គណៈគ្រប់គ្រងថ្នាក់ឧត្ដមសិក្សានៅរាជធានីភ្នំពេញមួយចំនួនអះអាងថា ពួកគេត្រៀមរៀបចំបើកដំណើរការថ្នាក់រៀនឡើងវិញ ក្រោយពិធីបុណ្យភ្ជុំបិណ្ឌចប់រួចរាល់។
ការរៀបចំនេះធ្វើឡើងបន្ទាប់ពីក្រសួងអប់រំ យុវជន និងកីឡា នៅថ្ងៃទី២៧ ខែកញ្ញា ឆ្នាំ២០២១ បានចេញសេចក្ដីណែនាំចំនួន១១ចំណុចនៃការបើកដំណើរការសាលារៀនឡើងវិញ សម្រាប់គ្រឹះស្ថានឧត្ដមសិក្សាសាធារណៈនិងឯកជនទាំងអស់។
សាកលវិទ្យាធិការរងនៃសាកលវិទ្យាល័យជាតិគ្រប់គ្រង លោក សេង ប៊ុនធឿន មានប្រសាសន៍ប្រាប់ វីអូឌី កាលពីម្សិលមិញថា ចំពោះសាកលវិទ្យាល័យជាតិគ្រប់គ្រង បានត្រៀមលក្ខណៈបើកកិច្ចប្រជុំ ដើម្បីត្រៀមបើកដំណើរការឡើងវិញនូវការរៀននិងបង្រៀនក្នុងថ្នាក់ បន្ទាប់ពីពិធីបុណ្យភ្ជុំបិណ្ឌត្រូវបានបញ្ចប់។
លោកថា៖ «យើងអាចបង្ការការឆ្លងបាននៅពេលដែលយើងបើកថ្នាក់ ហើយជាពិសេសយើងយកការណែនាំរបស់ក្រសួងសុខាភិបាលយកមករៀបចំមកធ្វើជាគោល ដើម្បីធ្វើដំណើរការបើកថ្នាក់ហ្នឹងឱ្យវារលូន ៣កុំ ៣ការពារ [និង] SOP [នីតិវិធីស្ដង់ដារប្រតិបត្តិអប្បបរមា] ឬក៏បែបបទណាមួយដែលយើងគិតថាគេចផុតពីការឆ្លងរាលដាលពីជំងឺកូវីដ-១៩ ដល់និស្សិត លោកគ្រូ-អ្នកគ្រូ។ ជាគោលការណ៍ ដូចជាថ្ងៃខាងមុខនេះ យើងនឹងប្រជុំជាមួយសាកលវិទ្យាធិការ ស្ដាប់មតិប្រជុំ ដើម្បី[បង្ការការ]កើតមាននូវការឆ្លងរីករាលដាលបាន»។
លោកបន្ថែមថា សាលាក៏បានរៀបចំរួចរាល់និងកំណត់នូវចំនួនសិស្សដោយមិនឱ្យលើសពី២០នាក់ក្នុងមួយថ្នាក់ ហើយមានគោលការណ៍ដូចជា ទី១ ឱ្យនិសិ្សតស្ម័គ្រចិត្តក្នុងការរៀននៅក្នុងថ្នាក់ដោយខ្លួនឯង ទី២ ត្រូវរៀនវិលជុំឬឆ្លាស់វេនគ្នា ជាដើម។
លោកបន្តថា៖ «ជាគោលការណ៍ សាលកលវិទ្យាល័យជាតិគ្រប់គ្រង ធ្វើអ្វីៗទៅតាមអារម្មណ៍របស់និស្សិត ទៅតាមឆន្ទៈរបស់រាជរដ្ឋាភិបាល ក៏ដូចជាក្រសួងអប់រំ យុវជន និងកីឡា បានសេចក្ដីថា យើងបានស្ទាបស្ទង់ យើងបានធ្វើការស្រាវជ្រាវ ដើម្បីស្វែងរកដំណោះស្រាយរួមគ្នា។ អ៊ីចឹងនិស្សិតប្រហែល៩០ភាគរយចង់ចូលថ្នាក់វិញ ប៉ុន្តែយើងមិនអាចអនុញ្ញាតឱ្យគាត់ចង់បានទាំងអស់គ្នាក្នុងពេលតែមួយទេ។ ដូចដែលខ្ញុំជម្រាបមិញអ៊ីចឹង ជាយុទ្ធសាស្រ្តដំបូងយើងធ្វើ ហើយអ្នកមកហ្នឹងត្រូវមានអាល់កុល ត្រូវមានម៉ាស់ ត្រូវវេចបាយមក ត្រូវមានទឹក ត្រូវមានសម្ភារផ្ទាល់ខ្លួនទាំងអស់ អត់មានចេញលេង អត់មានការពពាក់ពពូន ចេញទៅផ្ទះវិញ ផ្ញើម៉ូតូ ជាដើម»។
អ្នកទទួលបន្ទុកផ្នែកទំនាក់ទំនងនៃសាកលវិទ្យល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច (RULE) លោក ពៅ សារឿន បង្ហាញភាពរីករាយបន្ទាប់ពីក្រសួងបានអនុញ្ញាតឱ្យគ្រឹះស្ថានឧត្ដមសិក្សារដ្ឋនិងឯកជនអាចបង្រៀននិងរៀនក្នុងថ្នាក់ជាលក្ខណៈសាកល្បង ខណៈសាកលវិទ្យាល័យនេះកំពុងមមាញឹកក្នុងការរៀបចំដំណើរការ ដើម្បីធានានូវសុវត្ថិភាពសុខភាពទាំងអស់គ្នា។
លោកលើកឡើងថា៖ «ខ្ញុំសប្បាយរីករាយស្វាគមន៍ចំពោះការប្រកាសនេះ ប៉ុន្តែយើងនៅតែនីតិវិធីថាតើមានការរៀបចំយ៉ាងដូចម្ដេច ដើម្បីធានាសុវត្ថិភាពឱ្យបាន […] ខាងគណៈគ្រប់គ្រងយើងកំពុងតែពិនិត្យមើល ហើយរៀបចំយ៉ាងដូចម្ដេច ដើម្បីរៀបចំយ៉ាងម៉េចដើម្បីធានាដល់សុវត្ថិភាពសិស្សផង គ្រូផង និងសហគមន៍ផង»។
និស្សិតមកពីសាកលវិទ្យល័យបញ្ញាសាស្រ្តាកម្ពុជា ជំនាញទំនាក់ទំនងអន្តរជាតិ កញ្ញា គង់ ស្រីរ័ត្ន លើកឡើងថា ការបើកសាសាវិញគឺជារឿងមួយល្អ ប៉ុន្តែគួរមានវិធានការច្បាស់លាស់។ បន្ថែមពីនេះ កញ្ញាថា កញ្ញាពេញចិត្តនិងជ្រើសរើសការរៀនក្នុងថ្នាក់ផ្ទាល់ជាជាងរៀនតាមអនឡាញ។
កញ្ញាលើកឡើងថា៖ «សម្រាប់ខ្ញុំ បើគេបើកសាលា ខ្ញុំនឹងទៅរៀនក្នុងសាលា ព្រោះខ្ញុំគិតថា ខ្ញុំរៀននៅសាលាខ្ញុំ រៀនយល់ជាង ទោះបីក្នុងបរិបទអីក៏ដោយ។ គេថាឱ្យយើងរៀនទៅតាមបរិបទអ៊ីចឹងទៅ តែដោយសារតែខ្ញុំចូលចិត្តការរៀនដែលជួបផ្ទាល់ជាង»។
និស្សិតមកពីវិទ្យាស្ថានបច្ចេកទេសកម្ពុជា លោក ឡាយ ផានិត បានប្រាប់ វីអូឌី ថាការបើកដំណើរការថ្នាក់រៀនឡើងវិញជារឿងល្អ តែលោកក៏នៅបារម្ភពីសុវត្ថិភាព ពិសេសមេរោគកូវីដ-១៩បំប្លែងខ្លួនថ្មីប្រភេទ ដែលតា។
លោកថា៖ «បើបើកវិញល្អ ដោយសាររៀននៅសាលាវាបរិយាកាសស្ងប់ស្ងាត់ល្អ តែបើយើងនៅផ្ទះវារាងរញ៉េរញ៉ៃបន្តិច។ ហើយណាមួយ នៅសាលាក៏បានឧបករណ៍អីគ្រប់គ្រាន់ ពេលដល់ម៉ោងពិសោធន៍អី វាមានឧបករណ៍ យើងស្រួលសិក្សាជាងនៅផ្ទះ នៅផ្ទះយើងមានតែមេរៀន អត់សូវបានស្គាល់ឧបករណ៍ស្គាល់អី […]»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ជុំវិញការបើកដំណើរការថ្នាក់ឧត្ដមសិក្សាឡើងវិញ មិនមែនជាបញ្ហាធំនោះទេ ស្របពេលដែលថ្នាក់ឧត្ដមសិក្សាស្ថិតក្នុងវ័យចេះដឹង ជាមួយការទទួលបានចំណេះបន្ថែមពីការការពារខ្លួនរបស់ក្រសួងសុខាភិបាល។
លោកបន្តថា៖ «យើងដឹងហើយថា រហូតមកដល់ពេលនេះ មនុស្សនៅក្នុងវ័យនេះក៏បានចូលរួមចំណែកចាក់វ៉ាក់សាំងហ្នឹងបានច្រើនដែរ។ អ៊ីចឹងជាមួយនឹងវ៉ាក់សាំង ហើយនិងការរក្សាគម្លាត ឬក៏វិធានការផ្សេង ក៏អាចជួយពួកគេបានដែរ។ ប៉ុន្តែក៏យើងនៅតែបារម្ភដែរ ក្នុងស្ថានភាពបែបនេះជាមួយនឹងការកើតមាននូវមេរោគបំប្លែងថ្មី គឺជាចំណុចមួយដែលមានការបារម្ភ វាមិនមែនតែកម្ពុជាទេ សូម្បីពិភពលោកក៏បារម្ភដែរ»។
លោកបន្ថែមថា កម្ពុជាគួរតែមានអ្វីបន្ថែមទៀតក្រៅតែពីវិធានការ «៣កុំ ៣ការពារ» ពីព្រោះមេរោគកូវីដ-១៩ វាមានការវិវត្ត ការបំប្លែងខ្លួនពីឥទ្ធិពលធម្មតាមកជាឥទ្ធិពលខ្លាំង ហើយមានការចម្លងលឿនជាងមុន។ រឿងដែលសំខាន់ លោកថា ការចែករំលែកព័ត៌មានទៅដល់មហាជនពីក្រសួងសុខាភិបាល ដើម្បីឱ្យពួកគេប្រុងប្រយ័ត្ន។ ក្រៅពីនោះ ការស្វែងរកព័ត៌មានដែលមានប្រយោជន៍គ្រប់ជ្រុងជ្រោយសម្រាប់ការវិវត្តនៃកូវីដ-១៩ ជារឿងដែលមិនអាចមើលស្រាលបានទេ។
លោកថា បើមើលលើនីតិវិធីស្ដង់ដារប្រតិបត្តិអប្បបរមា (SOP) របស់ក្រសួងអប់រំ មានលក្ខណៈសម្បត្តិគ្រប់គ្រាន់ហើយ ប៉ុន្តែនៅឡើយតែការអនុវត្តគោលការណ៍នៅតាមគ្រឹះស្ថានឧត្ដមសិក្សា និងការធ្វើដំណើរនៅតាមសាធារណៈ ដូចជា តាមហាងកាហ្វេ នៅកន្លែងជួបជុំមួយចំនួនទៀត។
លោកមានប្រសាសន៍ថា៖ «ខ្ញុំតែងសង្កេតឃើញថា សិស្សនិស្សិតខ្លះចេញពីសាកលវិទ្យាល័យហើយ គាត់មានការជួបជុំរៀនសូត្រអ្វីផ្សេងៗទៀត។ អ៊ីចឹងការជួបជុំផ្សេងៗទៀតនៅក្រៅសាលារៀនហ្នឹង ក៏ជាឧបសគ្គមួយដែរ ក្រែងសាលាធ្វើល្អធ្វើបានត្រឹមត្រូវទៅ ប៉ុន្តែនិស្សិតអាចនាំមេរោគពីខាងក្រៅ ដោយការធ្វេសប្រហែស និងយកទៅចូលដល់ក្នុងថ្នាក់រៀនឬក៏សាលារៀនរបស់ខ្លូន»។
ក្រសួងអប់រំ យុវជន និងកីឡា បានប្រកាសបិទសាលារៀនទាំងរដ្ឋនិងឯកជនទូទាំងប្រទេសចាប់តាំងពីថ្ងៃទី២០ ខែមីនា ឆ្នាំ២០២១ ក្រោមហេតុផលបង្ការនិងទប់ស្កាត់ការរីករាលដាលជំងឺកូវីដ-១៩។
រហូតមកដល់ខែកញ្ញានេះ ទើបមានការសម្រេចជាថ្មីឱ្យបើកសាលាថ្នាក់អនុវិទ្យាល័យ វិទ្យាល័យ នៅតាមតំបន់មានហានិភ័យទាបនៃការឆ្លងជំងឺកូវីដ-១៩។ ហើយការសម្រេចចុងក្រោយកាលពីថ្ងៃទី២៤ ខែកញ្ញា ប្រមុខរដ្ឋាភិបាលបានអនុញ្ញាតឱ្យក្រសួងអប់រំ យុវជន និងកីឡា បើកមហាវិទ្យាល័យរដ្ឋនិងឯកជនឡើងវិញផងដែរ៕
