សេតវិមាន នៅថ្ងៃចន្ទសប្ដាហ៍នេះ បានថ្លែងថា ការដោះលែងនាយកប្រតិបត្តិជាន់ខ្ពស់មួយរូបរបស់ក្រុមហ៊ុន Huawei និងជនជាតិកាណាដា ២រូបផ្សេងទៀត មិនមែនជាការដោះដូរអ្នកទោសនោះទេ។
ទាក់ទិននឹងករណីនេះ សេតវិមានបានច្រានចោលការលើកឡើងដែលថាការដោះលែងនាយកប្រតិបត្តិជាន់ខ្ពស់រូបនេះ គឺជាការដោះដូរអ្នកទោស។
ប្រធានផ្នែកហិរញ្ញវត្ថុរបស់ក្រុមហ៊ុន Huawei អ្នកស្រី Meng Wanzhou បានចាកចេញពីប្រទេសកាណាដា ហើយធ្វើដំណើរត្រឡប់ទៅកាន់ប្រទេសចិន កាលពីសប្តាហ៍មុន បន្ទាប់ពីមានកិច្ចព្រមព្រៀងជាមួយរដ្ឋអាជ្ញាអាមេរិក ដើម្បីបញ្ចប់បទចោទប្រកាន់ពីការកេងបន្លំប្រាក់ប្រឆាំងនឹងអ្នកស្រី។
ភ្លាមៗបន្ទាប់ពីការដោះលែង អ្នកស្រី Meng Wanzhou និងជនជាតិកាណាដា ២នាក់ទៀត ដែលត្រូវបានឃុំខ្លួននៅក្នុងប្រទេសចិន រួមមានលោក Michael Spavor និងលោក Michael Kovrig ក៏ត្រូវបានដោះលែងផងដែរ ដែលបច្ចុប្បន្នពួកគេកំពុងតែធ្វើដំណើរត្រឡប់មកកាន់ប្រទេសកាណាដាវិញ។
នៅក្នុងសន្និសីទសារព័ត៌មានមួយរបស់សេតវិមានកាលពីថ្ងៃចន្ទកន្លងទៅ លេខាធិការសេតវិមាន អ្នកស្រី Jen Psaki បានឱ្យដឹងថា ករណីដោះលែងនេះបានកើតមានឡើងនៅក្នុងការសន្ទនាតាមទូរសព្ទរវាងប្រធានាធិបតីអាមេរិកនិងចិន កាលពីដើមខែនេះ។
ជាមួយគ្នានេះដែរ អ្នកស្រីក៏បានច្រានចោលគំនិតដែលថាលោក Joe Biden បានរៀបចំកិច្ចព្រមព្រៀងដោះដូរអ្នកទោស។
អ្នកស្រី Jen Psaki បន្តថា៖ «នៅក្នុងកិច្ចសន្ទនានោះ លោកប្រធានាធិបតី Joe Biden បានលើកថា ការដោះលែងបុគ្គលពីររូប គឺលោក Michael Spavor និងលោក Michael Kovrig អាចជាព័ត៌មានដ៏វិជ្ជមាន។ វាមិនមែនជាការភ្ញាក់ផ្អើលនោះទេដែលប្រធានាធិបតីចិន លោក Xi Jinping លើកឡើងពីមន្រ្តីរបស់ក្រុមហ៊ុន Huawei។ មេដឹកនាំទាំងពីរនេះបានលើកករណីបុគ្គលទាំងពីរនេះ ប៉ុន្តែមិនមានការចរចាណាមួយអំពីរឿងនេះនោះទេ។ នេះគឺជាការលើកឡើងរបស់លោក Joe Biden និងបានជំរុញសារជាថ្មីម្តងទៀតចំពោះការដោះលែងជនជាតិកាណាដាទាំងពីររូបនេះ»។
អ្នកស្រីបន្ថែមថា កិច្ចព្រមព្រៀងដែលបានប្រកាសកាលពីថ្ងៃសុក្រកន្លងទៅនេះ មិនបានបង្ហាញពីការបន្ធូរបន្ថយការព្រួយបារម្ភរបស់អាមេរិកចំពោះអាកប្បកិរិយារបស់ចិនឡើយ។
អ្នកស្រីថា៖ «គោលនយោបាយរបស់យើងចំពោះចិនមិនបានផ្លាស់ប្ដូរនោះទេ។ វាមិនមែនមានន័យថា យើងកំពុងតែស្វែងរកជម្លោះនោះដែរ។ វាគឺជាទំនាក់ទំនងនៃការប្រកួតប្រជែង។ យើងនឹងប្រកាន់ខ្ជាប់នូវការតាមដាននៃការអនុវត្តសេដ្ឋកិច្ចអយុត្តិធម៌ សកម្មភាពបង្ខិតបង្ខំនៅជុំវិញពិភពលោក និងការរំលោភសិទ្ធិមនុស្សរបស់ចិនបន្តទៀត»។
អ្នកស្រី Meng Wanzhou បានមកដល់ប្រទេសចិន កាលពីចុងសប្តាហ៍ ខណៈដែលប្រព័ន្ធផ្សព្វផ្សាយផ្លូវការមួយចំនួនបានលើកឡើងថា ការដោះលែងអ្នកស្រីឱ្យមានសេរីភាពឡើងវិញនេះ អាចជាឱកាសដើម្បីស្តារឡើងវិញនូវទំនាក់ទំនងរវាងអាមេរិកនិងចិន។
ទាក់ទងទៅនឹងការចាប់ខ្លួនជនជាតិកាណាដាទាំងពីររូប ក្រុងប៉េកាំងក៏តែងតែប្រកាន់ជំហររបស់ខ្លួន ក្នុងការបដិសេធថា សកម្មភាពនេះមិនមានជាប់ពាក់ព័ន្ធទៅនឹងករណីរបស់អ្នកស្រី Meng Wanzhou នោះទេ៕