អាជ្ញាធរខេត្តព្រះសីហនុ សម្រេចផ្អាកដំណើរការរោងចក្រចំនួន៣ ក្នុង«តំបន់សេដ្ឋកិច្ចពិសេសចេជាង» ជាបណ្ដោះអាសន្នរយៈពេល២សប្តាហ៍ បន្ទាប់ពីរកឃើញករណីឆ្លងក្នុងចំណោមបុគ្គលិកនិងកម្មករយ៉ាងហោចជាង១០០នាក់។
តាមលិខិត៣ផ្សេងគ្នា ចុះថ្ងៃទី២៨ ខែកញ្ញា ឆ្នាំ២០២១ រោងចក្រទាំង៣នោះ រួមមាន «អេហ្វ.ភី.ហ្សេត ហ្វើនីឈ័រ (ខេមបូឌា) ឯ.ក» «ខេមបូឌាន រ៉ូម អ៉ីនដាសស្រ្ទៀល ឯ.ក» និង «អាយ តាវ ផេត សីបផ្លាយ (ខេមបូឌា) ឯ.ក» ដែលមានទីតាំងស្ថិតនៅតំបន់សេដ្ឋកិច្ចពិសេស ចេជាង ហ្គ័រជី ក្នុងស្រុកព្រៃនប់ ខេត្តព្រះសីហនុ។
កម្មករផ្នែកខាត់មួយរូបនៅរោងចក្រផលិតគ្រឿងសង្ហារឹម អេហ្វ.ភី.ហ្សេត ឈ្មោះ ឃាន ទុំ វ័យ៤២ឆ្នាំ ថ្លែងនៅថ្ងៃទី៣០ ខែកញ្ញានេះថា បុគ្គលិកនិងកម្មករប្រមាណ១៤០នាក់បានធ្វើតេស្តឃើញវិជ្ជមានកូវីដ-១៩នៅថ្ងៃអាទិត្យ បន្ទាប់ពីពួកគេមួយចំនួនលេចអាការសង្ស័យដូចជា ផ្តាសាយ និងក្តៅខ្លួន។
ប្រភពដដែលបន្ដថា រោងចក្រដទៃក៏រកឃើញមានករណីវិជ្ជមានច្រើនដែរ តែលោកមិនដឹងថាមានចំនួនប៉ុន្មានទេ។ លោកបន្ថែមថា បញ្ហានេះក៏ធ្លាប់កើតមានផងដែរកាលពីខែឧសភា ដែលកាលនោះមានរោងចក្រមួយប៉ុណ្ណោះត្រូវបានផ្អាក ហើយរោងចក្ររបស់លោកក៏រកឃើញករណីឆ្លងដែរ តែមិនច្រើនរហូតដល់ត្រូវបិទទ្វារនោះទេ។
បុរសវ័យ៤២ឆ្នាំ ដែលមានស្រុកកំណើតក្នុងខេត្តកំពតរូបនេះ បន្តថា បញ្ហាឆ្លងរាលដាលនេះបានប៉ះពាល់ដល់ជីវភាពរបស់លោក ហើយលោកក៏ត្រូវធ្វើការទាំងភ័យខ្លាច ប៉ុន្តែលោកគ្មានជម្រើសអ្វីក្រៅពីព្យាយាមប្រយ័ត្នប្រយែងនិងការពារខ្លួនពីការឆ្លងឱ្យល្អ។
លោក ឃាន ទុំ បន្ថែមថា៖ «ធ្វើម៉េចបងបើកាលៈទេសៈវាអ៊ីចឹង! បើកាលណាគេពិនិត្យទៅឃើញឆ្លង គេបិទក្រុមហ៊ុនហ្នឹងទៀត! គេឱ្យយើងស៊ី៥០ភាគរយ ព្រោះគេអត់អាចដំណើរការទៅមុខទៀតបានទេ ព្រោះឆ្លងច្រើន។ បើកាលណាគេពិនិត្យទៅអត់មាន គេដំណើរការវិញ […] អ្នកណាក៏គេមិនចង់ឱ្យកើតដែរ ព្រោះវាទូទៅហើយឥលូវ ប៉ុន្តែយើងធ្វើការត្រូវចេះការការពារទៅ»។
ម្ចាស់បន្ទប់ជួលនៅមុខតំបន់សេដ្ឋកិច្ចពិសេសចេជាងមួយរូប អ្នកស្រី ជាវ សាវង់ ឱ្យដឹងនៅថ្ងៃពុធថា ករណីឆ្លងបានចាប់ផ្ទុះឡើងនៅថ្ងៃអាទិត្យ។ ប្រភពដដែលបន្តថា មានបុគ្គលិក-កម្មករប្រមាណ២០០ទៅ៣០០នាក់ត្រូវបានរកឃើញឆ្លង ហើយកម្មករជាច្រើនទៀតត្រូវបានរកឃើញជាបន្តបន្ទាប់ទៀត។
អតីតកម្មការិនីរោងចក្រក្នុងតំបន់សេដ្ឋកិច្ចពិសេសចេជាងរូបនេះ បន្ថែមថា កម្មករនៅបន្ទប់ជួលរបស់អ្នកស្រីចំនួន៣បន្ទប់ក្នុងចំណោម២០បន្ទប់ ត្រូវបានរកឃើញវិជ្ជមាន ហើយត្រូវបានអាជ្ញាធរដឹកជញ្ជូនទៅមណ្ឌលព្យាបាលក្នុងក្រុងព្រះសីហនុ។ ករណីនេះ អ្នកស្រីក៏បារម្ភខ្លាចពីផលប៉ះពាល់ដល់ចំណូលរបស់កម្មករនៅពេលរោងចក្ររបស់ពួកគេផ្អាកដំណើរការ ដែលនាំឱ្យកម្មករខ្លះគ្មានលទ្ធភាព បង់ថ្លៃបន្ទប់ជួល។
អ្នកស្រី ជាវ សាវង់ និយាយថា៖ «ឆ្លងច្រើនណាស់ ព្រោះអីរោងចក្រឃើញថ្ងៃហ្នឹង ពិនិត្យ ថាទៅ២ឡានទៀត! ១អគារ ទៅ២ឡាន! នៅពិនិត្យបន្តទៀត អត់ទាន់អស់រោងចក្រទេ ព្រោះអីឆ្លងច្រើនដែរ រាប់រយនាក់ប៉ុន្មានថ្ងៃហ្នឹង»។
អភិបាលស្រុកព្រៃនប់ លោក សរ កក្កដា ថ្លែងថា ករណីឆ្លងរកឃើញនៅតំបន់សេដ្ឋកិច្ចពិសេសចេជាង គឺមានត្រឹមជាង១០០ករណីប៉ុណ្ណោះ ហើយចំនួននេះនៅតិចតួចនៅឡើយ បើធៀបនឹងពេលផ្ទុះករណីឆ្លងកន្លងមក ដែលលោកថាមិនមានអ្វីគួរឱ្យបារម្ភនោះទេ។
លោក សរ កក្កដា មានប្រសាសន៍ថា៖ «មើលទៅជាង១០០នៅឡើយទេ។ យើងធ្លាប់លើសហ្នឹងឆ្ងាយ ឆ្លងពីមុនមក ក៏យើងធ្លាប់ជួបប្រទះបញ្ហាហ្នឹងដែរ មិនមានអីគួរឱ្យព្រួយបារម្ភទេ។ ពួកយើងនៅតែម្ចាស់ការ ព្រោះអាជ្ញាធរគ្រប់លំដាប់ថ្នាក់មានបទពិសោធន៍ក្នុងការគ្រប់គ្រងជំងឺកូវីដសម្រាប់ក្នុងស្រុកនេះ»។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ ថ្លែងថា ការសម្រេចផ្អាកប្រតិបត្តិការរោងចក្រទាំង៣ជាបណ្ដោះអាសន្ន ចាប់តាំងពីថ្ងៃទី២៨ ខែកញ្ញានោះ គឺដើម្បីទប់ស្កាត់ការឆ្លងរាលដាលទៅលើបុគ្គលិកនិងកម្មករដទៃ តាមគោលការណ៍និងវិធានការណែនាំរបស់ក្រសួងសុខាភិបាល។
បើតាមមន្រ្តីអ្នកនាំពាក្យរូបនេះ តំបន់សេដ្ឋកិច្ចពិសេសចេជាង ទើបត្រូវបានបង្កើតក្នុងឆ្នាំ២០១៩ និងមានរោងចក្រជាង១០កំពុងដំណើរការ ហើយក្នុងនោះ មានតែរោងចក្រ៣ប៉ុណ្ណោះដែលតម្រូវឱ្យផ្អាក។ លោកថា ការឆ្លងរាលដាលចូលតំបន់រោងចក្រ គឺពិបាកនឹងចៀសផុត ដោយសារទីនោះជាកន្លែងប្រមូលផ្តុំមនុស្សច្រើន។
លោកបន្តថា បន្ទាប់ពីបិទរយៈពេល១៤ថ្ងៃ ដើម្បីកាត់ផ្តាច់ការចម្លងនិងធ្វើតេស្តអ្នកពាក់ព័ន្ធ អាជ្ញាធរនឹងអនុញ្ញាតឱ្យរោងចក្របើកដំណើរឡើងវិញដូចដែលធ្លាប់បានអនុវត្តកន្លងមក ដោយមិនអាចបិទយូរ ដែលនាំឱ្យប៉ះពាល់ដល់សេដ្ឋកិច្ចកម្មករ ក្រុមហ៊ុន និងប្រទេស។
លោកថ្លែងបន្ថែមថា៖ «ចំពោះស្ថានភាពនៅខេត្តព្រះសីហនុរបស់យើង គឺការរីករាលដាលនៃជំងឺកូវីដ-១៩នៅតែបន្តមាន គ្រាន់តែពេលខ្លះ វាមានតិច វាមានច្រើន មិនទាន់អស់ទេ តែក៏អត់ដល់ដំណាក់កាលធ្ងន់ធ្ងររហូតឈានដល់ការបិទទីក្រុងឬក៏ខេត្តដែរ»។
យ៉ាងណា ប្រភពដដែលមិនអាចបញ្ជាក់ពីតួលេខករណីឆ្លងក្នុងតំបន់នេះបានទេ ដោយថា ព័ត៌មាននេះគឺស្ថិតក្នុងសមត្ថកិច្ចរបស់មន្ទីរសុខាភិបាលខេត្ត។
ប្រធានមន្ទីរសុខាភិបាលខេត្តព្រះសីហនុ លោកស្រីវេជ្ជបណ្ឌិត លឹម សាមាន បដិសេធមិនផ្តល់ព័ត៌មានជុំវិញករណីឆ្លងនេះ ដោយបង្វែរសំណួរទៅអ្នកនាំពាក្យរដ្ឋបាលខេត្តវិញ។
ប្រធានសហភាពការងារកម្ពុជា លោក អាត់ ធន់ លើកឡើងថា តំបន់សេដ្ឋកិច្ចពិសេសចេជាង ជាតំបន់រោងចក្រទើបបង្កើតថ្មី ដែលមិនទាន់មានសហជីពនៅឡើយ។ អវត្តមានសហជីពបែបនេះ លោកបារម្ភថា មានថៅកែមួយចំនួនអាចនឹងព្រងើយកន្តើយចំពោះសិទ្ធិនិងសេរីភាពកម្មករ នៅពេលមានបញ្ហាប្រឈមអ្វីមួយកើតឡើងចំពោះពួកគេ ដែលអាចប៉ះពាល់ដល់ផលប្រយោជន៍របស់ខ្លួន។
លោកបន្ថែមថា កន្លងមក មានថៅកែរោងចក្រនិងសហគ្រាសមួយចំនួនបានព្យាយាមបិទបាំងព័ត៌មានពីករណីឆ្លងក្នុងចំណោមបុគ្គលិក កម្មករ និយោជិតរបស់ពួកគេ ដោយមិនសហការជាមួយអាជ្ញាធរ រហូតនាំឱ្យការឆ្លងរីករាលដាលក្នុងទ្រង់ទ្រាយធំពិបាកនឹងទប់ស្កាត់។
លោក អាត់ ធន់ មានប្រសាសន៍ថា៖ «ក្នុងករណីមានការឆ្លងអ៊ីចឹង ប្រសិនជាក្រុមហ៊ុនមិនអនុញ្ញាតឱ្យចេញក្រៅ ឬមិនផ្តល់ព័ត៌មាន យើងមានលេខ Hot Line [ខ្សែទូរសព្ទទាន់ហេតុការណ៍] យើងមានអីប្រាប់មកដល់សហជីព ប្រាប់ទៅអាជ្ញាធរឱ្យគេចុះទៅក្រុមហ៊ុនហ្នឹង។ ហើយបើមិនបានទេ យើងមាន Live Facebook [ផ្សាយផ្ទាល់លើហ្វេសប៊ុក] ព្រោះដើម្បីឱ្យដឹង»។
តាមរបាយការណ៍ពីក្រសួងសុខាភិបាល គិតត្រឹមព្រឹកថ្ងៃព្រហស្បតិ៍នេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១១២ ៦៥១នាក់ ក្នុងនោះ អ្នកជំងឺព្យាបាលជាសះស្បើយមានចំនួន១០២ ៨២៧នាក់ អ្នកស្លាប់បានកើនដល់ចំនួន២ ៣១៩នាក់ ហើយករណីនាំចូលពីក្រៅប្រទេសចំនួន១៨ ៩៨៣នាក់៕
