រដ្ឋាភិបាលកម្ពុជា នៅព្រឹកថ្ងៃទី២៨ កញ្ញានេះ បានប្រគល់វ៉ាក់សាំងស៊ីណូវ៉ាក់ (Sinovac) ចំនួន២០ម៉ឺនដូសជូនដល់រដ្ឋាភិបាលឡាវ ដើម្បីរួមចំណែកក្នុងការប្រយុទ្ធប្រឆាំងនឹងជំងឺកូវីដ-១៩។
រដ្ឋលេខាធិការប្រចាំការក្រសួងការបរទេស លោក អ៊ុច បូររិទ្ធ ដែលជាតំណាងឱ្យប្រមុខរដ្ឋាភិបាលកម្ពុជា បានប្រគល់វ៉ាក់សាំង Sinovac ចំនួន២០ម៉ឺនដូសដល់លោក ប៊ុនហ្វេង ភូមិម៉ាឡៃស៊ិត (Bounfeng Phommalaysith) រដ្ឋមន្ត្រីក្រសួងសុខាភិបាល និងជាអនុប្រធានគណៈកម្មការ ការពារគ្រប់គ្រងទប់ស្កាត់ការរីករាលដាលនៃជំងឺកូវីដ-១៩ នៃប្រទេសឡាវ ដែលការប្រគល់និងទទួលវ៉ាក់សាំងនេះធ្វើឡើងនៅច្រកព្រំដែនអន្តរជាតិត្រពាំងក្រៀល ក្នុងខេត្តស្ទឹងត្រែង ជាប់ព្រំដែនខេត្តចម្ប៉ាស័ករបស់ឡាវ។
កាលពីយប់ថ្ងៃទី២៧ ខែកញ្ញា ម្សិលមិញ លោក ហ៊ុន សែន នាយករដ្ឋមន្រ្តីកម្ពុជា បានផ្ញើលិខិតជូនលោក ផាន់ខាំ វីផាវ៉ាន់ នាយករដ្ឋមន្រ្តីឡាវ បញ្ជាក់អំពីការផ្តល់អំណោយជូនរដ្ឋាភិបាលឡាវនូវវ៉ាក់សាំងកូវីដ-១៩ (ប្រភេទស៊ីណូវ៉ាក់) ចំនួន២០ម៉ឺនដូស ដើម្បីរួមចំណែកក្នុងការប្រយុទ្ធប្រឆាំងនឹងជំងឺកូវីដ-១៩។
ក្នុងលិខិតនោះ លោកនាយករដ្ឋមន្ត្រី ហ៊ុន សែន បានបញ្ជាក់ថា៖ «វាពិតជាគួរឱ្យក្រៀមក្រំណាស់ដែលអស់ពេលជិតពីរឆ្នាំមកហើយ តែប្រទេសនានាជុំវិញពិភពលោកនៅតែត្រូវតស៊ូទប់ទល់នឹងការផ្ទុះឡើងវិញនៃជំងឺកូវីដ-១៩ ដែលបានបន្តបង្កការលំបាកផ្នែកសេដ្ឋកិច្ច និងដាក់សម្ពាធបន្ថែមទៀត ដល់សុខុមាលភាពរបស់ប្រជាជន។ ប្រទេសកម្ពុជា និងឡាវ ក៏មិនខុសពីប្រទេសដទៃទៀតដែរ ដោយមានការឆ្លងជំងឺកូវីដ-១៩បំប្លែងថ្មីយ៉ាងឆាប់រហ័សនៅក្នុងសហគមន៍»។
លិខិតនោះបន្តថា៖ «ក្នុងស្មារតីសាមគ្គីភាពនិងមិត្តភាពជាប្រពៃណីរវាងប្រទេសបងប្អូនយើងទាំងពីរ រាជរដ្ឋាភិបាលកម្ពុជាសូមផ្តល់ជូនរដ្ឋាភិបាលសាធារណរដ្ឋប្រជាធិបតេយ្យប្រជាមានិតឡាវ នូវអំណោយថ្នាំវ៉ាក់សាំង [ប្រភេទស៊ីណូវ៉ាក់] ចំនួន២០០ ០០០ដូសបន្ថែមទៀត ដើម្បីរួមចំណែកដល់ការខិតខំប្រឹងប្រែងរបស់ប្រទេសឯកឧត្តម ក្នុងការប្រយុទ្ធប្រឆាំងនឹងជំងឺដ៏សាហាវនេះ»។
សូមបញ្ជាក់ថា កាលពីពេលកន្លងទៅ កម្ពុជាក៏បានបរិច្ចាគបរិក្ខារពេទ្យការពារជំងឺកូវីដ-១៩ ដល់ប្រទេសមួយចំនួនផងដែរ ដូចជា ប្រទេសមីយ៉ាន់ម៉ា ទីម័រខាងកើត ឡាវ វៀតណាម និងប្រទេសនេប៉ាល់៕