សហរដ្ឋអាមេរិក បើកការិយាល័យផ្នែកសេវាកម្មជាមួយបរទេសរបស់ក្រសួងកសិកម្មសហរដ្ឋអាមេរិក (USDA) ជាដំបូងនៅកម្ពុជា នៅក្នុងខែកញ្ញានេះ ដើម្បីទ្រទ្រង់ពាណិជ្ជកម្មទាក់ទងនឹងកសិកម្ម ដែលកំពុងមានកំណើនរវាងប្រទេសទាំងពីរ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំនៅកម្ពុជា បានឱ្យដឹងនៅថ្ងៃទី២៣ ខែកញ្ញា ថាថ្វីត្បិតតែការិយាល័យផ្នែកសេវាកម្មជាមួយបរទេសរបស់ក្រសួងកសិកម្មអាមេរិក (USDA) នេះ ស្ថិតនៅក្នុងស្ថានទូតអាមេរិកនៅរាជធានីភ្នំពេញក្តី ប៉ុន្តែការងាររបស់គេនឹងមាននៅទូទាំងប្រទេសកម្ពុជា ដើម្បីទ្រទ្រង់កិច្ចសហការនិងពាណិជ្ជកម្មទ្វេភាគីផ្នែកកសិកម្មសម្រាប់ជាផលប្រយោជន៍នៃប្រទេសទាំងពីរ។
ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា លោក Patrick Murphy បានចាត់ទុកការបើកការិយាល័យនេះថា ជាដំណឹងល្អមួយសម្រាប់ប្រទេសទាំងពីរ ហើយក៏បានឆ្លុះបញ្ចាំងឱ្យឃើញអំពីការប្តេជ្ញាចិត្តយូរអង្វែងរបស់សហរដ្ឋអាមេរិក ក្នុងការធ្វើឱ្យប្រជាជនកម្ពុជាទទួលបានទំនិញនិងសេវាប្រកបដោយគុណភាពពីសហរដ្ឋអាមេរិក។
លោកបានមានប្រសាសន៍យ៉ាងដូច្នេះថា៖ «នៅប្រទេសកម្ពុជា គេចូលចិត្តផលិតផលនិងបច្ចេកវិទ្យាកសិកម្មរបស់អាមេរិក។ ហើយការិយាល័យថ្មីរបស់ USDA នេះ នឹងជំរុញកិច្ចការនេះ ដើម្បីឱ្យអតិថិជននិងផលិតករកម្ពុជាទទួលបានផលិតផលនិងបច្ចេកវិទ្យាទាំងនោះឱ្យបានកាន់តែច្រើន»។
ការិយាល័យផ្នែកសេវាកម្មជាមួយបរទេសរបស់ក្រសួងកសិកម្មអាមេរិក (USDA) ក៏នឹងជួយផងដែរ ដល់កសិករនិងសិស្សសាលានៅកម្ពុជាក្នុងទំហំទឹកប្រាក់រាប់សិបលានដុល្លារ តាមរយៈកម្មវិធីជំនួយអភិវឌ្ឍន៍ជាបន្តរបស់ USDA ដូចជា កម្មវិធី McGovern-Dole International Food for Education ដែលផ្តល់អាហារសម្រាប់កូនសិស្សនៅសាលាបឋមសិក្សា និងកម្មវិធី Food for Progress ដែលលើកកម្ពស់ផលិតភាពកសិកម្មនៅកម្ពុជា។
ការិយាល័យផ្នែកសេវាកម្មជាមួយបរទេសរបស់ក្រសួងកសិកម្មសហរដ្ឋអាមេរិក (USDA) នេះ បានតែងតាំងកញ្ញា ហូយ សុខគា អ្នកឯកទេសខាងកិច្ចការកសិកម្ម ធ្វើជាតំណាង។ កន្លងមក កញ្ញា សុខគា គឺជាអ្នកឯកទេសពាណិជ្ជកម្មរបស់ស្ថានទូតអាមេរិកនៅរាជធានីភ្នំពេញ ដោយគាត់បានជួយក្រុមហ៊ុនអាមេរិកនានាឱ្យចូលមកបណ្តាក់ទុនក្នុងទីផ្សារនៃប្រទេសកម្ពុជាផងដែរ។
តាមសេចក្តីប្រកាសព័ត៌មានរបស់ស្ថានទូតអាមេរិកនៅកម្ពុជាកាលពីឆ្នាំ២០២០ កម្ពុជាបាននាំចូលទំនិញកសិកម្មពីសហរដ្ឋអាមេរិក មានតម្លៃសរុប៧២,៧លានដុល្លារ ដែលចំនួននេះកើន ៤៧៤% នៅក្នុងរយៈពេល១០ឆ្នាំមកនេះ៕