កម្ពុជាបានរកឃើញករណីឆ្លងជំងឺកូវីដ-១៩ថ្មី ចំនួនជិត១ ០០០នាក់បន្ថែមទៀត ខណៈអ្នកជំងឺជិត២០នាក់ទៀតបានស្លាប់ដោយជំងឺនេះ។
សេចក្ដីប្រកាសព័ត៌មានរបស់ក្រសួងសុខាភិបាលនៅថ្ងៃទី៣០ ខែកញ្ញា ឆ្នាំ២០២១ បានឱ្យដឹងថា អ្នកស្លាប់ដោយជំងឺកូវីដ-១៩ កាលពីថ្ងៃម្សិលមិញ មានចំនួន១៧នាក់បន្ថែមទៀត និងករណីឆ្លងថ្មីមានចំនួន៩៧៨នាក់ ក្នុងនោះមានករណីនាំចូលពីក្រៅប្រទេសចំនួន៨១នាក់។ សម្រាប់អ្នកជាសះស្បើយថ្មីវិញ ក្រសួងថា មានចំនួន៦០៥នាក់។
អត្រាឆ្លងមានការកើនឡើងនេះ ស្របពេលដែលកម្ពុជាមានពិធីបុណ្យកាន់បិណ្ឌនិងភ្ជុំបិណ្ឌ។
ករណីនេះ រដ្ឋាភិបាលបានចេញសេចក្ដីសម្រេចបន្ទាន់មួយកាលពីពេលថ្មីៗនេះ ដោយសម្រេចផ្អាកការរៀបចំពិធីបុណ្យកាន់បិណ្ឌនិងភ្ជុំបិណ្ឌ ចាប់ពីបិណ្ឌទី៤ ដែលត្រូវនឹងថ្ងៃទី២៥ ខែកញ្ញា រហូតដល់បុណ្យភ្ជុំបិណ្ឌ។ តែការឈប់សម្រាកថ្ងៃបុណ្យភ្ជុំបិណ្ឌរក្សានៅដដែល។
ការផ្អាកនេះធ្វើឡើងដើម្បីទប់ស្កាត់ការឆ្លងជំងឺកូវីដ-១៩ ខណៈរដ្ឋាភិបាលបានសង្កេតឃើញថា ក្នុងរយៈពេលកាន់បិណ្ឌពីរថ្ងៃដំបូង មានការជួបជុំនិងប្រមូលផ្ដុំមនុស្សជាច្រើននៅតាមបណ្ដាវត្តអារាម ដោយមិនបានអនុវត្តឱ្យបានត្រឹមត្រូវ តាមវិធានការសុវត្ថិភាពផ្នែកសុខាភិបាល។ រដ្ឋាភិបាលបារម្ភថា ការជួបជុំនេះនឹងធ្វើឱ្យកម្ពុជាប្រឈមហានិភ័យខ្ពស់នៃការឆ្លងរាលដាលជំងឺកូវីដ-១៩ ជាទ្រង់ទ្រាយធំនៅទូទាំងប្រទេស ជាពិសេសមេរោគបំប្លែងខ្លួនថ្មីប្រភេទ ដែលតា (Delta) ដែលមានកម្រិតនៃការឆ្លងរាលដាលឆាប់រហ័ស។
បើតាមក្រសួងសុខាភិបាល គិតត្រឹមព្រឹកថ្ងៃព្រហស្បតិ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១២ ៦៥១នាក់ ក្នុងនោះ អ្នកជំងឺព្យាបាលជាសះស្បើយចំនួន១០២ ៨២៧នាក់ អ្នកស្លាប់កើនដល់ចំនួន២ ៣១៩នាក់ និងករណីនាំចូលពីក្រៅប្រទេសចំនួន១៨ ៩៨៣នាក់៕