ប្រធានសមាគមទីភ្នាក់ងារទេសចរណ៍កម្ពុជាអ្នកស្រី ឆាយ ស៊ីវលីន បានអំពាវនាវឲ្យរដ្ឋាភិបាលកម្ពុជាពិចារណាចេញសេចក្តីប្រកាសជាផ្លូវការ ស្តីពី ការបើកចរាចរទេសចរណ៍វ៉ាក់សាំងឲ្យបានឆាប់បំផុត ដើម្បីទុកពេលវេលាឲ្យវិស័យឯកជនត្រៀមខ្លួនស្តារវិស័យទេសចរណ៍នៅកម្ពុជាឡើងវិញ។
ប្រធានសមាគមទីភ្នាក់ងារទេសចរណ៍កម្ពុជារូបនេះ បានប្រាប់វីអូឌី កាលពីរសៀលថ្ងៃទី២៣ ខែកញ្ញា ឆ្នាំ២០២១នេះថា៖ «ពេលនេះយើងចង់បានការប្រកាសជាផ្លូវការពីរដ្ឋាភិបាល ព្រោះឥឡូវប្រកាសថាគ្រោងនឹងបើក ប៉ុន្តែមិនដឹងនៅថ្ងៃណា ខែណាជាក់លាក់ កុំឲ្យថា គ្រោងៗចឹង យើងអត់អាចធ្វើអីចេញទេ ជាពិសេសគ្រោងបើកចុងឆ្នាំ ចុងខែ១២»។
អ្នកស្រីបន្តថា បើគ្រោងនឹងបើកហើយ គួរតែមានសេចក្តីប្រកាសជាផ្លូវការ ដើម្បីធ្វើឱ្យភាគីពាក់ព័ន្ធទាំងអស់ក្នុងវិស័យឯកជនពិភាក្សាគ្នាថា តើនឹងត្រូវរៀបចំយ៉ាងណាខ្លះ។ ប្រភពដដែលបន្តថា៖ «ការបើកដំណើរការទេសចរណ៍វ៉ាក់សាំងមិនរំពឹងថា នឹងមានភ្ញៀវមកដូចមុនស្ថានភាពកូវីដទេ ដោយសារប្រទេសមួយចំនួនកំពុងតែទប់ស្កាត់ ដូច្នេះយើងនឹងទទួលភ្ញៀវម្តងតិចៗ។ ក៏ប៉ុន្តែ ការបើកនេះ អាចជួយទៅដល់អាជីវកម្មទេសចរណ៍ដែលបានដេកដួលនឹងបានត្រលប់មកប្រតិបត្តិការឡើងវិញ និងអ្នកជំនាញទេសចរណ៍ក៏ត្រលប់មកវិញ ចឹងអ្វីៗវាអត់យឺតពេល។ ទម្រាំដល់ពេលយើងទទួលភ្ញៀងឡើងវិញ ដូចមុនកូវីដ គឺអ្វីៗរឹងដៃរឹងជើង»។
អ្នកស្រីបានបន្តថា៖ «ក្នុងពេលបច្ចុប្បន្ននេះអាជីវកម្មទាំងអស់មិនរំពឹងទៅលើប្រាក់ចំណូលច្រើនៗ ឬចំនេញច្រើនដូចពីមុនទេ គឺគ្រាន់តែចង់បានអាជីវកម្មត្រលប់មកវិញប៉ុណ្ណោះ»។
វីអូឌី មិនទាន់អាចទាក់ទងសុំការឆ្លើយតបពីលោក ទិត ចន្ថា រដ្ឋលេខាធិការ និងជាអ្នកនាំពាក្យក្រសួងទេសចរណ៍ និងលោក ណេប សាមុត អគ្គនាយកដ្ឋាននៃអគ្គនាយកដ្ឋានទេសចរណ៍ និងជាអ្នកនាំពាក្យក្រសួងទេសចរណ៍ បានទេកាលពីម្សិលមិញ។
យ៉ាងណាក្តីយោងតាមសេចក្តីជូនដំណឹងរបស់ក្រសួងទេសរណ៍ ស្តីពី ការត្រៀមខ្លួនរបស់មគ្គុទ្ទេសក៍ទេសចរណ៍ក្នុងការជំរុញសកម្មភាពទេសចរណ៍ផ្ទៃក្នុង និងការត្រៀមខ្លួនទទួលទេសចរណ៍អន្តរជាតិចាក់វ៉ាក់សាំងបង្ការជំងឺកូវីដ-១៩ បញ្ជាក់ថា ដើម្បីបង្កើតទំនុកចិត្តដល់ទេសចរផ្ទៃក្នុង និងត្រៀមទទួលទេសចរណ៍អន្តរជាតិដែលបានចាក់វ៉ាក់សាំងបង្ការជំងឺកូវីដ-១៩ នាពេលខាងមុខ ក្រសួងទេសចរណ៍បានកោតសរសើរមគ្គុទ្ទេសក៍ទេសចរណ៍គ្រប់កម្រិត ដែលបានចាក់វ៉ាក់សាំងបង្ការជំងឺកូវីដ-១៩ តាមគោលការណ៍ស្ម័គ្រចិត្តកន្លងមក។ ប៉ុន្តែក៏នៅមានមគ្គុទ្ទេសក៍មួយចំនួនតូច នៅមិនទាន់បានចាក់វ៉ាក់សាំងបង្ការជំងឺកូវីដ-១៩ នៅទ្បើយទេ។
ក្រសួងទេសចរណ៍ បានក្រើនរំលឹកដល់មគ្គុទ្ទេសក៍ទេសចរណ៍ ប្រញ៉ាប់ទៅចាក់វ៉ាក់សាំងបង្ការជំងឺកូវីដ-១៩ ដើម្បីត្រៀមខ្លួនទទួលនិងផ្តល់សេវាកម្មទេសចរណ៍ជូនភ្ញៀវជាតិ និងអន្តរជាតិមកទស្សនាកម្ពុជា។ មគ្គុទ្ទេសក៍ទេសចរណ៍ណា ដែលមិនបានចាក់វ៉ាក់សាំងបង្ការជំងឺកូវីដ-១៩ ដោយហេតុផលសុខាភិបាលណាមួយ ត្រូវមានការបញ្ជាក់ពីអាជ្ញាធរសុខាភិបាលក្នុងភូមិសាស្រ្តរបស់ខ្លួន និងមិនអនុញ្ញាតឱ្យផ្តល់សេវាកម្មមគ្គុទ្ទេសក៍ទេសចរណ៍ដល់ទេសចរទ្បើយ។ ប្រភពដដែលបន្តថា ចាប់ពីថ្ងៃទី១ ខែតុលា ឆ្នាំ២០២១តទៅ ការស្នើសុំអាជ្ញាប័ណ្ណមគ្គុទ្ទេសក៍ទេសចរណ៍គ្រប់កម្រិត ត្រូវភ្ជាប់មកជាមួយកាតចាក់វ៉ាក់សាំងបង្ការជំងឺកូវីដ-១៩ ជាឯកសារថតចម្លង បន្ថែមលើលក្ខខណ្ឌដែលបានកំណត់ក្នុងប្រកាស ស្តីពី ការផ្តល់អាជ្ញាបណ្ណទេសចរណ៍ដល់មគ្គុទ្ទេសក៍ទេសចរណ៍៕