កម្មករមួយចំនួនដែលបម្រើការងារនៅក្រុមហ៊ុន ផាត់ដាវ របស់វៀតណាមដែលវិនិយោគដាំដំណាំចេក ស្ថិតនៅស្រុកលំផាត់ ខេត្តរតនគិរី បានឱ្យដឹងថា ពួកគេជាង៤០នាក់បានឆ្លងជំងឺកូវីដ-១៩ ហើយគ្រូពេទ្យមិនទាន់ផ្តល់ថ្នាំឱ្យលេបឬការព្យាបាលណាមួយនោះទេ ក្រោយពីធ្វើតេស្តឃើញវិជ្ជមានរយៈពេល៥ថ្ងៃរួចទៅហើយ។
លោក តាន ដេង ដែលអះអាងថាជាកម្មករចម្ការចេកវៀតណាម នៅក្រុមហ៊ុន ផាត់ដាវ ស្ថិតនៅស្រុកលំផាត់ បានប្រាប់ វីអូឌី នៅថ្ងៃទី២៨ ខែកញ្ញានេះថា គាត់ឆ្លងជំងឺកូវីដ-១៩ រយៈពេល៥ថ្ងៃមកហើយ ប៉ុន្តែរហូតដល់ថ្ងៃនេះ មិនទាន់ឃើញគ្រូពេទ្យយកថ្នាំមកឱ្យគាត់លេបនោះឡើយ។
លោកនិយាយថា៖ «ខ្ញុំឆ្លងតាមមិត្តភក្តិរួមការងារធ្វើជាមួយ ដែលគេមកនិយាយជជែកលេង។ ឥលូវអត់មានពេទ្យ អត់មានថ្នាំព្យាបាលទេ ព្រោះខ្ញុំបានខលទៅរកដំណោះស្រាយពីអ្នកផ្សេង ព្រោះខ្ញុំគិតថាខ្ញុំកើតជំងឺកូវីដ។ បើគេទុកចោល ពិបាករៀងៗខ្លួន អាចបាត់បង់ជីវិតបាន»។
លោក សួន ប៊ុន ដែលជាកម្មករម្នាក់ទៀត និយាយថា គាត់ឆ្លងជំងឺកូវីដ-១៩ពីកម្មករដែលធ្វើការងារជាមួយគ្នា ដោយសារតែកន្លែងរស់នៅមិនសូវមានអនាម័យ។
លោកថា៖ «អគារមួយមានបន្ទប់ទឹកដាច់ៗគ្នា ប៉ុន្តែអគារដែលពួកអ្នកដែលមានវិជ្ជមានកូវីដ អត់មានបន្ទប់ទឹកទេ ដល់ពេលបត់ដៃបត់ជើងធម្មតាជាមួយអ្នកដែលអត់មានជំងឺ។ កន្លែងហ្នឹងដូចអត់សូវមានអនាម័យដែរទេ ព្រោះមនុស្សច្រើនពេក វាគគ្រិច ចូលម្តងម្នាក់ៗ។ អ្នកដែលថែៗទៅ អ្នកដែលមិនថែកាន់តែគគ្រិចឡើងៗ វាឆ្លងដល់គ្នាទៅវិញទៅមក»។
លោក សួន ប៊ុន បង្ហាញក្តីបារម្ភថា បើក្រុមហ៊ុននិងក្រុមគ្រូពេទ្យដាក់អ្នកឆ្លងជំងឺកូវីដ-១៩ និងអ្នកមិនឆ្លងនៅទីតាំងអគារនោះជាមួយគ្នា អាចធ្វើឱ្យមានការឆ្លងរាលដាលកាន់តែច្រើនថែមទៀត បើសិនជាមិនមានវិធានការទប់ស្កាត់ឱ្យបានទាន់ពេលវេលា។
លោក ឆាន រ៉ន ដែលអះអាងថាជាមេកាប្រចាំអគារទី៦ នៃក្រុមហ៊ុនវៀតណាមនោះ និយាយថា គាត់ក៏បារម្ភការឆ្លងរាលដាលនៅក្នុងអគារដែលកម្មករចម្ការចេកស្នាក់នៅនោះដែរ ដោយសារពួកគេមិនសូវចេះអនាម័យ ខណៈអ្នកឆ្លងមិនគោរពតាមការណែនាំរបស់ក្រុមគ្រូពេទ្យ។
ទោះជាបែបនេះក្តី លោក ឆាន រ៉ន ស្នើទៅថៅកែក្រុមហ៊ុនរៀបចំកន្លែងស្នាក់នៅ និងរក្សាទុកអ្នកវិជ្ជមានកូវីដ-១៩ និងអ្នកមិនឆ្លង ឱ្យនៅអគារដាច់ដោយឡែកពីគ្នា រួមទាំងចាត់តាំងអ្នកគ្រប់គ្រងតាមអគារឱ្យបានហ្មត់ចត់។
វីអូឌី មិនអាចរកការបំភ្លឺពីតំណាងភាគីក្រុមហ៊ុន ផាត់ដាវ បានទេ នៅថ្ងៃអង្គារនេះ។
ប្រធានមន្ទីរសុខាភិបាលខេត្តរតនគិរី លោក អ៊ុង រតនា មានប្រសាសន៍ថា គិតត្រឹមថ្ងៃទី២៨ ខែកញ្ញា ឆ្នាំ២០២១នេះ ក្រុមគ្រូពេទ្យបានយកសំណាកពីកម្មករក្រុមហ៊ុន ផាត់ដាវ ប្រហែល១ ០០០នាក់ហើយ ក្នុងនោះបានរកឃើញករណីវិជ្ជមានជាង២០០នាក់ ហើយពួកគេត្រូវបានក្រុមគ្រូពេទ្យដាក់ឱ្យព្យាបាលនៅក្នុងទីតាំងអគាររបស់ក្រុមហ៊ុន ដាច់ចេញពីអ្នកមិនឆ្លងជំងឺ។
ប្រធានមន្ទីររូបនោះប្រាប់កម្មករកុំឱ្យមានការព្រួយបារម្ភនិងភ្ញាក់ផ្អើលតាមការញុះញង់របស់ក្រុមមនុស្សមួយក្តាប់តូចដែលថា គ្រូពេទ្យមិនបានផ្តល់ថ្នាំព្យាបាលឱ្យអ្នកជំងឺ ព្រោះបច្ចុប្បន្ន គ្រូពេទ្យបានយកចិត្តទុកដាក់ព្យាបាលអ្នកជំងឺយ៉ាងដិតដល់បំផុត។
លោកមានប្រសាសន៍ថា៖ «កុំឱ្យបារម្ភ! គ្រូពេទ្យគេទៅព្យាបាលត្រឹមត្រូវ ហើយម្ហូបអាហារក៏គេផ្តល់ជូនត្រឹមត្រូវដែរ។ អត់អីទេ! កុំឱ្យបារម្ភ! កុំឱ្យចលាចល! កុំឱ្យជឿតាមការញុះញង់ពីអ្នកដទៃ នាំឱ្យមានការកង្វល់ដល់ថ្នាក់ដឹកនាំ ទៅដល់ក្រសួងសុខាភិបាលដែលកំពុងតែរវល់»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា អាជ្ញាធរថ្នាក់ជាតិនិងថ្នាក់ក្រោមជាតិ ជាពិសេសគ្រូពេទ្យត្រូវបែងចែកកន្លែងស្នាក់នៅដាច់ដោយឡែកពីគ្នារវាងអ្នកជំងឺ អ្នកសង្ស័យ និងអ្នកមិនឆ្លងជំងឺកូវីដ-១៩ ទើបអាចទប់ស្កាត់ការឆ្លងរាលដាលក្នុងក្រុមហ៊ុននិងតាមសហគមន៍បាន។
លោកថា៖ «បើសិនជាឱ្យនៅរួមគ្នា ហើយអត់មានថ្នាំជួយគាត់កាត់បន្ថយការរាលដាល អាចឆ្លងមក១ ០០០នាក់ទាំងអស់ ឬក៏អាចឆ្លងទៅសហគមន៍ផ្សេងៗទៀតនៅក្នុងតំបន់ហ្នឹង។ បើសិនជាគាត់ [កម្មករ] ឈឺ យើងត្រូវញែកគាត់ទៅមណ្ឌលក្បែរហ្នឹង ឬមួយយើងរៀបចំកន្លែងឱ្យគាត់ស្អាតដើម្បីសម្រាក ហើយឱ្យថ្នាំគាត់ ព្យាបាលគាត់»។
បើតាមមេការនៅក្រុមហ៊ុន ផាត់ដាវ កម្មករនៅទីនោះសរុបមានចំនួនជាង១ ០០០នាក់ និងស្នាក់នៅអគារចំនួន១៣។
ក្រសួងសុខាភិបាល ឱ្យដឹងថា គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួនជាង១១ម៉ឺននាក់ (១១០ ៧៩២នាក់) ក្នុងនោះ អ្នកជំងឺព្យាបាលជាសះស្បើយចំនួនជាង១០ម៉ឺននាក់ (១០១ ៦៩០នាក់)។ ចំណែកអ្នកស្លាប់កើនដល់ចំនួនជាង២ ០០០នាក់ (២ ២៨៧នាក់) និងករណីនាំចូលពីក្រៅប្រទេសចំនួនជិត២ម៉ឺននាក់ (១៨ ៨៣៧នាក់)៕