លោកនាយករដ្ឋមន្ត្រី ហ៊ុន សែន ប្តេជ្ញាដោះស្រាយបញ្ហាប្រឈមទាំងឡាយនៅក្នុងតំបន់ នៅពេលកម្ពុជាធ្វើជាប្រធានអាស៊ាន នៅឆ្នាំក្រោយនេះ ដើម្បីធ្វើឱ្យពាណិជ្ជកម្ម ការវិនិយោគ និងខ្សែចង្វាក់ផ្គត់ផ្គង់របស់ពិភពលោកកាន់តែរឹងមាំ។
ក្នុងសុន្ទរកថាថ្លែងក្នុងអង្គមហាសន្និបាតអង្គការសហប្រជាជាតិលើកទី ៧៦ កាលពីយប់ថ្ងៃទី២៥ ខែកញ្ញា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន បានឱ្យដឹងថា បញ្ហាប្រឈមដែលនៅតំបន់អាស៊ានជួបប្រទះរួមមាន ការប្រកួតប្រជែងផ្នែកភូមិសាស្ត្រនយោបាយ ការប្រឈមមុខដាក់គ្នារវាងមហាអំណាចសង្គ្រាមបច្ចេកវិទ្យានិងពាណិជ្ជកម្ម ជម្លោះប្រដាប់អាវុធដណ្តើមទឹកដី អំពើភេរវកម្មនិងឧក្រិដ្ឋកម្មឆ្លងដែននិងការប្រែប្រួលអាកាសធាតុ សន្តិភាពនិងសន្តិសុខអន្តរជាតិនៅតែកំពុងទទួលរងនូវសម្ពាធធ្ងន់ធ្ងរដូចមុនដដែល ។
ករណីនេះ លោកហ៊ុន សែន ថា កម្ពុជានឹងបន្តជំរុញការកសាងសហគមន៍អាស៊ានមួយប្រកបដោយភាពរស់រវើក និង សុខដុមរមនា ជាមួយនឹងការការពារដល់ពលករចំណាកស្រុក របៀបវារៈការអភិវឌ្ឍ ដែលមាន ភាពបៃតង និងបរិយាប័ន្ន ការធ្វើបរិវត្តកម្មឌីជីថល ការអភិវឌ្ឍសិប្បកម្ម និងសហគ្រាសធុនតូច និងមធ្យម (MSMEs) ក៏ដូចជាការលើកកម្ពស់សហគ្រិនភាពរបស់ស្ត្រី និងយុវវ័យជាដើម ។
បន្ថែមពីនេះ លោកនាយករដ្ឋមន្ត្រី ហ៊ុន សែន បញ្ជាក់ថា ក្នុងនាមជាប្រធានអាស៊ាននៅឆ្នាំ២០២២ខាងមុខនេះ កម្ពុជាប្តេជ្ញា ព្យាយាមដោះស្រាយ បញ្ហាប្រឈមរួមនៅក្នុងតំបន់ ដើម្បីធ្វើឱ្យពាណិជ្ជកម្ម ការវិនិយោគកាន់តែរឹងមាំង។
លោកនាយករដ្ឋមន្ត្រីបញ្ជាក់ថា៖ «កម្ពុជាព្យាយាមដោះស្រាយ បញ្ហាប្រឈមរួមនៅក្នុងតំបន់ ជាមួយនឹងសាមគ្គីភាពដ៏រឹងមាំរវាងប្រទេសសមាជិកអាស៊ាន និងការគាំទ្រពីដៃគូខាងក្រៅ, កម្ពុជានឹងបន្តជំរុញដំណើរការកសាង សហគមន៍អាស៊ាន និងថែរក្សាតួនាទីរបស់អាស៊ាន ដែលជាតំបន់ដ៏មានសារសំខាន់សម្រាប់ពាណិជ្ជកម្ម, ការវិនិយោគ និងខ្សែច្រវាក់ផ្គត់ផ្គង់របស់ពិភពលោក ក្នុងការស្តារកំណើនសេដ្ឋកិច្ចឡើងវិញ គឺជាអាទិភាពខ្ពស់បំផុតសម្រាប់ប្រទេសទាំងអស់នៅជុំវិញពិភពលោក» ។
លោកនាយករដ្ឋមន្ត្រីហ៊ុន សែន ក៏បានរំឮកថា តាមប្រវត្តិសាស្ត្រការជ្រៀតជ្រែក និងការប្រើប្រាស់កម្លាំងយោធា ដើម្បីកំណត់ប្រព័ន្ធអភិបាលកិច្ចផ្សេងៗមិនមែនជាដំនោះស្រាយឡើយ ប៉ុន្តែនាំមកនូវវិនាសកម្មបាត់បង់ជីវិតមនុស្ស និងសេដ្ឋកិច្ចកាន់តែធ្លាក់ចុះទៅវិញ ។
លោកនាយករដ្ឋមន្ត្រី ហ៊ុន សែន បានលើកឡើងថា៖ «ប្រវត្តិសាស្ត្របានប្រាប់យើងម្តងហើយម្តងទៀតថាការជ្រៀតជ្រែកនិងការដែលកាន់តែអាក្រក់ជាងនេះទៅទៀត នោះគឺការប្រើ ប្រាស់ជម្រើសយោធាក្នុងការកំណត់នូវប្រព័ន្ធអភិបាលកិច្ចផ្សេងៗមិនមែនជាដំណោះស្រាយនោះឡើយ ។ ផ្ទុយទៅវិញ ជម្រើសទាំងអស់នេះបានត្រឹមនាំមកនូវការបាត់បង់ជីវិត,ការឈឺចាប់និងទុក្ខវេទនាសម្រាប់មនុស្សជាតិនិងជម្លោះផ្នែកសង្គម–សេដ្ឋកិច្ចកាន់តែច្រើនជាងមុនតែប៉ុណ្ណោះ» ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍គាំទ្រនឹងការប្តេជ្ញាដោះស្រាយបញ្ហាប្រឈមទាំងឡាយនៅក្នុងតំបន់ នៅពេលកម្ពុជាធ្វើជាប្រធានអាស៊ាន នៅឆ្នាំ២០២២ខងមុខនោះ។
លោក សេក សុជាតិ បញ្ជាក់ថា ដើម្បីឱ្យប្រទេសដែលជាសមាជិកគោរពនិងយកគំរូតាម លុះត្រាតែកម្ពុជាពង្រឹងការដឹកនាំរបស់ខ្លួនស្របតាមគោលការណ៍ប្រជាធិបតេយ្យ និងមានការគោរពសិទ្ធិមនុស្សជាដើម ។
លោកមានប្រសាសន៍ថា៖ «បើសិនជាកម្ពុជាធ្វើបានក្នុងនាមជាប្រទេសដែលបើកទូលាយឱ្យមានលំហូប្រជាធិបតេយ្យឡើងវិញ ការគោរពសិទ្ធិមនុស្ស មានការសម្តែងមតិ មានការជួបជុំ ឬមានអ្វីដែលល្អប្រសើរដូចមុនកាលពីឆ្នាំ២០១៧ យើងគិតថាពិភពលោកច្បាស់ជាសម្លឹកមើលកម្ពុជាក្នុងន័យវិជ្ជមាន ហើយនឹងជួយណែនាំឱ្យក្រុមអ្នកវិនិយោគរបស់ពួកគេអាចមកដាក់ទុនបន្ថែមមកកម្ពុជា ដោយសារតែមានភាពល្អប្រសើរឡើងវិញគោរពសិទ្ធិមនុស្ស និងប្រជាធិបតេយ្យ អាចធ្វើឱ្យកម្ពុជាទទួលបានអនុគ្រោះ EBA ២០% ឬមានការបន្ថែម ឬមានការលើកទឹកចិត្តពីប្រទេសអ្នកមាន ឬសហគមន៍អឺរ៉ុប គឺយើងអាចទទួលបានផលប្រយោជន៍កាន់តែច្រើនថែមទៀត »។
កម្ពុជាបានចូលជាសមាជិកអាស៊ាននៅថ្ងៃទី៣០ខែមេសា ឆ្នាំ១៩៩៩ ហើយធ្លាប់ធ្វើជាប្រធានអាស៊ានចំនួន២លើករួចមកហើយ ពោលគឺនៅឆ្នាំ២០០២ និងឆ្នាំ២០១២៕
