មូលនិធិរូបិយវត្ថុអន្តរជាតិ (IMF) បានវាយតម្លៃថា សេដ្ឋកិច្ចកម្ពុជាក្នុងឆ្នាំ២០២១ នឹងមានកំណើនខ្ពស់ជាងមុនក្នុងអត្រា២,២% ហើយនឹងបន្តងើបឡើងវិញថែមទៀតក្នុងរង្វង់ ៥% នៅឆ្នាំ២០២២។
ការព្យាករឡើងវិញនៃកំណើនសេដ្ឋកិច្ចកម្ពុជានេះ បានធ្វើឡើងតាមរយៈកិច្ចប្រជុំបូកសរុបការងាររបស់ក្រុមបេសកកម្ម Article IV នៃមូលនិធិរូបិយវត្ថុអន្តរជាតិ លើការវាយតម្លៃលើស្ថានភាពម៉ាក្រូសេដ្ឋកិច្ចកម្ពុជា កាលពីថ្ងៃទី២៧ ខែកញ្ញា និងបានប្រកាសដោយក្រសួងសេដ្ឋកិច្ច និងហិរញ្ញវត្ថុកម្ពុជា កាលពីថ្ងៃទី២៩ ខែកញ្ញា។
បើតាមមូលនិធិរូបិយវត្ថុអន្តរជាតិ (IMF) ការកើនឡើងនេះ គាំទ្រដោយវិស័យសំខាន់ៗចំនួនពីរ រួមមាន វិស័យកម្មន្តសាល និងវិស័យកសិកម្ម ដែលជំរុញដោយភាពរឹងមាំនៃតម្រូវការខាងក្រៅ ខណៈវិស័យសំណង់ វិស័យអចលនទ្រព្យ និងវិស័យសណ្ឋាគារនិងភោជនីយដ្ឋាន នៅបន្តរងផលប៉ះពាល់ដោយសារជំងឺកូវីដ-១៩ តាមរយៈព្រឹត្តិការណ៍សហគមន៍២០កុម្ភៈ។
ការព្យាករកំណើនសេដ្ឋកិច្ចរបស់កម្ពុជាពីសំណាក់មូលនិធិរូបិយវត្ថុអន្តរជាតិ (IMF) នេះ ដូចគ្នាទៅនឹងការព្យាកររបស់ធនាគារពិភពលោក (Worl Bank) កាលពីថ្ងៃទី២៧ ខែកញ្ញា ថាកំណើនសេដ្ឋកិច្ចកម្ពុជានៅក្នុងឆ្នាំ២០២១នេះ មានអត្រា ២,២%។ ក៏ប៉ុន្តែការព្យាកររបស់ធនាគារពិភពលោកនេះ ក៏ខុសពីការព្យាកររបស់ខ្លួននៅគ្រាដំបូងពីរង្វង់ ៤% មកនៅត្រឹម ២,២%វិញ។
វិបត្តិជំងឺកូវីដ-១៩ បានធ្វើឱ្យអត្រាកំណើនសេដ្ឋកិច្ចកម្ពុជានៅឆ្នាំ២០២០ បានធ្លាក់ចុះ -៣% ខណៈកម្ពុជាធ្លាប់បានទទួលកំណើនសេដ្ឋកិច្ចក្នុងរង្វង់ ៧% ក្នុងរយៈពេលជិត១០ឆ្នាំជាប់ៗគ្នា៕