សមាជិកបណ្ដាញព្រៃឡង់ម្នាក់នៅស្រុកសណ្ដាន់ ខេត្តកំពង់ធំ បង្ហាញការខកចិត្តនិងចាត់ទុកការលើកពេលប្រកាសសាលក្រមរបស់សាលាដំបូងខេត្តកំពង់ធំ ថាបានធ្វើឱ្យប៉ះពាល់ផ្លូវចិត្តរបស់លោក ត្បិតសំណុំរឿងនេះបានពន្យារ២លើករួចមកហើយ បើគិតទាំងក្នុងដំណាក់កាលសវនាការ ខណៈលោកកំពុងគេចខ្លួនដោយបារម្ភពីសុវត្ថិភាព។
ការខកចិត្តនេះ ក្រោយពេលតុលាការខេត្តកំពង់ធំ កាលពីថ្ងៃទី១៦ ខែកញ្ញា ឆ្នាំ២០២១ បានបើកសវនាការលើសំណុំរឿងរបស់សមាជិកបណ្ដាញសហគមន៍ព្រៃឡង់ លោក ចាន់ ធឿន ដោយសម្រេចថានឹងប្រកាសសាលក្រមនៅថ្ងៃទី២៨ ខែកញ្ញានេះ។
សមាជិកបណ្ដាញព្រៃឡង់រស់នៅភូមិត្រពាំងត្រឡាច ឃុំមានរិទ្ធ លោក ចាន់ ធឿន ប្រាប់ វីអូឌី ថាចៅក្រមបានសម្រេចលើកប្រកាសសាលក្រមសំណុំរឿងរបស់ខ្លួននៅថ្ងៃអង្គារនេះ ដោយលើកយកទៅប្រកាសនៅថ្ងៃទី១២ ខែតុលា ឆ្នាំ២០២១ ក្រោមហេតុផលកូវីដ-១៩។
លោកបន្តថា បច្ចុប្បន្ន រូបលោកបារម្ភពីសុវត្ថិភាព ដោយសារបុគ្គលឈ្មោះ ប៉ាក យ៉ាងគួ ដែលបានប្ដឹងគាត់នោះជាកូនមេបញ្ជាការរងកងរាជអាវុធហត្ថខេត្តកំពង់ធំ និងជាឈ្មួញរកស៊ីឈើច្រើនឆ្នាំមកហើយក្នុងខេត្តនេះ ហើយធ្លាប់បាននាំកម្លាំងមកដល់ផ្ទះរបស់លោកថែមទៀត។
លោកថា៖ «មុនពេលបើកសវនាការ ពន្យារម្ដងហើយ! ដល់ប្រកាស ពន្យារទៀត! ចូល២ដងហើយ! ខ្ញុំដូចមិនទុកចិត្តម៉េចថាបើពន្យារហូតអ៊ីចឹង។ ខ្ញុំមានអារម្មណ៍ភ័យដែរ ខ្ញុំភ័យទី១ ឈ្មញឈើគេអាងឪពុកគេប៉េអឹម បានគេមានសិទ្ធិមកតាមខ្ញុំដល់ផ្ទះ។ គេមកតាមខ្ញុំដល់ផ្ទះហ្នឹង មកឡានដល់ទៅ២ បានខ្ញុំគេចខ្លួនហ្នឹង កុំអីខ្ញុំក៏មិនគេចខ្លួនដែរ»។
លោក ចាន់ ធឿន ចាត់ទុកបណ្ដឹងនេះថា ជារឿងអយុត្តិធម៌សម្រាប់រូបលោកដែលជាអ្នកការពារព្រៃឈើ បែរជាមិនត្រូវបានលើកទឹកចិត្ត ហើយត្រូវបានជនបំផ្លាញព្រៃឈើប្ដឹងទៅតុលាការទៅវិញ។
លោកថា៖ «គេអ្នកទាញយកកាំបិតពីខ្លួនខ្ញុំ ភ្ជង់ខ្ញុំយកទាំងរបស់ខ្ញុំ ដូចប្លន់ខ្ញុំហើយ! គេថាខ្ញុំប៉ុនប៉ងធ្វើមនុស្សឃាតទៀត។ ខាងតុលាការគេដាក់ខ្ញុំអ៊ីចឹងទៅ ខ្ញុំគិតថា វាអយុត្តិធម៌ណាស់សម្រាប់ខ្ញុំ។ ជាសកម្មជនការពារព្រៃឈើមួយ លះបង់អ្វីគ្រប់យ៉ាង មិនបានរកលុយគាប់ប្រសើរ ហើយខំប្រឹងការពារ ហើយបែរជាមកទទួលសម្ពាធអ៊ីចឹងទៀត។ ខ្ញុំគិតថា វាអយុត្តិធម៌សម្រាប់ខ្ញុំខ្លាំងណាស់»។
អ្នកនាំពាក្យអយ្យការអមសាលាដំបូងខេត្តកំពង់ធំ លោក សាយ វាសនា មានប្រសាសន៍ថា ការលើកពេលនេះ ដើម្បីបង្ការនិងទប់ស្កាត់ការឆ្លងរាលដាលជំងឺកូវីដ-១៩។
អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកំពង់ធំ លោក សុខ រដ្ឋា មានប្រសាសន៍ថា តុលាការមិនគួរពន្យារពេលប្រកាសសាលក្រមនោះទេ ត្បិតវាធ្វើឱ្យប៉ះពាល់សិទ្ធិសេរីភាពរបស់សកម្មជនការពារព្រៃឡង់រូបនោះ។
លោកថា៖ «ទោះបីជាសំណុំរឿងហ្នឹងថ្មីក៏ដោយ ក៏មិនគួរពន្យារដែរ បើសិនជាស្ថានការណ៍អាចពន្លឿនបាន គួរតែពន្លឿនសំណុំរឿងហ្នឹងឱ្យបានឆាប់ដែរ។ ណាមួយសហគមន៍យើងដឹងស្រាប់ហើយ ពួកគាត់មានឆន្ទៈ មនសិការ ចូលរួមការពារធនធានធម្មជាតិរបស់កម្ពុជាហ្នឹងឯង ជាផលប្រយោជន៍រួមតែម្ដង។ បើសិនជាមានចំណុចខ្វះខាតប៉ះពាល់ផ្លូវច្បាប់ណាមួយ គួរណាពិចារណាឱ្យបានហ្មត់ចត់ហើយលឿនបំផុតសម្រាប់គាត់»។
សមាជិកបណ្ដាញព្រៃឡង់នៅខេត្តកំពង់ធំ លោក ចាន់ ធឿន ធ្លាប់អះអាងថា កាលពីខែកក្កដា ឆ្នាំ២០២០ រូបលោកនិងពលរដ្ឋផ្សេងទៀតបានចុះទប់ស្កាត់បទល្មើសព្រៃឈើនៅក្នុងសហគមន៍មួយស្ថិតនៅភូមិត្រពាំងត្រឡាច ឃុំមានរិទ្ធ ស្រុកសណ្ដាន់ ដោយប្រទះឃើញបុគ្គលឈ្មោះ ប៉ាក យ៉ាងគួ បានដឹកឈើតាមគោយន្តចេញពីព្រៃសហគមន៍។
សកម្មជនព្រៃឈើរូបនេះបន្តថា រូបលោកបានយកទូរសព្ទថតគោយន្តដឹកឈើនោះ ហើយឈ្មោះ ប៉ាក យ៉ាងគួ បានស្ទុះប្រទាញប្រទង់ដណ្ដើមទូរសព្ទនិងឆក់យកកាំបិតស្នៀតភ្ជង់រូបលោក រួចប្តឹងលោកទៅតុលាការថែមទៀត ក្រោមបទចោទ «ប៉ុនប៉ងមនុស្សឃាត» និងទាមទារសំណង២ ០០០ដុល្លារ៕
