លងរាលដាលនៅរាជធានីភ្នំពេញ និងតាមបណ្ដាខេត្ត។ លោកថា ការឆ្លងជំងឺកូវីដ-១៩ថ្មីៗទៀតនេះ អាចបំផ្លាញដល់កិច្ចប្រឹងប្រែងដែលកម្ពុជាបានខិតខំគ្រប់គ្រងនិងធ្វើឱ្យមានស្ថានភាពល្អប្រសើរក្នុងរយៈពេលកន្លងមក។
ករណីនេះ លោកនាយករដ្ឋមន្ត្រីបានណែនាំទៅឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន រដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងផ្នែកពាក់ព័ន្ធដទៃទៀត ក៏ដូចជារដ្ឋមន្ត្រីក្រសួងធម្មការ ចូលរួមពិនិត្យពិចារណាលើរឿងនេះឱ្យបានម៉ត់ចត់។
មួយវិញទៀត លោកបានណែនាំឱ្យពិចារណាក្នុងការផ្អាកពិធីបុណ្យកាន់បិណ្ឌនិងបុណ្យភ្ជុំបិណ្ឌ ប៉ុន្តែបើមិនអាចផ្អាកបានទេ ត្រូវរកវិធីកាត់បន្ថយការជួបជុំ ដោយអនុញ្ញាតឱ្យមានមនុស្សតិចបំផុតទៅតាមទីអារាមកាន់បិណ្ឌសម្រាប់វេននីមួយៗ។
លោកនាយករដ្ឋមន្ត្រី ហ៊ុន សែន ថ្លែងថា៖ «ខ្ញុំពិតជាមានការបារម្ភថា បន្ទាប់ពីបុណ្យភ្ជុំបិណ្ឌនេះទៅ ចំនួនមនុស្សឈឺនិងមនុស្សស្លាប់អាចមានការកើនឡើង ដែលបង្កជាហានិភ័យធ្ងន់ធ្ងរសម្រាប់ប្រទេសជាតិ។ មិនគ្រាន់តែនៅក្នុងទីក្រុងទេ ប្រជុំជនទេ ជនបទក៏នឹងកើតឡើងដែរ។ ឥលូវឃើញជនបទមួយចំនួនចាប់ផ្តើមផ្ទុះនូវកូវីដ-១៩ ដែលវាអាចឈានទៅបំផ្លាញដល់ការបើកសាលារៀនឡើងវិញ ដោយសារពេលនេះ អ្នកទីក្រុងចរាចរទៅជនបទ អ្នកជនបទចរាចរមកទីក្រុង ជាពិសេសចូលទៅតាមទីអារាមនានា បង្កើតទៅជាការឆ្លងពីតំបន់មួយទៅតំបន់មួយដោយគ្មានការទប់ស្កាត់»។
ក្រោយពីមានការថ្លែងសារពិសេសរបស់លោកនាយករដ្ឋមន្ត្រី ហ៊ុន សែន ភ្លាមៗនោះ ក្រសួងធម្មការនិងសាសនា បានប្រកាសផ្អាកការជួបជុំផ្សេងៗនិងការប្រមូលផ្ដុំថ្វាយបង្គំជាបណ្តោះអាសន្នសិន ចាប់ពីពេលនេះតទៅរហូតមានការជូនដំណឹងជាថ្មី ដើម្បីទប់ស្កាត់ជំងឺកូវីដ-១៩ក្នុងព្រឹត្តិការណ៍សហគមន៍២០កុម្ភៈ។
បើតាមក្រសួងសុខាភិបាល គិតត្រឹមថ្ងៃទី២៣ ខែកញ្ញា ឆ្នាំ២០២១ កម្ពុជារកឃើញអ្នកឆ្លងជំងឺកូវីដ-១៩ សរុប១០៥ ៩៨១នាក់ ក្នុងនោះ ករណីនាំចូលពីក្រៅប្រទេសចំនួន១៨ ២១៤នាក់ ខណៈអ្នកជំងឺព្យាបាលជាសះស្បើយចំនួន៩៨ ៦៥៥នាក់ និងអ្នកស្លាប់មានចំនួន ២ ១៥៤នាក់៕