អតីតប្រធានចលនាយុវជនគណបក្សសង្គ្រោះជាតិ ប្រចាំនៅប្រទេសកូរ៉េខាងត្បូង លោក យឹម ស៊ីណន បានស្នើសុំលោកនាយករដ្ឋមន្ត្រី ហ៊ុន សែន ឱ្យជួយស្នើដល់អាជ្ញាធរមានសមត្ថកិច្ចដកការចោទប្រកាន់ទាំងឡាយទៅលើខ្លួននិងបក្ខពួក ពាក់ព័ន្ធនឹងព្រឹត្តិការណ៍វិលចូលស្រុករបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
ក្នុងលិខិតរបស់លោក យឹម ស៊ីណន ចុះថ្ងៃទី២៩ ខែកញ្ញា ឆ្នាំ២០២១នេះ បានសារភាពថា ខ្លួននិងបក្ខពួកចំនួន៩នាក់ផ្សេងទៀតធ្លាប់ដឹកនាំការធ្វើបាតុកម្មតស៊ូមតិអហិង្សា ដោយអនុវត្តតាមគោលការណ៍និងលក្ខន្តិកៈរបស់អតីតគណបក្សសង្គ្រោះជាតិ គោរពតាមរដ្ឋធម្មនុញ្ញនិងច្បាប់នានារបស់កម្ពុជា ក៏ដូចជាគោលការណ៍ប្រជាធិបតេយ្យនិងសិទ្ធិមនុស្សជាសកល។
ប៉ុន្តែជាអកុសល លោកថា ចលនាធ្វើមាតុភូមិនិវត្តន៍ ៩វិច្ឆិកា ឆ្នាំ២០១៩ បានបង្កឱ្យមានការជេរប្រមាថព្រះមហាក្សត្រ និងបំផុសឱ្យមានការបះបោរពីសំណាក់មហាជននិងកងកម្លាំងប្រដាប់អាវុធ ឱ្យប្រឆាំងទៅនឹងរដ្ឋាភិបាលជាដើម។ យុទ្ធនាការនេះ រូបលោកនិងសហការីជិតស្និទ្ធទាំងនេះមិនត្រឹមតែមិនគាំទ្រនោះទេ ថែមទាំងប្រកាសប្រឆាំងយ៉ាងដាច់អហង្ការទៀតផង។
ករណីនេះ លោក យឹម ស៊ីណន បានស្នើសុំលោកនាយករដ្ឋមន្ត្រី ហ៊ុន សែន ឱ្យជួយស្នើដល់អាជ្ញាធរមានសមត្ថកិច្ច ដកការចោទប្រកាន់ទាំងឡាយទៅលើរូបលោកនិងបក្ខពួកដែលពាក់ព័ន្ធនឹងព្រឹត្តិការណ៍៩វិច្ឆិកានោះ។
លោក ស៊ីណន សរសេរក្នុងខ្លឹមសារលិខិតថា៖ « ខ្ញុំបាទ និងសហការីដែលជាសមាជិកចលនាយុវជនចំនួន១០រូបទៀត ក៏សូមសម្ដេចមេត្តាស្នើទៅអាជ្ញាធរមានសមត្ថកិច្ចឱ្យដកការចោទប្រកាន់ទាំងឡាយដោយក្តីមេត្តានិងការអនុគ្រោះ»។
កាលពីដើមខែមិថុនា ឆ្នាំ២០២១ អតីតប្រធានចលនាយុវជននៃអតីតគណបក្សសង្រ្គោះជាតិ (CNRP) នៅប្រទេសកូរ៉េខាងត្បូង ដែលធ្លាប់រិះគន់រដ្ឋាភិបាលកម្ពុជាឥតសំចៃមាត់រូបនេះ ក៏បានសម្រេចលាលែងពីតំណែងនិងប្រកាសឈប់ប្រឡូកក្នុងឆាកនយោបាយ ដោយសារចង់ក្លាយទៅជាពលរដ្ឋធម្មតាវិញ។
អ្នកនំាពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ការស្នើសុំរបស់លោក យឹម ស៊ីណន ឱ្យដកការចោទប្រកាន់លើបទល្មើសនានា ទំនងជាមិនអាចទៅរួចនោះទេ ព្រោះរឿងនេះស្ថិតនៅក្នុងដៃតុលាការទៅហើយ។
លោកមានប្រសាសន៍ថា៖ «យឹម ស៊ីណន គាត់ធ្វើលិខិតស្នើសុំនេះជាសិទ្ធិរបស់គាត់ទេ គាត់ដឹងកំហុសរបស់គាត់ ក៏ប៉ុន្តែបើរឿងហ្នឹងវាពាក់ព័ន្ធដល់ផ្លូវតុលាការហើយ គឺមិនអាចអ្នកណាលើកលែងបានទេ មានតែទុកឱ្យតុលាការដំណើរការតាមនីតិវិធី។ ប៉ុន្តែបើរឿងហ្នឹងនៅក្រៅតុលាការ ហើយមិនមានពិរុទ្ធភាពធ្ងន់ធ្ងរ វាអាចមានលទ្ធភាព[ជួយ]ដែរ»។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា ដើមចមដែលនាំឱ្យក្រុមយុវជនអតីតបក្សប្រឆាំងនៅប្រទេសកូរ៉េស្នើសុំលោកនាយករដ្ឋមន្ត្រីដកការចោទប្រកាន់ ដោយសារតែពួកគេអស់ជំនឿលើអតីតបក្សប្រឆាំងដែលបែកបាក់សាមគ្គីគ្នា។
លោកយល់ថា រដ្ឋាភិបាលគួរតែដកការចោទប្រកាន់លើក្រុមយុវជនទាំងនោះ ដើម្បីផ្តល់ឱកាសឱ្យពួកគេបានចូលរួមអភិវឌ្ឍន៍សង្គមជាតិជាមួយរដ្ឋាភិបាលតាមវិធីសាស្ត្រផ្សេងៗ។
លោកថា៖ «ការបែកបាក់ផ្ទៃក្នុងរបស់គណបក្សសង្គ្រោះជាតិ បានធ្វើឱ្យក្រុមយុវជនដែលគាត់ស្រឡាញ់ប្រជាធិបតេយ្យ ស្រឡាញ់កិច្ចការសង្គម ចង់ជួយសង្គម គឺត្រូវបានគេទាត់ចោលទៅម្ខាង ហើយរងគ្រោះដោយសារតែការកើតឡើងនូវជម្លោះផ្ទៃក្នុងរបស់ខ្លួន។ ហើយយើងឃើញថា ជម្លោះនេះមិនងាយបញ្ចប់ទេ ហើយយុវជនដែលនៅប្រទេសកូរ៉េ គឺគាត់មិនមែនជាជនជាតិកូរ៉េ ហើយគាត់មិនអាចរស់នៅទីនោះអស់មួយជីវិតបានទេ។ ដូច្នេះនៅក្នុងដំណាក់កាលនេះ ខ្ញុំគិតថា វាសមរម្យដែរហើយដែលពួកគាត់ពិចារណាថា សុំឱ្យមានការយោគយល់ឬការលើកលែងពួកគាត់ឱ្យបានរួចផុតពីការចោទប្រកាន់»។
ព្រឹត្តិការណ៍៩វិច្ឆិកា ឆ្នាំ២០១៩ ត្រូវបានបង្កើតឡើងដោយលោក សម រង្ស៉ី ប្រធានអតីតគណបក្សសង្រ្គោះជាតិ ដោយកំណត់ពេលវិលត្រលប់មកប្រទេសកម្ពុជាវិញ ជាមួយនឹងការអំពាវនាវឱ្យកងកម្លាំងប្រដាប់អាវុធប្រឆាំងរាជរដ្ឋាភិបាល និងអំពាវនាវឱ្យប្រជាពលរដ្ឋងើបបះបោរ។ ព្រឹត្តិការណ៍នេះបណ្តាលឱ្យមានការចាប់ខ្លួនអតីតសកម្មជននិងមន្ត្រីរបស់ខ្លួនជាច្រើននាក់ ប៉ុន្តែអ្នកខ្លះក៏ត្រូវបានដោះលែងវិញ ហើយខ្លះទៀតកំពុងជាប់ឃុំនៅឡើយ រីឯមួយចំនួនទៀតកំពុងរត់ភៀសខ្លួនទៅក្រៅប្រទេសថែមទៀតផង។
ក្រោយមក នៅថ្ងៃទី០១ ខែមីនា ឆ្នាំ២០២១ សាលាដំបូងរាជធានីភ្នំពេញ បានប្រកាសសាលក្រមកាត់ទោសលោក សម រង្ស៉ី ពាក់ព័ន្ធការប៉ុនប៉ងធ្វើរដ្ឋប្រហារផ្ដួលរំលំរាជរដ្ឋាភិបាលស្របច្បាប់ ក្រោមឧបាយកលជាផែនការនៃការវិលត្រលប់ចូលប្រទេសកម្ពុជា អំឡុងព្រឹត្តិការណ៍ថ្ងៃទី៩ ខែវិច្ឆិកា ឆ្នាំ២០១៩ ឱ្យជាប់ពន្ធនាគារ២៥ឆ្នាំ។ ដោយឡែកលោកស្រី មូរ សុខហួរ និងលោក អេង ឆៃអ៊ាង ឱ្យជាប់ពន្ធនាគារចំនួន២២ឆ្នាំ និងកាត់ទោសលោកស្រី ជូឡុង សូមួរ៉ា, លោក ម៉ែន សុថាវរិន្ទ្រ, លោក អ៊ូ ច័ន្ទឫទ្ធិ, លោក ហូរ វ៉ាន់, លោក ឡុង រី និងលោក នុត រំដួល ឱ្យជាប់ពន្ធនាគារ២០ឆ្នាំ ព្រមទាំងដកហូតសិទ្ធិបោះឆ្នោតនិងសិទ្ធិឈរឈ្មោះបោះឆ្នោតទៀតផង៕