ពលរដ្ឋ​រង​ផល​ប៉ះពាល់​ពី​គម្រោង​អភិវឌ្ឍន៍​ផ្លូវដែក​ ខកចិត្ត​នឹង​អាជ្ញាធរ​រាជ​ធានី​ភ្នំពេញ​​ដែល​​​​មិន​ដោះ​ស្រាយ​ដី​ធ្លី​ជូន​ពួកគេ

ព្រឹកថ្ងៃទី២៧ ខែកញ្ញា ឆ្នាំ២០២១ ពលរដ្ឋតំណាង​ឱ្យ​​​៣០គ្រួសារ ដែលរងផលប៉ះពាល់ពីគម្រោងអភិវឌ្ឍន៍ផ្លូវ​ដែក​នៅសង្កាត់​បឹង​កក់២ និងសង្កាត់ទឹកល្អក់១ ខណ្ឌទួលគោក បានយកញត្តិទៅដាក់នៅរដ្ឋបាល​រាជធានីភ្នំពេញ ដោយស្នើ​ឱ្យ​អាជ្ញាធរ​ជួយ​ពន្លឿន​ការ​ដោះស្រាយ​​បញ្ហា​ដីធ្លី ខណៈ​ពួកគេ​បារម្ភខ្លាច​​អាជ្ញាធរចុះរុះរើផ្ទះសម្បែងដោយមិនមានដំណោះស្រាយ។ (ជន ចាន់រ៉ែន)

ពលរដ្ឋ៣នាក់ តំណាង​ឱ្យ​​​៣០គ្រួសារ ដែលរងផលប៉ះពាល់ពីគម្រោងអភិវឌ្ឍន៍ផ្លូវ​ដែក​នៅសង្កាត់​បឹង​កក់២ និងសង្កាត់​ទឹកល្អក់១ ខណ្ឌទួលគោក សម្តែងការខកចិត្ត​ចំពោះមន្ត្រីរដ្ឋបាលរាជធានីភ្នំពេញដែលមិនព្រមដោះស្រាយបញ្ហាដីធ្លីជូនពួកគេ ហើយ​បែរជារុញឱ្យទៅជួបអភិបាលខណ្ឌឱ្យជួយដោះស្រាយជំនួសទៅវិញ។

អ្នកស្រី មាស ស្រីភាព ដែលចូលទៅជួបមន្ត្រីរដ្ឋបាលរាជធានីភ្នំពេញ នាព្រឹកថ្ងៃ​ទី២៧ ខែកញ្ញានេះ បាន​ឱ្យដឹង​ថា កាល​ពីពាក់កណ្តាលខែនេះ ពួកគាត់បានយកញត្តិទៅដាក់នៅរដ្ឋបាល​រាជធានីភ្នំពេញ ដោយស្នើ​ឱ្យ​អាជ្ញាធរ​​ជួយ​ពន្លឿន​​ការ​​ដោះស្រាយ​​បញ្ហា​ដីធ្លី ខណៈ​ពួកគេ​បារម្ភខ្លាច​​អាជ្ញាធរចុះរុះរើផ្ទះសម្បែងដោយមិនមានដំណោះស្រាយ។

អ្នកស្រីបន្តថា ក្រោយពីដាក់ញត្តិបានជាង១០ថ្ងៃ ពោលគឺ​នៅថ្ងៃទី២៧ ខែកញ្ញានេះ ពួកគាត់​បានទៅជួបមន្ត្រីរដ្ឋបាលរាជធានីភ្នំពេញ ដើម្បី​ស្នើឱ្យអាជ្ញាធរពន្លឿនការដោះស្រាយបញ្ហាដីធ្លីជូនពួកគេឱ្យបានឆាប់ ប៉ុន្តែមន្ត្រីនោះប្រាប់ថា យ៉ាងយូរត្រឹម​ថ្ងៃពុធ ទី២៩ ខែកញ្ញានេះ រដ្ឋបាលរាជធានីភ្នំពេញនឹងធ្វើលិខិតជូនដំណឹងទៅអភិបាលខណ្ឌទួលគោក លោក ជា ពិសី ឱ្យជួយដោះស្រាយបញ្ហាដីធ្លីជូនពួកគេទៅវិញ។

ព្រឹកថ្ងៃទី២៧ ខែកញ្ញា ឆ្នាំ២០២១ ពលរដ្ឋតំណាង​ឱ្យ​​​៣០គ្រួសារ ដែលរងផលប៉ះពាល់ពីគម្រោងអភិវឌ្ឍន៍ផ្លូវ​ដែក​នៅសង្កាត់​បឹង​កក់២ និងសង្កាត់ទឹកល្អក់១ ខណ្ឌទួលគោក បានយកញត្តិទៅដាក់នៅរដ្ឋបាល​រាជធានីភ្នំពេញ ដោយស្នើ​ឱ្យ​អាជ្ញាធរ​ជួយ​ពន្លឿន​ការ​ដោះស្រាយ​​បញ្ហា​ដីធ្លី ខណៈ​ពួកគេ​បារម្ភខ្លាច​​អាជ្ញាធរចុះរុះរើផ្ទះសម្បែងដោយមិនមានដំណោះស្រាយ។ (គួយ ឡង់ឌី)
ព្រឹកថ្ងៃទី២៧ ខែកញ្ញា ឆ្នាំ២០២១ ពលរដ្ឋតំណាង​ឱ្យ​​​៣០គ្រួសារ ដែលរងផលប៉ះពាល់ពីគម្រោងអភិវឌ្ឍន៍ផ្លូវ​ដែក​នៅសង្កាត់​បឹង​កក់២ និងសង្កាត់ទឹកល្អក់១ ខណ្ឌទួលគោក បានយកញត្តិទៅដាក់នៅរដ្ឋបាល​រាជធានីភ្នំពេញ ដោយស្នើ​ឱ្យ​អាជ្ញាធរ​ជួយ​ពន្លឿន​ការ​ដោះស្រាយ​​បញ្ហា​ដីធ្លី ខណៈ​ពួកគេ​បារម្ភខ្លាច​​អាជ្ញាធរចុះរុះរើផ្ទះសម្បែងដោយមិនមានដំណោះស្រាយ។ (គួយ ឡង់ឌី)

ករណីនេះ អ្នកស្រីនិយាយថា៖ «ខ្ញុំខកចិត្តខ្លាំងណាស់ ព្រោះគាត់ [អភិបាលរាជធានីភ្នំពេញ] អត់មានដំណោះស្រាយ ពួកគាត់រុញទៅរុញមក។ ហើយខ្ញុំទៅជួបខណ្ឌប៉ុន្មានដងហើយនៅតែអ៊ីចឹង​ ហើយទៅសាលាក្រុងប៉ុន្មានដង​ហើយនៅតែអ៊ីចឹង​»។

តំណាងប្រជាពលរដ្ឋម្នាក់ទៀត អ្នកស្រី ឈូក រតនា មានប្រសាសន៍​ថា កន្លងមក អាជ្ញាធរមូលដ្ឋាននិងមន្ត្រីនៅរដ្ឋបាល​​រាជធានី​ភ្នំពេញ ធ្លាប់ប្រាប់ពលរដ្ឋថា នឹងផ្តល់ដីនៅ​តំបន់​អភិវឌ្ឍន៍​របស់​ក្រុមហ៊ុន 7NG ដែល​ស្ថិត​នៅ​ខេត្តកណ្តាល និង​នៅតំបន់គោកខ្សាច់។ ប៉ុន្តែពួកគេបានបដិសេធ​​ទទួល​យក​ដី​នៅ​តំបន់​អភិវឌ្ឍន៍​របស់​ក្រុមហ៊ុន 7NG ដោយពួកគេ​​ស្នើ​សុំ​ដី​​នៅ «​វត្តទួល​អស់​លោក» ឬដី​ក្នុង​ខណ្ឌទួលគោកវិញ ដើម្បីងាយស្រួលប្រកបមុខរបរចិញ្ចឹមជីវិត ម៉្យាងកូនៗ​ស្រួលទៅរៀនផងដែរ។

អុ្នកស្រីបញ្ជាក់ថា ដើមចមដែលនាំឱ្យពួកគាត់នាំគ្នាទៅរដ្ឋបាល​រាជធានីភ្នំពេញជាញឹកញាប់នោះ ដោយសារពួកគេចង់ឱ្យអាជ្ញាធរពន្លឿនការ​ដោះស្រាយឱ្យបានឆាប់ ព្រោះពួកគេនៅតែបារម្ភពីការបណ្តេញចេញដោយបង្ខំ ហើយមិនទទួលបានសំណងសមរម្យ ជាដើម។

អ្នកស្រីនិយាយថា៖ «បើនិយាយពីលំបាក គឺលំបាកវេទនាណាស់! ភ័យខ្លាចអត់ផ្ទះ អត់សម្បែង ខ្លាចអត់មានលំនៅឋាន ខ្លាចដោះស្រាយមិនបាន អ៊ីចឹង​ពួកខ្ញុំឡើងមកសាលាក្រុងជារៀងរហូត។ ហើយពួកខ្ញុំចេះតែប្រមូលផ្តុំគ្នាឡើងមកសាលារាជធានីភ្នំពេញ ដើម្បីជួបអភិបាលក្រុងឱ្យគាត់មានដំណោះស្រាយ ឱ្យជួយពួកខ្ញុំឱ្យបានសមស្រប»។

អុ្នកស្រី រតនា អះអាងថា បើដល់ថ្ងៃទី១ ខែតុលា ឆ្នាំ២០២១ អភិបាលខណ្ឌទួលគោកមិនដោះស្រាយបញ្ហាដីធ្លីជូនពួកគេឱ្យទទួលបានតម្លាភាពទេ នោះពួកគេនឹងនាំគ្នាបន្តតវ៉ារហូតមានដំណោះស្រាយផងដែរ។

វីអូឌី មិនអាចសុំការបញ្ជាក់​ពីអ្នកនាំពាក្យរដ្ឋបាលរាជធានីភ្នំពេញ​​ លោក ម៉េត មាសភក្តី និងអភិបាលណ្ឌទួល​គោក លោក ជា ពិសី បានទេ នៅថ្ងៃចន្ទនេះ។

នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា នៅដំណាក់កាលនេះ អាជ្ញាធរមិនត្រូវរុញដាក់គ្នាទៅវិញទៅមកនោះទេ ដោយអាជ្ញាធរត្រូវរកវិធីដោះស្រាយសំណងសមរម្យដល់ពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែក ជាជាងដល់ថ្ងៃអភិវឌ្ឍន៍ហើយបែរ​ជាដាក់ថ្ងៃឱសាន​វាទ​រុះរើ ធ្វើឱ្យ​​ពលរដ្ឋ​រងផលប៉ះពាល់។

លោកមានប្រសាសន៍ថា៖ «ប្រសិនបើយើងព្យាយាមអូសបន្លាយមិនព្រមដោះស្រាយ នៅពេលដែលកៀកហើយមិនមានដំណោះស្រាយ ស្រាប់តែជូនដំណឹងឱ្យគាត់រុះរើចេញដោយបង្ខំ វាជាការបំពានទៅលើសិទ្ធិរបស់ពួកគាត់ទៅវិញ។ វាមិនមែនជាដំណោះស្រាយល្អដែរ ហើយវាក្លាយឱ្យមានការតវ៉ា ឬក៏មានការរុះរើដោយបង្ខំ អាចមានហិង្សាផ្សេងៗជាយថាហេតុ យើងមើលមិនឃើញទេ»។

បើតាមញត្តិរបស់ពលរដ្ឋដាក់ទៅរដ្ឋបាល​រាជធានីភ្នំពេ​ញ កាលពីថ្ងៃ​ទី១៣ ខែកញ្ញានេះ ពលរដ្ឋដែល​រងផលប៉ះពាល់​ពី​គម្រោង​ផ្លូវដែក​ទាំង​​ស្រុង មានចំនួន២៥​គ្រួសារ និងចំនួន៥​គ្រួសារទៀតប៉ះពាល់មួយ​ផ្នែកតែប៉ុណ្ណោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ