រដ្ឋាភិបាលកម្ពុជាបានចេញសេចក្តីសម្រេចបន្ទាន់មួយកាលពីយប់ថ្ងៃម្សិលមិញនេះ ដោយសម្រេចផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌ ចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញា ស្អែកនេះ។
ការផ្អាកនេះធ្វើឡើងដើម្បីទប់ស្កាត់ការឆ្លងជំងឺកូវីដ-១៩ ខណៈរដ្ឋាភិបាលបានសង្កេតឃើញថា ក្នុងរយៈពេលពីរថ្ងៃនៃការរៀបចំពិធីបុណ្យកាន់បិណ្ឌកន្លងទៅនេះ មានការជួបជុំនិងប្រមូលផ្តុំមនុស្សជាច្រើននៅតាមបណ្តាវត្តអារាម ដោយមិនមានការធានាបាននូវការអនុវត្តបានត្រឹមត្រូវតាមវិធានការសុវត្ថិភាពផ្នែកសុខាភិបាលឡើយ។
រដ្ឋាភិបាលបារម្ភថា ការជួបជុំនេះនឹងធ្វើឱ្យកម្ពុជាប្រឈមនឹងហានិភ័យខ្ពស់នៃការឆ្លងរាលដាលជំងឺកូវីដ-១៩ ជាទ្រង់ទ្រាយធំនៅទូទាំងប្រទេស ជាពិសេសមេរោគបំប្លែងខ្លួនថ្មីប្រភេទ ដែលតា (Delta) ដែលមានកម្រិតនៃការឆ្លងរាលដាលឆាប់រហ័ស។
បើទោះបីជាពិធីបុណ្យកាន់បិណ្ឌនិងភ្ជុំបិណ្ឌត្រូវផ្អាកមែន តែរដ្ឋាភិបាលបានរក្សាការឈប់សម្រាករយៈពេល៣ថ្ងៃ សម្រាប់ពិធីបុណ្យភ្ជុំបិណ្ឌនេះនៅដដែល។ បន្ថែមលើនេះ គណៈអភិបាលរាជធានី-ខេត្ត ត្រូវធ្វើការសម្របសម្រួលជាមួយយន្តការដែលមានការពាក់ព័ន្ធទាំងអស់ ដើម្បីធានាដល់ការនាំយកចង្ហាន់និងទេយ្យវត្ថុចាំបាច់នានាប្រគេនដល់ព្រះសង្ឃនៅតាមបណ្តាវត្តអារាមនានាដែលស្ថិតក្នុងដែនសមត្ថកិច្ចរបស់ខ្លួន។
តាមរយៈសារសំឡេងកាលពីថ្ងៃទី២៣ ខែកញ្ញា លោកនាយករដ្ឋមន្ត្រី ហ៊ុន សែន បានបញ្ជាទៅក្រសួងស្ថាប័នពាក់ព័ន្ធទាំងអស់ឱ្យពិចារណាឡើងវិញ ចំពោះការប្រារព្ធពិធីបុណ្យកាន់បិណ្ឌនិងភ្ជុំបិណ្ឌនៅឆ្នាំនេះ បន្ទាប់ពីរកឃើញមានផ្ទុះជំងឺកូវីដ-១៩ នៅតាមវត្តអារាមមួយចំនួនដូចជា វត្តជំពុះក្អែក និងវត្តនាគវ័ន្ត នៅរាជធានីភ្នំពេញជាដើម៕