អគ្គរដ្ឋទូតកូរ៉េខាងជើងប្រចាំអង្គការសហប្រជាជាតិ លោក Kim Song កាលពីថ្ងៃចន្ទម្សិលមិញ បានអំពាវនាវឱ្យសហរដ្ឋអាមេរិកបោះបង់ចោលនូវ «គោលនយោបាយអរិភាព (hostile policy)» របស់ខ្លួនចំពោះទីក្រុងព្យុងយ៉ាង និងលើកឡើងថា គ្មាននរណាម្នាក់អាចបដិសេធសិទ្ធិរបស់ខ្លួនក្នុងការការពារប្រទេស និងសាកល្បងអាវុធនានាបានឡើយ។
ទីភ្នាក់ងារសារព័ត៌មាន Reuters បានស្រង់សម្ដីមន្រ្តីទូតរូបនេះយកមកចុះផ្សាយថា៖ «គ្មាននរណាម្នាក់អាចបដិសេធចំពោះសិទ្ធិដ៏ត្រឹមត្រូវក្នុងការការពារខ្លួនរបស់កូរ៉េខាងជើង ក្នុងការអភិវឌ្ឍ សាកល្បង ផលិត និងគ្រប់គ្រងប្រព័ន្ធអាវុធឡើយ»។
លោក Kim Song បន្តថា កូរ៉េខាងជើងក៏នឹងមិនរំលោភឬបង្កគ្រោះថ្នាក់ដល់សន្តិសុខរបស់សហរដ្ឋអាមេរិក កូរ៉េខាងត្បូង និងប្រទេសជិតខាងផងដែរ។
លោកបន្ថែមថា៖ «យើងគ្រាន់តែបង្កើតកិច្ចការពារជាតិរបស់យើង ដើម្បីការពារខ្លួនយើង ក៏ដូចជាការពារសន្តិសុខនិងសន្តិភាពរបស់ប្រទេសប្រកបដោយភាពជឿជាក់តែប៉ុណ្ណោះ»។
គួរបញ្ជាក់ថា ប្រធានាធិបតីកូរ៉េខាងត្បូង លោក Moon Jae-in នៅក្នុងមហាសន្និបាតអង្គការសហប្រជាជាតិ កាលពីសប្តាហ៍មុន ក៏បានធ្វើការអំពាវនាវសារជាថ្មីម្តងទៀតឱ្យមានការប្រកាសបញ្ចប់សង្គ្រាមឧបទ្វីបកូរ៉េ ១៩៥០-១៩៥៣ ជាផ្លូវការផងដែរ។
ជាការឆ្លើយតប លោក Kim Song បានបញ្ជាក់ឱ្យដឹងថា ដើម្បីអាចឱ្យសកម្មភាពនេះកើតឡើងបាន អាមេរិកគួរតែបញ្ឈប់ការចូលរួមសមយុទ្ធយោធាជាមួយកូរ៉េខាងត្បូងជាអចិន្ត្រៃយ៍ និងការដាក់ពង្រាយអាវុធយុទ្ធសាស្ត្រនៅជុំវិញឧបទ្វីបកូរ៉េ៕
