រដ្ឋបាលខេត្តសៀមរាបបានសម្រេចបញ្ចប់ការកំណត់ជា «តំបន់ក្រហម» និង «តំបន់លឿងទុំ» ក្នុងខេត្តនេះ ចាប់ពីថ្ងៃព្រហស្បតិ៍នេះទៅ ក្រោយស្ថានភាពនៃការឆ្លងរាលដាលជំងឺកូវីដ-១៩ មានភាពធូរស្រាល។
យោងតាមសេចក្ដីសម្រេចរបស់រដ្ឋបាលខេត្តសៀមរាប បានបញ្ជាក់ថា អាជ្ញាធរខេត្តសម្រេចបញ្ចប់ការកំណត់ជា «តំបន់ក្រហម» និង «តំបន់លឿងទុំ» ក្នុងភូមិសាស្ត្រខេត្តសៀមរាប ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចាប់ពីថ្ងៃទី៣០ ខែកញ្ញា ឆ្នាំ២០២១ ហើយរាល់សេចក្តីសម្រេចទាំងអស់នាពេលកន្លងមក ត្រូវទុកជានិរាករណ៍។
អភិបាលរងខេត្តសៀមរាប លោក លី សំរិទ្ធ មានប្រសាសន៍ថា មូលហេតុនៃការចេញសេចក្ដីសម្រេចនេះ ដោយសារបច្ចុប្បន្ន ស្ថានភាពនៃការឆ្លងរាលដាលជំងឺកូវីដ-១៩ក្នុងខេត្តនេះ មានស្ថានភាពធូរស្បើយ។
កាលពីថ្ងៃទី០៩ ខែមិថុនា ឆ្នាំ២០២១ រដ្ឋបាលខេត្តសៀមរាប សម្រេចកំណត់តំបន់ក្រហម នៅឃុំកំពង់ឃ្លាំង ស្រុកសូត្រនិគម តំបន់លឿងទុំ នៅឃុំគោកធ្លកក្រោម ស្រុកជីក្រែង និងឃុំដំដែក ស្រុកសូត្រនិគម និងតំបន់លឿង នៅឃុំកំពង់ក្ដី ស្រុកជីក្រែង ក្នុងភូមិសាស្រ្តខេត្តសៀមរាប ដើម្បីទប់ស្កាត់ការឆ្លងរាលដាលជំងឺកូវីដ-១៩។