រដ្ឋាភិបាល ក្នុងទិវាទេសចរណ៍ពិភពលោកឆ្នាំនេះ បានអំពាវនាវដល់ស្ថាប័នរដ្ឋនិងវិស័យឯកជនចូលរួមជំរុញសេវាកម្មទេសចរណ៍ឡើងវិញ តាមបែបគន្លងថ្មីនៃបរិបទកូវីដ-១៩ ដើម្បីទាញយកចំណូល ដោយយោងទៅលើជំនឿទុកចិត្តល្បឿននៃការចាក់វ៉ាក់សំាង និងកត្តាមួយចំនួនទៀត។
ក្នុងសារលិខិតអបអរសាទរទិវាទេសចរណ៍ពិភពលោក នាថ្ងៃទី២៧ ខែកញ្ញា ឆ្នាំ២០២១នេះ លោកនាយករដ្ឋមន្ត្រី ហ៊ុន សែន បានថ្លែងថា វិស័យទេសចរណ៍ដែលពឹងផ្អែកលើការធ្វើដំណើរ បាននិងកំពុងរងផលប៉ះពាល់យ៉ាងដំណំពីវិបត្តិជំងឺកូវីដ-១៩ ទាំងពិភពលោកនិងប្រទេសកម្ពុជា។
លោកបន្តថា ដោយឡែកនៅកម្ពុជា ចំនួនទេសចរអន្តរជាតិបានថយចុះរហូត៨០,២ភាគរយ ប៉ះពាល់ការងារផ្ទាល់ជាង១១ម៉ឺននាក់ និងការងារមិនផ្ទាល់រាប់ម៉ឺននាក់ទៀត ហើយថា និន្នាការនេះនឹងបន្តធ្លាក់ចុះតទៅទៀតក្នុងឆ្នាំ២០២១នេះ។
សារលិខិតដដែលបញ្ជាក់ថា ដោយសារភាពមិនច្បាស់លាស់នៃការរាតត្បាតនៃជំងឺកូវីដ-១៩នេះ និងដើម្បីទ្រទ្រង់ភាពរីកចម្រើនប្រកបដោយបរិយាបន្ន (ការចូលរួមនិងទទួលផលពីបុគ្គលគ្រប់រូបដោយមិនរើសអើង) រដ្ឋាភិបាលបានបង្ហាញនូវលទ្ធភាពមួយចំនួនទៅស្ថាប័នពាក់ព័ន្ធនិងវិស័យឯកជន ក្នុងការបើកលំហវិស័យទេសចរណ៍ទាំងផ្ទៃក្នុងនិងអន្តរជាតិនេះ។
រដ្ឋាភិបាលអះអាងថា៖ «យោងលើល្បឿននៃការចាក់វ៉ាក់សាំងនៅកម្ពុជា យើងជឿជាក់ថា គោលដៅទេសចរណ៍កម្ពុជានឹងត្រូវបានមើលឃើញថា ពិតជាធានាបាននូវសុវត្ថិភាព ទំនុកចិត្ត និងភាពជឿជាក់របស់ជាតិនិងអន្តរជាតិឡើងវិញ កត្តារួមផ្សំ និងការទទួលយកនូវការរស់នៅក្នុងគន្លងប្រក្រតីភាពថ្មី ដោយប្រកាន់នូវវិធានសុខាភិបាលទប់ស្កាត់ជំងឺកូវីដ-១៩ ជាដើម»។
យ៉ាងនេះ សារលិខិតនោះបញ្ជាក់ថា បើទោះបីជាកម្ពុជាមានសុទិដ្ឋិនិយមបែបនេះក្តី តែអាជ្ញាធរពាក់ព័ន្ធគ្រប់លំដាប់ថ្នាក់ វិស័យឯកជន និងភាគីពាក់ព័ន្ធ ត្រូវផ្តល់កិច្ចសហការគាំទ្រចំពោះការរៀបចំផែនការយុទ្ធសាស្ត្រនេះ ដោយបារម្ភពីរលកចម្លងនៅឡើយ។
បើតាមរដ្ឋាភិបាល ទោះបីបច្ចុប្បន្នពេលនេះ កម្ពុជាមានការជឿនលឿនខ្លាំងលើការចាក់វ៉ាក់សាំងក៏ពិតមែន តែកម្ពុជានៅតែស្ថិតក្នុងភាពផុយស្រួយ ដែលតម្រូវឱ្យទាំងអស់គ្នាត្រូវបន្តចូលរួមអនុវត្តវិធានរដ្ឋបាលនិងសុខាភិបាលតទៅទៀតដោយសេចក្តីអត់ធ្មត់ ដើម្បីជាគ្រឹះរឹងមាំនៃការបើកសកម្មភាពទេសចរណ៍ ក៏ដូចជាសកម្មភាពសេដ្ឋកិច្ចនិងសង្គមផ្សេងទៀតឡើងវិញ ប្រកបដោយសុវត្ថិភាពនិងការទទួលខុសត្រូវ៕