ប្រធានគណៈមេធាវីកម្ពុជា បានឱ្យដឹងថា ក្រុមគណៈមេធាវីកំពុងពិនិត្យមើលលើលិខិតបំភ្លឺរបស់ លោកមេធាវី ផាន់ ច័ន្ទស័ក្ដិ ករណីមេធាវីរូបនេះបានប្រកាសលក់សំឡេងឆ្នោតរបស់ខ្លួនដែលជាការបំពានក្រមសីលធម៌មេធាវី និងការឃោសនាបោះឆ្នោត។
យោងតាមសេចក្ដីថ្លែងការណ៍របស់គណៈមេធាវី នៅថ្ងៃទី២១ ខែកញ្ញា ឆ្នាំ២០២១ បានថ្កោលទោសចំពោះអំពើរបស់លោកមេធាវី ផាន់ ច័ន្ទស័ក្ដិ ដែលមានអត្តលេខ២៥៣ ក្នុងករណីដែលលោកបានបង្ហោះជាសាធារណៈក្នុងក្រុមតេឡេក្រាមឈ្មោះ «CLOមតិមេធាវី» ដែលមានខ្លឹមសារថា «លក់សំឡេងឆ្នោត បោះឆ្នោតជូន០១សំឡេង តម្លៃ១ ០០០ដុល្លារ»។
តាមរយៈសេចក្ដីថ្លែងការណ៍ដដែលនេះបានបញ្ជាក់ថា អំពើនេះជាការបំពានលើក្រមសីលធម៌មេធាវី និងសេចក្ដីសម្រេចស្ដីពីការឃោសនាបោះឆ្នោតជ្រើសតាំងសមាជិកក្រុមប្រឹក្សាគណៈមេធាវីអាណត្តិទី១០ ក្នុងចេតនាប៉ះពាល់ដល់កិត្តិយស កេរ្តិ៍ឈ្មោះ និងសេចក្ដីថ្លៃថ្នូររបស់មេធាវី។
ប្រធានគណៈមេធាវី លោក លី ច័ន្ទតុលា មានប្រសាសន៍ប្រាប់ VOD នៅថ្ងៃទី២៨ ខែកញ្ញានេះថា គណៈមេធាវីកំពុងពិនិត្យលិខិតបំភ្លឺលើករណីលោកមេធាវី ផាន់ ច័ន្ទស័ក្ដិ ខណៈលោកមេធាវីរូបនេះ កំពុងតែជាប់នៅក្នុងតំបន់បិទខ្ទប់ក្នុងខេត្តសៀមរាប។
លោកលើកឡើងថា៖ «យើងបានដំណើរការហើយ ដោយសារតែគាត់ [មេធាវី ផាន់ ច័ន្ទស័ក្ដិ] បានផ្ញើលិខិតមកគណៈមេធាវី អ៊ីចឹងយើងកំពុងតែពិនិត្យទៅលើអ្វីដែលគាត់បំភ្លឺមកហ្នឹង។ គាត់បានផ្ញើលិខិតបំភ្លឺហ្នឹងមកហើយ តែដោយសារតែគាត់ជាប់បិទខ្ទប់នៅខេត្តសៀមរាប។ អ៊ីចឹងទៅខាងគណៈមេធាវីនឹងពិនិត្យឱ្យបានលឿននូវអ្វីដែលគាត់បញ្ជាក់មក»។
លោកបានបន្តថា៖ «ដោយសារតែគាត់បានបង្ហោះសារនៅក្នុងក្រុមពិភាក្សា ហើយសារដែលគាត់បង្ហោះលក្ខណៈថាប្រកាសលក់សំឡេងឆ្នោតគាត់ ហើយធម្មតាការប្រកាសធ្វើអ៊ីចឹង ទាំងច្បាប់ជាតិ ទាំងច្បាប់របស់គណៈមេធាវី គឺយើងមិនអនុញ្ញាតទេ ធ្វើឱ្យប៉ះពាល់ដល់កិត្តិយស តម្លៃស្ថាប័នយើង»។
លោកមេធាវី ផាន់ ច័ន្ទស័ក្ដិ នៅថ្ងៃទី២៩ ខែកញ្ញានេះ សុំមិនឆ្លើយអ្វីច្រើនឡើយ ដោយថា រឿងនេះបានបញ្ចប់ ហើយជារឿងផ្ទៃក្នុងរបស់គណៈមេធាវីប៉ុណ្ណោះ។
លោកថា៖ «ខ្ញុំអត់ធ្វើអធិប្បាយ ព្រោះរឿងបានបញ្ចប់ទៅហើយ ហើយជារឿងផ្ទៃក្នុងរបស់គណៈមេធាវីទេ។ អ៊ីចឹងសុំរក្សាព័ត៌មានស្ងៀមស្ងាត់ចុះ មិនអធិប្បាយជូនទេ ព្រោះជារឿងចាស់យូរហើយ»។
គួរបញ្ជាក់ផងដែរថា លោកមេធាវី លី ច័ន្ទតុលា បានជាប់ឆ្នោតជាប្រធានថ្មីនៃគណៈមេធាវី នៃព្រះរាជាណាចក្រកម្ពុជា សម្រាប់អាណត្តិទី១៣ កាលពីថ្ងៃទី១៦ ខែតុលា ឆ្នាំ២០២០ ខណៈអាណត្តិទី១៤ នឹងត្រូវបោះឆ្នោតក្នុងឆ្នាំ២០២២។ ការបោះឆ្នោតរើសប្រធានគណៈមេធាវីធ្វើឡើងក្នុងរយៈពេល២ឆ្នាំម្ដង រីឯប្រធានគណៈមេធាវីវិញអាចធ្វើជាប្រធានបានត្រឹម២អាណត្តិតែប៉ុណ្ណោះ៕
