ចក្រភពអង់គ្លេស បានឱ្យដឹងនៅថ្ងៃអង្គារម្សិលមិញថា ខ្លួននឹងចាប់ផ្តើមការចរចាជាផ្លូវការនានាជាមួយជប៉ុន ដើម្បីពង្រឹងទំនាក់ទំនងការពារជាតិរបស់ពួកគេ ដែលជាផ្នែកមួយនៃការផ្លាស់ប្តូរការផ្តោតជាយុទ្ធសាស្ត្ររបស់ប្រទេសនេះឆ្ពោះទៅកាន់តំបន់ឥណ្ឌូ-ប៉ាស៊ីហ្វិក។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្រ្តីក្រសួងការពារជាតិអង់គ្លេស លោក Ben Wallace ដែលបានលើកឡើងថា កិច្ចពិភាក្សាទាំងនេះនឹងស្វែងរកការបង្កើតលក្ខខណ្ឌសម្រាប់ «កម្មវិធីចូលរួមការពារជាតិចម្រុះនិងកាន់តែស៊ីជម្រៅជាងមុន» ព្រមទាំងលក្ខខណ្ឌសម្រាប់មន្រ្តីយោធាអង់គ្លេសនិងជប៉ុន ក្នុងការធ្វើសកម្មភាពនៅក្នុងប្រទេសទាំងពីរទៅវិញទៅមកផងដែរ។
រដ្ឋមន្រ្តីក្រសួងការពារជាតិរូបនេះបានបន្តថា កិច្ចចរចាជាមួយជប៉ុននឹងបង្ហាញជាសញ្ញាយ៉ាងច្បាស់លាស់អំពីការប្តេជ្ញាចិត្តរបស់ប្រទេសទាំងពីរក្នុងការគាំទ្រដល់សណ្ដាប់ធ្នាប់អន្តរជាតិដែលផ្អែកលើច្បាប់។
គួរបញ្ជាក់ថា ចក្រភពអង់គ្លេស កាលពីសប្តាហ៍មុន ក៏បានចូលរួមជាមួយសហរដ្ឋអាមេរិកនិងអូស្ត្រាលី នៅក្នុងសម្ព័ន្ធភាពសន្តិសុខឥណ្ឌូ-ប៉ាស៊ីហ្វិកថ្មីមួយដែលនឹងផ្តល់ឱ្យអូស្ត្រាលីនូវបច្ចេកវិទ្យានិងសមត្ថភាពក្នុងការដាក់ពង្រាយនាវាមុជទឹកដើរដោយថាមពលនុយក្លេអ៊ែរផងដែរ៕
