អាជ្ញាធរ​ខេត្ត​ព្រះ​សីហនុ​ថាជន​ជាតិ​ថៃ​ដែល​បង្ហោះ​វីដេអូ​សុំ​អន្តរា​គមន៍​ មិនមែន​ជា​ករណី​បង្ខាំង​មនុស្ស

ថ្ងៃទី០៤ ខែកញ្ញា ឆ្នាំ២០២១ នគរបាលជំនាញ នៃស្នងការដ្ឋាននគរបាលខេត្តព្រះសីហនុ បានស្រាវជ្រាវ រកឃើញជនជាតិថៃចំនួន៣៦នាក់ ស្រី១០នាក់ ដែលមេខ្យល់នាំឆ្លងដែនខុសច្បាប់ ហើយស្នាក់នៅកាស៊ីណូហ្គោលដិនវើល៣ ស្ថិតនៅភូមិ១ សង្កាត់៣ ក្រុង/ខេត្តព្រះសីហនុ។ (អគ្គស្នងការនគរបាលជាតិ)

ស្នងការនគរបាលខេត្តព្រះសីហនុ អះអាង​ថា ករណីជ​នជាតិថៃមួយក្រុម​ដែលត្រូវ​មេ​ខ្យល់នាំឆ្លងដែនដោយខុសច្បាប់​មកធ្វើការនៅក្នុងខេត្តនេះ​ ហើយត្រូវបាន​​សារព័ត៌​មា​ន​​​ក្នុង​ស្រុក​ចុះ​ផ្សាយ​កាល​ពី​ពេល​ថ្មីៗ មិន​មែន​ជា​ករណី​បង្ខាំងមនុស្សទេ។

ការបញ្ជាក់យ៉ាងដូច្នេះ ធ្វើឡើងក្រោយសារព័ត៌មានក្នុងស្រុកបានចុះផ្សាយ​កាលពីថ្ងៃ​ទី២៣ ខែ​កញ្ញា​ ថាជន​ជាតិ​ថៃចំ​នួន២១នាក់ដែល​ចំណាកស្រុកមកធ្វើការក្នុងខេត្តព្រះសីហនុ ប្រទេស​កម្ពុជា ប្រកាស​រកកិច្ច​អន្តរាគមន៍​​​ពី​រដ្ឋាភិបាលថៃ ក្រោយពួកគេរងការឃុំខ្លួននិងបង្ខំឱ្យប្រកបរបរផ្លូវភេទ​នៅក្នុង​​ក្រុង​​ព្រះ​សីហនុ។

លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បញ្ជាក់នៅលើទំព័រ​ហ្វេសប៊ុក​របស់​​លោក​នៅថ្ងៃសុក្រនេះថា កាលពីថ្ងៃទី០៤ ខែកញ្ញា ឆ្នាំ២០២១ នគរបាលជំនាញខេត្ត​បាន​ចុះ​ស្រាវ​ជ្រាវ ដោយ​​រក​ឃើញថា ជនជាតិថៃ​ចំនួន៣៦នាក់​ (ស្រី១០នាក់) ដែលមេខ្យល់នាំឆ្លងដែន​ដោយ​ខុសច្បាប់នោះ បាន​​មក​ស្នាក់នៅកាស៊ីណូហ្គោលដិនវើល៣ ស្ថិតនៅភូមិ១ សង្កាត់៣ ក្រុង​ព្រះសីហនុ។

លោក​បន្ត​​ថា តាមរយៈ​ការស្រាវជ្រាវនោះ​ កម្លាំងជំនាញបាន​​រកឃើញអ្នកពាក់ព័ន្ធ​ដែលនាំជនជាតិថៃ​ទាំង​នោះ​​ចូល​មកកម្ពុជា​​ដោយ​ខុសច្បាប់ចំនួន០៤នាក់ ក្នុងនោះ មាន​ចិន៣នាក់​ និងថៃ១នាក់​ ហើយ​សមត្ថកិច្ច​បានកសាងសំណុំរឿងបញ្ជូន​ទៅសាលា​ដំបូងខេត្តអនុវត្តតាមវិធានច្បាប់រួចរាល់ហើយ។

លោក​បន្ថែម​​ថា៖ «[ករណីខាងលើ] មិនមែនបង្ខាំងមនុស្សនោះទេ»។

បើតាម​ស្នងការនគរបាលរូបនេះ អភិបាលខេត្ត​ព្រះសីហនុបានចាត់ចែងក្រុមគ្រូពេទ្យចុះយកសំណាកធ្វើតេស្តទាំងអស់​ជា​បន្ទាន់ ហើយ​​ក៏បានរកឃើញអ្នកវិជ្ជមានវីរុស​​កូវីដ-១៩ ប្រភេទ ដែលតា ចំនួន​០៥នាក់​ (ស្រី០១នាក់) យកទៅព្យាបាលនៅសណ្ឋាគារសាកាណា៣។ ចំណែកចំនួន​៣១នាក់​មិនមាន​វិជ្ជមាន ត្រូវ​បាន​ដាក់ឱ្យធ្វើចត្តាឡីស័កនៅកន្លែងនោះ​ ដើម្បីតាមដានបន្ត។

ពាក់ព័ន្ធនឹងករណីនេះ ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តព្រះសីហនុ លោក ហួត វិចិត្រ មាន​ប្រសាសន៍​ថា ចៅក្រមស៊ើបសួរបាន​សម្រេចឃុំខ្លួនជនសង្ស័យ​ទាំងអស់ជា​បណ្តោះអាសន្ន តាំងពីថ្ងៃទី​៤ ខែកញ្ញាមក​។ លោកបន្ត​ថា ស្ថានទម្ងន់ទោសទៅលើជនសង្ស័យយ៉ាងណានោះ លោកមិនអាចនិយាយបានទេ ព្រោះត្រូវរង់ចាំតុលាការកាត់ក្តីជាមុនសិន។

លោក ហួត វិចិត្រ បញ្ជាក់ថា៖ «អ៊ីចឹងក្នុងដៃចៅក្រមស៊ើប កិច្ចមួយចំនួនយើងអត់អាចនិយាយបានទេ ព្រោះច្បាប់យើងការពារ។ ក្នុងកិច្ចស៊ើបសួរ ខ្ញុំមិនអាចនិយាយបានទេ គ្រាន់តែថា ករណីនេះត្រូវបានដល់ដៃចៅក្រមស៊ើបសួរ ហើយជនសង្ស័យត្រូវបានចៅក្រមឃុំខ្លួនហើយ»។

លោកស្រី ជូ ប៊ុនអេង រដ្ឋលេខាធិការ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងការជួញដូរមនុស្សនៃក្រសួងមហាផ្ទៃ មាន​ប្រសាសន៍​ថា លោកស្រី​មិន​បាន​ទទួល​​ការ​រាយ​ការណ៍​​​ណា​មួយ​ជុំវិញករណីនេះ​​នៅឡើយ។ យ៉ាងណា លោកស្រីថា អាជ្ញាធរមិនដែលទុករឿង​បែបនេះចោលដោយ​មិន​ចាត់​ការ​នោះ​ទេ។

លោកស្រី​ថា៖ «សរុបសេចក្តីមក [បើមានករណីនោះមែន] យើងនឹងធ្វើតាមច្បាប់។ ហើយប្រសិនបើជាជនជាតិបរទេសអ៊ីចឹង គឺវាពាក់ព័ន្ធទៅហ្នឹងច្បាប់ដែលចែងថា បើកើតឡើងនៅកម្ពុជា គឺត្រូវដោះស្រាយ​នៅកម្ពុជា។ ប៉ុន្តែមានច្បាប់បត្យាប័នដែលស្នើសុំដោយប្រទេសដែលជាភាគីពាក់ព័ន្ធ គេនឹងចាត់ការតាមហ្នឹង ប៉ុន្តែជាធម្មតា គេត្រូវធ្វើការផ្តន្ទាទោសនៅកម្ពុជា»។

​នាយករង​ទទួលបន្ទុក​កម្មវិធី​ឃ្លាំមើល​នៃអង្គការ​លីកាដូ លោក ​អំ សំអាត ​បានផ្តល់ជាយោបល់​ថា ករណី​នេះ អាជ្ញាធរ​​​កម្ពុជាអាចផ្តល់ដំណឹងទៅឱ្យស្ថានទូត​ថៃ ដើម្បីឱ្យ​មន្ត្រីទូតថៃ​​ជួយ​​​ដល់ពលរដ្ឋ​ខ្លួន​ឱ្យ​បាន​ត្រលប់​ទៅប្រទេសគេ​​វិញ។

លោក​​បន្តថា៖ «ទាក់ទងទៅនឹងរឿងនេះ ទោះបីជាជនជាតិណាក៏ដោយ ប្រសិនជាគាត់រងគ្រោះដោយអំពើនៃការជួញដូរកម្លាំងពលកម្ម រឿងនេះគេហៅថា ការជួញដូរកម្លាំងពលកម្មហើយ។ អាជ្ញាធរត្រូវតែចាត់វិធានការ ដើម្បីជួយទៅដល់ជនរងគ្រោះ ហើយនិងសហការជាមួយបណ្តាប្រទេសដែលត្រូវបានបញ្ជូន​ពួកគាត់មក​ហ្នឹង ដើម្បីអនុវត្តទៅតាមផ្លូវច្បាប់របស់ប្រទេសគេ ប្រសិនបើមានកិច្ចសុំសហការ។ ហើយប្រសិនបើអត់ [កិច្ចសុំសហការពីបរទេស] ទេ បើ​បទល្មើសដែលកើតនៅប្រទេសកម្ពុជាយើង យើងត្រូវតែអនុវត្តដើម្បីជួយសង្គ្រោះទៅដល់ជនរងគ្រោះ ដោយសារការជួញដូរមនុស្សនេះ»។

កាលពីថ្ងៃ៤ ខែកញ្ញា ឆ្នាំ​២០២១ ​ប៉ុស្តិ៍លេខ​៧របស់​​ថៃបានចុះផ្សាយនៅលើវេបសាយរបស់ខ្លួនដែលមាន​ន័យ​ជាភាសាខ្មែរថា អាជ្ញាធរកម្ពុជាបានសម្រុកចូលជួយប្រជាជនថៃចំនួន​៥នាក់​ដែលមកពីខេត្តឈុនបុរី ខណៈ​ពួកគេត្រូវបានមេខ្យល់បោកបញ្ឆោតឱ្យមកធ្វើជាអ្នកគ្រប់គ្រងការងារ (admin) តាមប្រព័ន្ធអ៊ីនធឺណិត ​នៅក្រុងព្រះសីហនុ​ ខេត្តព្រះសីហនុ។ សារព័ត៌មាន​នេះបន្តទៀតថា ​អាជ្ញាធរក៏​​ធ្លាប់​បាន​​ជួយ​សង្គ្រោះជនរងគ្រោះ៦​នាក់ហើយដែល​ត្រូវ​ជនជាតិចិន​ចាប់បង្ខាំងទុក​នៅក្រុង​ព្រះសីហនុ​ផងដែរ៕​

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered